រដ្ឋធានីវ៉ាស៊ីនតោន៖ ក្រោយពេលមានករណីឆ្លងថ្មី នៃវីរុសកូវីដ-១៩បំប្លែងខ្លួនថ្មី Omicron នៅតាមរដ្ឋចំនួន៣នោះមក ប្រធានាធិបតីសហរដ្ឋអាមេរិក បានដាក់ចេញផែនការ ទប់ស្កាត់វីរុសនេះ។
បើតាមទីភ្នាក់ងារសារព័ត៌មានស៊ីនហួ បានចេញផ្សាយ កាលពីព្រឹក ថ្ងៃទី៣ ខែធ្នូ ឆ្នាំ២០២១ ថា លោក ចូ បៃដិន ប្រធានាធិបតីសហរដ្ឋអាមេរិក បានប្រកាសពីវិធានការថ្មី សម្រាប់ស្កាត់នឹងវីរុសបំប្លែងថ្មី Omicron ។ ការប្រកាសរបស់ប្រធានាធិបតីអាមេរិក បានកើតឡើង ក្រោយពេលរកឃើញមានវិជ្ជមាន ចំនួន២ ករណី នៃវីរុស Omicron ត្រូវបានរកឃើញ នៅក្នុងរដ្ឋកាលីហ្វ័ញ៉ា និង រដ្ឋ Minnesota ។
ស្របគ្នានេះដែរ លោកស្រី Kathy Hochul អភិបាលរដ្ឋញូវយ៉ក បានប្រកាសថា មានករណីវិជ្ជមាន នៃវីរុសបំប្លែងថ្មី Omicron ចំនួន៥ករណី ត្រូវបានរកឃើញនៅក្នុងរដ្ឋរបស់លោកស្រី។ បើតាមការប្រកាសរបស់លោកស្រី ធ្វើឲ្យសហរដ្ឋអាមេរិក មានអ្នកឆ្លងវីរុស Omicron សរុប ចំនួន៧នាក់ នៅក្នុងរដ្ឋចំនួន៣ រួមមាន រដ្ឋកាលីហ្វ័រញ៉ា មីណេសូតា និង ញូវយ៉ក។
លោក ចូ បៃដិន ប្រធានាធិបតីសហរដ្ឋអាមេរិកវ បានថ្លែង នៅក្នុងវិទ្យាស្ថានសុខាភិបាលជាតិ កាលពីថ្ងៃទី២ ខែធ្នូ ឆ្នាំ២០២១ (ពេលវេលានៅវ៉ាស៊ីនតោន) ថា «នេះជាដំបូន្មានរួមរបស់អ្នកទាំងអស់គ្នា ទើបយើងអាចបង្កើតផែនការនេះឡើង។ យើងនឹងនឹងមិនមានការបិទខ្ទប់ប្រទេសអ្វីឡើយ ប៉ុន្តែយើងត្រូវតែពង្រីកការចាក់វ៉ាក់សាំងបង្ការកូវីដ-១៩ និងដូសជំរុញ ហើយបង្កើនការធ្វើតេស្ត និង មានវិធានការជាច្រើនទៀត… សម្រាប់ទប់ស្កាត់វីរុសនេះ»។
ទោះជាយ៉ាងណា លោកប្រធានាធិបតីសហរដ្ឋអាមេរិក បានបញ្ជាក់ថា «វិធានការនេះ នៅតែអនុញ្ញាតឱ្យសាលារៀន និង អាជីវកម្មនានាបន្តបើកទ្វារដំណើរជាធម្មតា ដោយរក្សាវិធានការសុវត្ថិភាព សម្រាប់ប្រជាជនអាមេរិកទាំងអស់គ្នា។ យើងរួមគ្នាប្រយុទ្ធជាមួយវីរុសបំប្លែងខ្លួន ដោយប្រើប្រាស់វិទ្យាសាស្ត្រ និងភាពរហ័សរហួន… មិនមែនដោយភាពវឹកវរ និង ការភាន់ច្រឡំឡើយ»។
បើតាមគេហទំព័រ Worldometer បានចេញផ្សាយ កាលពីវេលាម៉ោង៨ព្រឹក ថ្ងៃទី៣ ខែធ្នូ ឆ្នាំ២០២១ ថា សហរដ្ឋអាមេរិក បានរកឃើញករណីឆ្លងថ្មី នៃជំងឺកូវីដ-១៩ ចំនួន ១២១ ៤៩៨នាក់ និង មានករណីស្លាប់ថ្មី ១ ១៩៨នាក់។ សម្រាប់ថ្ងៃនេះ សហរដ្ឋអាមេរិក មានអ្នកឆ្លងថ្មី នៃកូវីដ-១៩ច្រើនជាងគេ នៅលើពិភពលោក តែមានអ្នកស្លាប់ថ្មីច្រើន បន្ទាប់ពីរុស្ស៊ី។ សហរដ្ឋអាមេរិក មានអ្នកឆ្លងសរុប ជាង៤៩,៦លាននាក់ ហើយក្នុងនោះ មានអ្នកស្លាប់ ៨០៦ ៣២៩នាក់ និង មានអ្នកជាសះស្បើយ ជាង៣៩,៣លាននាក់៕
