កាលពីពេលថ្មីៗនេះ ខ្សែបម្រើឆ្នើមរបស់ក្លិបសេះបង្កង់ Juventus កីឡាករ Paul Pogba បានដាក់ពាក្យបណ្តឹងទៅប៉ូលីសនៅក្នុងប្រទេសបារាំង ដោយបានអះអាងថាខ្លួនកំពុងជាគោលដៅចាប់ជម្រិតមួយរបស់ពួក Gang។
ហេតុការណ៍នេះ កើតឡើងបន្ទាប់ពីបងប្រុសរបស់គាត់ Mathias Pogba បានបង្ហោះវីដេអូ ដោយគំរាមថា “អ្នកគាំទ្រគួរតែដឹងរឿងនេះ វាជារឿងពិតនៃ Pogba។ ខ្លឹមសារនៅក្នុងវីដេអូនេះ នឹងធ្វើអោយ Pogba បាត់បង់ឱកាសបង្ហាញខ្លួននៅព្រឹត្តិការណ៍ World Cup 2022។”
ដោយឡែកមេធាវី និងម្តាយរបស់ Pogba បានលើកឡើងថា “វីដេអូនេះគ្មានអ្វីគួរអោយភ្ញាក់ផ្អើល ឬខ្លាចនោះទេ ព្រោះវាគ្រាន់តែការគំរាមកំហែង និងការប៉ុនប៉ងជំរិតទារប្រាក់១១លានផោន ដោយក្រុមក្មេងទំនើងដែលមានបងប្រុសផងដែរនៅពីក្រោយតែប៉ុណ្ណោះ។”
ខណៈពេលនេះ ប៉ូលីសនៅក្នុងប្រទេសបារាំងកំពុងបើកការស៊ើបអង្កេតជុំវិញករណីនេះ ដោយរំពឹងថានឹងចាប់បានបងប្រុស Pogba និងក្រុមក្មេងទំនើងទាំងនោះ មុនព្រឹត្តិការណ៍ World Cup មកដល់៕
ប្រភព: Daily Mail