រាជធានីភ្នំពេញ៖ បច្ចុប្បន្នេះពលរដ្ឋនៅតែមានមន្ទិលសង្ស័យពាក់ព័ន្ធនឹងករណីបើកភ្លើងម៉ូតូ ឡាន ពេលថ្ងៃ តើអាចសមត្ថកិច្ចចរាចរណ៍ផាកពិន័យដែរឬយ៉ាងណា? ដោយពីមុនមកជាញឹកញាប់ករណីបើកភ្លើង ម៉ូតូ ឡានប៉ូលីសចរាចរណ៌មួយចំនួន បានហៅឈប់ផាកពិន័យ។
ក្នុងវេទិកាស្ដីពីច្បាប់ចរាចរណ៍ផ្លូវគោកកាលពីថ្ងៃទី០៨ ខែឧសភា ឆ្នាំ២០២០ កន្លងទៅ លោកឧត្ដមសេនីយ៍ត្រី ថី វិសាល អនុប្រធាននាយកដ្ឋាននគរបាលចរាចរណ៍ និង សណ្ដាប់ធ្នាប់សាធារណៈបានបកស្រាយលើករណីបើកភ្លើងពេលថ្ងៃថា ច្បាប់មិនតម្រូវឱ្យផាកពិន័យម៉ូតូ ឬរថយន្តបើកភ្លើងពេលថ្ងៃទេ។
មន្រ្តីនគរបាលចរាចរណ៍ពន្យល់ថា ភ្លើងពេលថ្ងៃនេះមិនមែនជាភ្លើងហ្វា ហើយក៏មិនមែនជាភ្លើងកូតនោះដែរ។ បណ្ដាប្រទេសអភិវឌ្ឍដូចជាអាមេរិក ច្បាប់តម្រូវឱ្យបើកភ្លើងពេលថ្ងៃ ដែលត្រូវបើកជាប់រហូតតែម្ដង។
លោកបានលើកឧទាហរណ៍រថយន្តមួយទឹកនាំចូលស្រុកខ្មែរភាគច្រើននាំពីអាមេរិក ច្រើនជួបបញ្ហានេះ។ បើតាមលោកឧត្តមសេនីយ៍ នៅក្នុងច្បាប់ស្ដីពីចរាចរណ៍ផ្លូវគោក មិនមានមាត្រាណាមួយឱ្យមន្រ្ដីនគរបាលចរាចរណ៍ធ្វើការផាកពិន័យទៅលើភ្លើងពេលថ្ងៃនោះទេ។ ទោះបីភ្លើង (Day Light) ដែលជាភ្លើងបំពាក់មានស្រាប់មកពីនាយ ក៏មន្រ្ដីនគរបាលមិនពិន័យដែរ ដូច្នេះសូមប្រជាពលរដ្ឋកុំមានការព្រួយបារម្ភ។
មន្រ្តីផ្នែកចរាចរណ៍ក៏លើកបញ្ជាក់ពីការប្រើប្រាស់ភ្លើងលើយានយន្តបន្ថែមថា ទោះបីអ្នកបើកបរភ្លេចបិទភ្លើងកូត ក៏មន្ត្រីនគរបាលមិនត្រូវពិន័យដែរ ៕