រាជធានីម៉ាឌ្រីដ៖ អង្គការសហប្រជាជាតិ កាលពីឆ្នាំ២០១៦ បានប៉ាន់ប្រមាណថា ឧស្សាហកម្មផ្លូវភេទ នៅអេស្ប៉ាញ អាចរកចំណូលបាន ប្រហែល៤,២ពាន់លានដុល្លារសហរដ្ឋអាមេរិក ប៉ុន្ដែ នាយករដ្ឋមន្រ្ដី នៃប្រទេសអឺរ៉ុបមួយនេះ បានសន្យា កាលពីថ្ងៃទី១៧ ខែតុលា ឆ្នាំ២០២១ ត្រូវតែដាក់ទោសទណ្ឌដល់អំពើពេស្យាចារ នៅក្នុងប្រទេសនេះ។
សារព័ត៌មាន BBC បានផ្សាយថា លោក Pedro Senchez នាយករដ្ឋមន្រ្ដីអេស្ប៉ាញ កាលពីថ្ងៃអាទិត្យ (ទី១៧ ខែតុលា) បានសន្យា ត្រូវតែដាក់ទោសទណ្ឌដល់អំពើពេស្យាចារ នៅក្នុងប្រទេសរបស់លោក។ លោកនាយករដ្ឋមន្រ្ដី បានថ្លែងទៅកាន់អ្នកគាំទ្ររបស់លោក នៅក្នុងសមាជបក្សសង្គមនិយមរបស់លោក ដែលបានធ្វើឡើង នៅក្នុងទីក្រុង Valencia រយៈពេល៣ថ្ងៃ។
លោកនាយករដ្ឋមន្រ្ដី បានសង្កត់ធ្ងន់ថា «អំពើពេស្យាចារ គឺយកស្រ្ដីធ្វើជាទាសីផ្លូវភេទ»។ អំពើពេស្យាចារ ត្រូវបានដាក់ទោសទណ្ឌ នៅក្នុងប្រទេសអេស្ប៉ាញ ចាប់តាំងពីឆ្នាំ១៩៩៥មក។ នៅក្នុងឆ្នាំ២០១៦ អង្គការសហប្រជាជាតិ បានប៉ាន់ប្រមាណថា ឧស្សាហកម្មផ្លូវភេទ នៅក្នុងប្រទេសអេស្ប៉ាញ អាចរកប្រាក់ចំណូលបាន ប្រហែល៤,២ពាន់លានដុល្លារសហរដ្ឋអាមេរិក។
បើតាមការស្រាវជ្រាវ នាឆ្នាំ២០០៩ បានរកឃើញថា បុរសអេស្ប៉ាញម្នាក់ ក្នុងចំណោម៣នាក់ តែងតែចំណាយលុយទៅលើការរួមភេទ។ ទោះយ៉ាងណា របាយការណ៍មួយផ្សេងទៀត ត្រូវបានបោះពុម្ពផ្សាយ ក្នុងឆ្នាំ២០០៩ បានបង្ហាញថា តួលេខនេះអាចនឹងកើនឡើងខ្ពស់ រហូតដល់៣៩%។ ចំណែកការសិក្សារបស់អង្គការសហប្រជាជាតិ នាឆ្នាំ២០១១ បានលើកឡើងថា អេស្ប៉ាញ ជាមជ្ឈមណ្ឌលពេស្យាចារដ៏ធំជាងគេបំផុត លំដាប់ទី៣ នៅលើពិភពលោក បន្ទាប់ពីប្រទេសថៃ និងព័រតូរីកូ (Puerto Rico )។
ពេស្យាចារ បច្ចុប្បន្ន មិនមានច្បាប់កំណត់ នៅក្នុងប្រទេសអេស្ប៉ាញទេ ហើយក៏មិនមានការដាក់ទណ្ឌកម្ម ចំពោះអ្នកផ្តល់សេវាកម្មផ្លូវភេទដែរ ព្រោះការចំណាយប្រាក់លើការរួមភេទ គឺធ្វើឡើង តាមការព្រមព្រៀងផ្ទាល់ខ្លួន ហើយវាមិនបានកើតឡើង នៅតាមទីសាធារណៈនោះដែរ។ ទោះយ៉ាងណាក៏ដោយ ការធ្វើជាម៉ែយ៉ែម ឬការដើរតួជាអ្នកតំណាង រវាងអ្នករកស៊ីផ្លូវភេទ និងអតិថិជន គឺជាទង្វើខុសច្បាប់។ បើតាមការប៉ាន់ប្រមាណ មានស្រ្ដី ប្រហែល ៣០០ ០០០នាក់ ប្រកបរបរជាស្រីពេស្យា នៅក្នុងប្រទេសអេស្ប៉ាញ៕