រដ្ឋធានីវ៉ាស៊ីនតោន៖ រហូតមកដល់ពេលនេះ រដ្ឋបាលចំណីអាហារ និង ឱសថ របស់សហរដ្ឋអាមេរិក ហៅកាត់ FDA កាលពីថ្ងៃពុធ ទី២២ ខែធ្នូ ឆ្នាំ២០២១ បានអនុម័តឲ្យប្រើប្រាស់ថ្នាំលេបរបស់ក្រុមហ៊ុន Pfizer សម្រាប់ព្យាបាលអ្នកប្រឈមនឹងជំងឺកូវីដ-១៩ មានអាយុចាប់ពី១២ឆ្នាំឡើង ហើយថ្នាំគ្រាប់នេះ ក៏អាចប្រយុទ្ធប្រឆាំងនឹងការរីករាលដាល ពីវីរុសបំប្លែងខ្លួនថ្មីអូមីក្រុង ផងដែរ។
បើតាមសារព័ត៌មានសិង្ហបុរី CNA បានចេញផ្សាយ កាលពីព្រឹក ថ្ងៃទី២៣ ខែធ្នូ ថា រដ្ឋបាលចំណីអាហារ និង ឱសថរបស់សហរដ្ឋអាមេរិក ហៅកាត់ FDA បានអនុម័តឲ្យប្រើប្រាស់ថ្នាំលេប Paxlovid របស់ក្រុមហ៊ុន Pfizer សម្រាប់អ្នកជំងឺកូវីដ-១៩មានអាយុ ចាប់ទី១២ឆ្នាំឡើងទៅ។ ឱសថ Paxlovid នេះ ក្លាយជាថ្នាំគ្រាប់លើកដំបូងបំផុត នៅលើពិភពលោក សម្រាប់លេបព្យាបាលជំងឺកូវីដ-១៩ ហើយថ្នាំនេះមានប្រសិទ្ធភាពខ្ពស់ នៅក្នុងការការពាររោគសញ្ញាជំងឺកូវីដធ្ងន់ធ្ងរចំពោះអ្នកឆ្លង និង អាចទប់ទល់ដល់ការឆ្លងរីករាលដាល ពីវីរុសបំប្លែងខ្លួនថ្មីអូមីក្រុង (Omicron) ។
សហរដ្ឋអាមេរិក បានអនុម័តឲ្យប្រើប្រាស់ថ្នាំលេប Paxlovid នៅក្នុងគ្រាបន្ទាន់នេះ បានកើតឡើង ចំពេលសហរដ្ឋអាមេរិក បានផ្ទុះការឆ្លងជំងឺកូវីដ-១៩កាន់តែខ្លាំងឡើង ជាពិសេស គឺការលេចឡើង នៃវីរុសអូមីក្រុង។ បើតាមគេហទំព័រ Worldometer បានចេញផ្សាយ កាលពីវេលាម៉ោង៨ព្រឹក ថ្ងៃទី២៣ ខែធ្នូ ឆ្នាំ២០២១ ថា សហរដ្ឋអាមេរិក បានរកឃើញករណីឆ្លងថ្មី នៃជំងឺកូវីដ-១៩ ចំនួន ២២៤ ៧៦៦នាក់ និង មានករណីស្លាប់ថ្មី ១ ៥២៨នាក់។ សហរដ្ឋអាមេរិក បានអ្នកឆ្លងជំងឺកូវីដ-១៩ សរុប ជាង៥២,៤៩លាននាក់ ហើយក្នុងនោះមានអ្នកស្លាប់ ៨៣២ ៩១៩នាក់ និង មានអ្នកជាសះស្បើយជាង៤០,៩លាននាក់។
បើតាមការសិក្សាមួយ បានរកឃើញថា នៅពេលគេលេបថ្នាំ Paxlovid ក្នុងរយៈពេលប្រាំថ្ងៃ ក្រោយពេលមានរោគសញ្ញាដំបូង សម្រាប់មនុស្សពេញវ័យ ដែលមិនបានចាក់វ៉ាក់សាំង ខណៈអ្នកជំងឺមានហានិភ័យខ្ពស់ គឺ Paxlovid អាចកាត់បន្ថយការចូលមន្ទីរពេទ្យ ឬការស្លាប់បាន រហូតដល់៨៨ភាគរយ។ ការសិក្សានេះ ត្រូវបានធ្វើឡើង ខណៈវីរុស Delta កំពុងកើនឡើង ប៉ុន្តែការសិក្សា នៅក្នុងមន្ទីរពិសោធន៍ ក៏បង្ហាញថា Paxlovid នឹងមានប្រសិទ្ធភាពប្រឆាំងនឹងវីរុសបំប្លែងខ្លួនថ្មី Omicron ផងដែរ។
ក្រោយពេលរដ្ឋបាលចំណីអាហារ និង ឱសថរបស់សហរដ្ឋអាមេរិក អនុម័តឲ្យប្រើប្រាស់ នៅក្នុងគ្រាអាសន្ននោះមក ក្រុមហ៊ុន Pfizer កំពុងតែបង្កើនការផលិតឱសថ Paxlovid នេះ សម្រាប់ចែកចាយ នៅទូទាំងពិភពលោក៕
