មេរោគ RSV ឬឈ្មោះពេញហៅថា Respiratory Syncytial Virus ត្រូវបានគេដឹងថាគឺជាមេរោគមួយប្រភេទដែលឆ្លងតាមរយៈភ្នាក់ងារបង្កជំងឺក្នុងផ្លូវដង្ហើម។ ជាពិសេសចំពោះកុមារតូចៗ មេរោគអាចបង្កឲ្យកើតមាននូវជំងឺរលាកសួតបានយ៉ាងងាយ ។
ជាមួយគ្នានេះក៏ត្រូវបានគេដឹងថា មេរោគនេះត្រូវបានឆ្លងតាមរយៈ ទឹករំអិល ទឹកមាត់ និងកំហាកពីការក្អក ឬកណ្ដាស់ជាដើម ។ ជាពិសេសងាយឆ្លងបំផុតនោះ គឺតាមរយៈការកណ្តាស់របស់អ្នកឆ្លងមេរោគRSVនេះតែម្ដង ។ ដោយឡែកចំពោះអត្រានៃការចម្លងមេរោគ RSVនេះវិញ ត្រូវបានគេដឹងថា មិនមានការចម្លងបានឆ្ងាយដូចការចម្លងជំងឺកញ្ជ្រឹល ឬរោគខាន់ស្លាក់នោះទេ។ ដោយជម្ងឺនេះអាចចម្លងមេរោគទៅកាន់មនុស្សដែលនៅជុំវិញពួកគេបានប្រហែលជា ៧ ទៅ ១២ នាក់ប៉ុណ្ណោះ។
ដោយឡែកចំពោះអ្នកដែលងាយប្រឈមនឹងមេរោគនេះ ត្រូវបានគេរកឃើញថា វាមានភាគរយខ្ពស់បំផុតសម្រាប់ក្មេងអាយុក្រោម 5 ឆ្នាំ និងមនុស្សធំ ឬមនុស្សចាស់ដែលមានប្រព័ន្ធភាពស៊ាំចុះខ្សោយ ។ ហើយប្រព័ន្ធផ្លូវដង្ហើមមានការបញ្ចេញស្លេស ឬកំហាកច្រើន ដែលជាហេតុធ្វើឱ្យភ្នាសរំអិលនៃទងសួត ហើយផ្លូវដង្ហើមត្រូវហើម ព្រមទាំងបង្កឲ្យកុមារពិបាកដកដង្ហើម ។
+ ចំពោះរោគសញ្ញាដំបូងនៃជំងឺRSV ៖
– អ្នកជម្ងឺមានការដកដង្ហើមខ្លី អស់កម្លាំង និងពិបាកដកដង្ហើមខុសពីធម្មតា
– ដកដង្ហើមដង្ហក់ និងលឺសម្លេង
– ពេលក្អកមានសំឡេងខ្លាំង និងមានកំហាក
– កើតមានស្លេសច្រើននៅក្នុងបំពង់ក
– ដោយឡែកចំពោះកុមារដែលមានជំងឺប្រចាំខ្លួនស្រាប់ដូចជា ជំងឺបេះដូង សួត ឬជំងឺហឺត នោះវាអាចបង្កឲ្យពួកគេជួបប្រទះនូវរោគសញ្ញាធ្ងន់ធ្ងររហូតដល់មិនអាចដកដង្ហើមបាន ដែលជាហេតុធ្វើឲ្យពួកគេងាយប្រឈមជាមួយនឹងការគំរាមកំហែងដល់អាយុជីវិតថែមទៀតផង ។
