ទីក្រុងឡាអេ៖ បុរសខ្លាំងហ្វីលីពីន គ្រាន់តែបានឡើង កាន់តំណែង ជាប្រធានាធិបតី នៅថ្ងៃទី៣០ ខែមិថុនា ឆ្នាំ២០១៦ ភ្លាម ក៏ចាប់ផ្ដើមធ្វើសង្គ្រាម ប្រឆាំងនឹងគ្រឿងញៀន ដោយបានសម្លាប់មនុស្ស អស់រាប់ពាន់នាក់ ហើយគាត់នឹងអស់អំណាច នៅត្រឹមចុង២០២១ ក្រោយការបោះឆ្នោតថ្មី នៅឆ្នាំ២០២២ ប៉ុន្ដែបច្ចុប្បន្ន តុលាការអន្ដរជាតិ ICC ដែលមានមូលដ្ឋាន នៅទីក្រុងឡាអេ (Hague) ប្រទេសហូឡង់ ក៏កំពុងតែចាប់ផ្ដើមដំណើរ ស្វែងរកភស្ដុតាង ពាក់ព័ន្ធនឹងឃាតកម្ម ប្រឆាំងនឹងមនុស្សជាតិ។
បើតាមសារព័ត៌មាន Al Jazeera បានចេញផ្សាយ កាលពីថ្ងៃទី១៥ ខែកញ្ញា ថា តុលាការឧក្រិដ្ឋកម្មអន្ដរជាតិ ហៅកាត់ «ICC» បានសម្រេចជាផ្លូវការ អនុញ្ញាតឲ្យមានការស៊ើបអង្កេត ពាក់ព័ន្ធនឹងឧក្រិដ្ឋកម្ម ប្រឆាំងមនុស្សជាតិ នៅក្នុង «សង្គ្រាមប្រឆាំងគ្រឿងញៀន» របស់លោក រ៉ូឌ្រីហ្គោ ឌូតឺតេ (Rodrigo Duterte) ប្រធានាធិបតីហ្វីលីពីន។ នេះជាការដោះស្រាយជ័យជម្នះខាងសីលធម៌ដល់អ្នកការពារសិទ្ធិមនុស្ស និង ក្រុមគ្រួសាររបស់ជនរងគ្រោះ ដែលត្រូវបានសម្លាប់ រួមទាំង កុមារស្លូតត្រង់។
នៅក្នុងសេចក្តីថ្លែងការណ៍មួយ បានចេញ កាលពីថ្ងៃពុធ (ទី១៥ ខែកញ្ញា) សាលាក្តីអន្ដរជាតិនៅទីក្រុងឡាអេ ប្រទេសហូឡង់ មួយនេះ បានអះអាងថា មាន «មូលដ្ឋានគ្រឹះត្រឹមត្រូវ” សម្រាប់បន្តស៊ើបអង្កេត ដោយកត់សម្គាល់ថា «ធាតុផ្សំស្របតាមច្បាប់ជាក់លាក់ នៃឧក្រិដ្ឋកម្មប្រឆាំងនឹងឃាតកម្មលើមនុស្សជាតិ» ត្រូវបានប្រព្រឹត្ដ នៅក្នុងការបង្ក្រាប ដែលបានបណ្តាលឱ្យមនុស្សរាប់ពាន់នាក់ បាត់បង់ជីវិត។
ដីកាស៊ើបអង្កេតនេះ ត្រូវបានចុះហត្ថលេខា ដោយចៅក្រមជាច្រើនរួប រួមមាន លោក Péter Kovács, Reine Adélaïde Sophie Alapini-Gansou និងលោក María del Socorro Flores Liera ។
ICC បានបញ្ជាក់ថា ចៅក្រម ICC បានពិចារណាលើភស្តុតាង ដែលបានបង្ហាញ ក្នុងនាមជនរងគ្រោះ យ៉ាងតិច២០៤នាក់។ អ្វីដែលពួកគេបានរកឃើញ បានបង្ហាញថា «ការវាយប្រហាររីករាលដាល និង មានលក្ខណៈជាប្រព័ន្ធ ប្រឆាំងនឹងប្រជាជនស៊ីវិល បានកើតឡើង ស្របតាម ឬបន្តតាមគោលនយោបាយរបស់រដ្ឋ»។
លោកស្រី Fatou Bensouda អតីតរដ្ឋរាជអាជ្ញា ICC បានដាក់ពាក្យស្នើសុំ ស៊ើបអង្កេត មុនពេលលោកស្រីចូលនិវត្តន៍ កាលពីខែមិថុនា ដោយចោទប្រកាន់ថា «តួអង្គរដ្ឋ ភាគច្រើនជាសមាជិក នៃកងកម្លាំងសន្តិសុខហ្វីលីពីន បានសម្លាប់មនុស្សរាប់ពាន់នាក់ ពាក់ព័ន្ធនឹងការសង្ស័យថា ជាអ្នកប្រើប្រាស់គ្រឿងញៀន និងជនស៊ីវិល នៅក្នុងអំឡុងពេលប្រតិបត្តិការអនុវត្តច្បាប់ជាផ្លូវការ»។ ចំណែកអ្នកបន្ដពីលោកស្រី Bensouda គឺលោក Karim Khan ជារដ្ឋអាជ្ញាបច្ចុប្បន្ន នឹងត្រួតពិនិត្យមើលការស៊ើបអង្កេតជាក់ស្តែង និងជំនុំជម្រះសំណុំរឿង អាចនឹងកើតមាន៕
