រដ្ឋធានីកៀវ៖ ស្របពេល កងទ័ពអ៊ុយក្រែន កំពុងតែទទួលបានជ័យជម្នះយ៉ាងធំសម្បើម លើកម្លាំងទាហានរុស្ស៊ី នៅតាមសមរភូមិប្រយុទ្ធនានា ជាពិសេស នៅតំបន់ភាគខាងជើង ប្រទេស នោះមក ប្រធានាធិបតីសហរដ្ឋអាមេរិក បានព្រមានថា សង្គ្រាមនេះ អាចនឹងបន្ដ រយៈពេលយូរ។
សារព័ត៌មាន Al Jazeera បានចេញផ្សាយ កាលពីថ្ងៃទី១៤ ខែកញ្ញា ថា នៅក្នុងរយៈពេលប៉ុន្មានសប្ដាហ៍កន្លងទៅថ្មីៗនេះ កម្លាំងការពារទឹកដីរបស់អ៊ុយក្រែន បានវាយលុកយ៉ាងខ្លាំងទៅលើកម្លាំងទាហានរុស្ស៊ី រហូតទទួលបានជ័យជម្នះយ៉ាងធំធេងបំផុត ដោយរំដោះបានតំបន់ខាគីវ យកមកគ្រប់គ្រងវិញ។
មហាជោគជ័យរបស់កងទ័ពអ៊ុយក្រែន កំពុងតែធ្វើឱ្យប៉ះទង្គិចយ៉ាងធ្ងន់ធ្ងរបំផុត ដល់មហិច្ឆតាយោធារបស់ក្រុងមូស្គូ។ បរាជ័យរបស់កម្លាំងទាហានរុស្ស៊ី នឹងធ្វើឲ្យសម្ពន្ធមិត្តបស្ចិមលោក រំពឹងថា កងទ័ពរបស់ក្រុងកៀវ នឹងអាចឈ្នះក្រុងមូស្គូ។
លោកប្រធានាធិបតីអ៊ុយក្រែន បានប្រកាសជាញឹកញាប់ ថា សង្គ្រាម នៅក្នុងប្រទេសរបស់គាត់ បានចាប់ផ្ដើម ដោយសារក្រុងមូស្គូ លេបត្របាក់ឧបទ្វីគ្រីមៀ (Crimea) នៅក្នុងអំឡុងឆ្នាំ២០១៤។ ដូច្នេះ សង្គ្រាមនេះ ក៏នឹងបញ្ចប់ទៅវិញ ដោយការរំដោះឧបទ្វីបនេះ ត្រឡប់មកវិញដែរ។ គ្រីមៀ កំពុងតែរង់ចាំការរំដោះមកវិញ។ ជ័យជម្ននេះ ក៏បង្ហាញថា គោលដៅរបស់រដ្ឋាភិបាលក្រុងកៀវ នៅក្នុងការបង្កើតព្រំដែនឆ្នាំ២០១៤ឡើងវិញរបស់អ៊ុយក្រែន នឹងអាចសម្រេចបាន។
លោក វ៉ូឡូឌីមៀរ ហ្សេឡែនស្គី (Volodymyr Zelenskyy) ប្រធានាធិបតីអ៊ុយក្រែន បានព្យាករថា «តំបន់ដូណែតស្ក៍ (Donetsk) ទាំងមូល នឹងត្រូវរំដោះ» ខណៈកម្លាំងការពារទឹកដីរបស់គាត់បានត្រៀមខ្លួន ដើម្បីវាយដណ្តើមយកទីក្រុងយុទ្ធសាស្ត្រអ៊ីហ្ស៊ីម (Izyum)។ កងទ័ពអ៊ុយក្រែន នឹងវាយលុក នៅភាគខាងកើត នាពេលដ៏ឆាប់ៗនេះ។
ថ្វីបើកងទ័ពការពារទឹកដីរបស់អ៊ុយក្រែន ទទួលបានជ័យជម្នះយ៉ាងធំធេង រហូតរំដោះទឹកដី ពីកម្លាំងទាហានរុស្ស៊ី រហូតដល់ ៨ ០០០គីឡូម៉ែត្រការ៉េ នៅក្នុងពេលដ៏ឆាប់បែបនេះក្ដី ប៉ុន្ដែ លោក ចូ បៃដិន (Joe Biden) ប្រធានាធិបតីសហរដ្ឋអាមេរិក ក៏បានព្រមានប្រឆាំងនឹងការរំពឹងទុកដ៏អស្ចារ្យរបស់ក្រុងកៀវ ផងដែរ។ លោកប្រធានាធិបតីសហរដ្ឋអាមេរិក បានក្រើនរំឭកដល់អ៊ុយក្រែន ថា សង្រ្គាមនេះនឹងបន្ដអូសបន្លាយ នៅក្នុង«រយៈពេលយូរ»។
សារព័ត៌មានប្រចាំថ្ងៃរបស់អាល្លឺម៉ង់ Suddeutsche Zeitung បានផ្សាយ ថា បច្ចុប្បន្ន សហរដ្ឋអាមេរិក កំពុងតែពិចារណា អំពីការបញ្ជូនរថក្រោះប្រយុទ្ធដ៏ខ្លាំងក្លាបំផុតបំផុតរបស់បស្ចិមលោក និង រថចម្បាំង ទៅកាន់ប្រទេសអ៊ុយក្រែន ព្រោះក្រុងវ៉ាស៊ីនតោន គិតថា ការបញ្ជូនគ្រឿងយុទ្ធភណ្ឌទំនើបៗបែបនេះ ក៏ជាការចាំបាច់បំផុត សម្រាប់ជួយឲ្យអ៊ុយក្រែន អាចការពារខ្លួន ទប់ទល់នឹងកម្លាំងទាហានដ៏ខ្លាំងក្លារបស់រុស្ស៊ី៕