រដ្ឋធានីណៃពិដោរ៖ អណ្ដូងរ៉ែត្បូងមួយកន្លែង បានជួបនឹងគ្រោះដ៏អាក្រក់ បាក់ដី កប់កម្មករ យ៉ាងតិច ចន្លោះពី៧០-១០០នាក់ កាលពីវេលាម៉ោង៤ទៀបភ្លឹ ថ្ងៃទី២២ ខែធ្នូ ឆ្នាំ២០២១ នៅក្នុងតំបន់ផាកាន់ (Hpakant) ស្ថិតក្នុងរដ្ឋកាឈីន (Kachin) នាភាគខាងជើង ប្រទេសមីយ៉ាន់ម៉ា។
បើតាមសារព័ត៌មានសិង្ហបុរី CNA បានចេញផ្សាយ នៅថ្ងៃទី២២ ខែធ្នូ ថា គ្រោះបាក់ដី នៅក្នុងអណ្ដូងរ៉ែត្បូង នៅភាគខាងជើង ប្រទេសមីយ៉ាន់ម៉ា នោះ យ៉ាងហោចមានមនុស្ស៧០នាក់ កំពុងបាត់ខ្លួន និង ម្នាក់បានបាត់បង់ជីវិត។
ដោយឡែក ក្រុមអ្នកជួយសង្រ្គោះ បានអះអាងថា «មានមនុស្ស ចន្លោះប្រហែល៧០-១០០នាក់ កំពុងតែបាត់ខ្លួន ក្នុងករណីគ្រោះបាក់ដីនេ។ ហេតុការណ៍ដ៏អាក្រក់នេះ បានកើតឡើង កាលពីវេលាម៉ោង៤ទៀបភ្លឺ ថ្ងៃទី២២ ខែធ្នូ នៅក្នុងអណ្តូងរ៉ែត្បូង នៅតំបន់ ផាកាន់ (Hpakant) ក្នុងរដ្ឋកាឈីន (Kachin) ភាគខាងជើងប្រទេស»។
ដោយឡែក កម្មករម្នាក់បានបាត់បង់ជីវិត និង២៥នាក់ផ្សេងទៀត បានរងរបួស ហើយត្រូវបានបញ្ជូនទៅកាន់មន្ទីរពេទ្យ។ ចំណែកក្រុមអ្នកជួយសង្គ្រោះ កំពុងតែរុករកអ្នកនៅរស់រានមានជីវិតបន្តទៀត៕
