រដ្ឋធានីកាប៊ូល៖ ក្រោយពេលពួកឧទ្ទាមតាលីបង់ វាយដណ្ដើមកាន់កាប់រដ្ឋធានីកាប៊ូល កាលពីល្ងាច ថ្ងៃអាទិត្យ (ទី១៥ ខែសីហា) រួចមក អនុប្រធានាធិបតីអាហ្វហ្គានីស្ថាន បានអះអាងថា លោក នឹងឱនក្បាលគោរពដល់ពួកភេរវករតាលីបង់ឡើយ។
សារព័ត៌មាន Hindustan Time បានផ្សាយថា លោក Amrullah Saleh អនុប្រធានាធិបតីអាហ្វហ្គានីស្ថាន បានបញ្ជាក់ថា លោកនឹងមិនអាចជ្រកក្រោមដំបូលតាលីបង់ ហើយនឹងឱនគោរពពួកភេរវករដែរ។ លោកអនុប្រធានាធិបតី បានអះអាងបែបនេះ ក្រោយពេលពួកតាលីបង់អះអាងពីការគ្រប់គ្រងវិមានប្រធានាធិបតី នៅក្នុងទីក្រុងកាប៊ូល កាលពីថ្ងៃទី១៥ ខែសីហា ឆ្នាំ២០២១។
លោក Amrullah Saleh បានប្រកាស តាមបណ្ដាញសង្គមថា លោកនឹងមិនឱនក្បាលគោរពដល់ពួកតាលីបង់ឡើយ ហើយក៏មិនស្ថិតក្រោមកាលៈទេសៈណាមួយនោះទេ។ លោកមិនក្បត់ឆន្ទៈ និងកេរតំណែលបុព្វវីរជនរបស់លោក គឹលោក Ahmad Shah Masoud ជាមេបញ្ជាការ និងជាមគ្គុទ្ទេសក៍នោះដែរ។
លោក Amrullah Saleh បានបន្ដថា អ្វីដែលលោកមិនខកចិត្តបំផុត ត្រង់ថា មនុស្សរាប់លាននាក់ មិនស្តាប់តាមលោក ហើយលោកក៏នឹងមិននៅក្រោមការគ្រប់គ្រងណាមួយជាមួយតាលីបង់នោះឡើយ។ អនុប្រធានាធិបតីរូបនេះ បានសរសេរនៅលើបណ្តាញសង្គម Twitter ថា ការចរចា សម្រាប់ការរៀបចំបណ្តោះអាសន្ន កំពុងដំណើរការ។
បើតាមសេចក្ដីរាយការណ៍ បានឲ្យដឹងថា លោក Amrullah Saleh បានចាកចេញពីទីក្រុងកាប៊ូល ហើយអាចធ្វើដំណើរ តាមជ្រលងភ្នាម Panhshiri ។ ស្របគ្នានោះដែរ លោក Ashraf Ghani ប្រធានាធិបតីអាហ្វហ្គានីស្ថាន ត្រូវបានកងទ័ពសហរដ្ឋអាមេរិក ជម្លៀសចេញពីទីក្រុងកាប៊ូល ហើយនាំទៅកាន់រដ្ឋធានី Dushanbe ប្រទេសតាជីគីស្ថាន (Tajikistan)។
បើតាមសេចក្ដីរាយការណ៍ បានបញ្ជាក់ថា លោក Ashraf Ghani បានប្រគល់សិទ្ធិដោះស្រាយបញ្ហាវិបត្ដិទាំងនេះ ទៅលើមេដឹកនាំនយោបាយ នៅក្នុងប្រទេស។ ប៉ុន្ដែបើតាមលោក Bismillah Mohammadi រដ្ឋមន្រ្ដីស្ដីទីក្រសួងការពារជាតិ បានបញ្ជាក់ថា គណៈប្រតិភូមួយក្រុម រួមមាន លោក Younus Qanooni, លោក Ahmad Wali Massoud, លោក Mohammad Mohaqiq បានធ្វើដំណើរទៅកាន់ទីក្រុងដូហា ប្រទេសកាតារ កាលពីថ្ងៃចន្ទ (ទី១៦ ខែសីហា) ដើម្បីចរចា ស្ដីពីបញ្ហាអាហ្វហ្គានីស្ថាន។
ក្រោយពេលចូលទៅដល់ទីក្រុងកាប៊ូល មេដឹកនាំតាលីបង់ បានប្រកាសថា យុទ្ធជនទាំងអស់ត្រូវបានបញ្ជាឱ្យអត់ធ្មត់។ គ្មានការវាយប្រហារ គ្មានការបាញ់កាំភ្លើងអបអរ ដូចកាលពីពេលកន្លងមក ខណៈក្រុមបះបោរបានធ្វើ ក្រោយទទួលជ័យជម្នះលើកងទ័ពរដ្ឋាភិបាលអាហ្វហ្គានីស្ថាន នៅលើដែនដីជាច្រើន។ ប៉ុន្ដែនៅពេលនេះមើលទៅ ដូចជាការធ្វើរដ្ឋប្រហារនោះ គ្មានការបង្ហូរឈាម ហើយមានការផ្លាស់ប្តូរអំណាច ដោយរលូន ក្នុងរយៈពេលពីរបីថ្ងៃ។
ទោះជាយ៉ាងណា រហូតមកដល់ពេលនេះ គេនៅមិនទាន់មានសេចក្ដីរាយការណ៍ថា ថ្នាក់ដឹកនាំកំពូលៗរបស់ប្រទេសអាហ្វហ្គានីស្ថានទាំងអស់នោះ បានរត់ភៀសខ្លួនទៅដល់ទីណាខ្លះនោះដែរ៕
