រាជធានីបាងកក៖ ថ្វីបើពេលនេះ ស្ថានភាពកូវីដ-១៩ នៅក្នុងប្រទេសថៃ កំពុងឆ្លង និងស្លាប់ច្រើនយ៉ាងណាក្ដី តែក្រុមបាតុករគាំទ្រលទ្ធិប្រជាធិបតេយ្យ នៅតែបន្ដធ្វើបាតុកម្ម ហើយនាំគ្នាដុតប៉ុស្ដិ៍ និងកន្លែងប៉ូលិសចរាចរណ៍នៅជិតវិមានជ័យជម្នះ នាទីក្រុងបាងកក។
សារព័ត៌មានថៃ The Nation បានចេញផ្សាយ នៅថ្ងៃទី១១ ខែសីហា ឆ្នាំ២០២១ ថា ប៉ូលិស នៅថ្ងៃពុធ (ទី១១ ខែសីហា) បានចោទប្រកាន់ដល់ក្រុមបាតុករគាំទ្រលទ្ធិប្រជាធិបតេយ្យ បានដុតប៉ុស្ដិ៍ប៉ូលិស Phaya Thai និងកម្ទេចកន្លែងប៉ូលិសចរាចរណ៍ នៅក្នុងអំឡុងពេលប្រមូលផ្ដុំគ្នារបស់ពួកគេ នៅឯវិមានជ័យជម្នះ កាលពីថ្ងៃអង្គារ (ទី១០ ខែសីហា)។ រីឯគ្រាប់ពីងប៉ុងជាច្រើន ក៏បានរកឃើញ នៅក្នុងតំបន់នោះផងដែរ។ ប៉ុស្ដិ៍ប៉ូលិសនោះ មានទំហំ៥គុណម៉ែត្រ កម្ពស់១ជាន់ កសាង នៅត្រង់កាច់ជ្រុង Phaya Thai នាវិមានជ័យជម្នះ។
ប៉ូលិស កាលពីព្រឹក ថ្ងៃពុធ បានស៊ើបអង្កេត នៅកន្លែងនោះ ក្រោយពេលមានការប៉ះទង្គិចគ្នា រវាងក្រុមអ្នកតវ៉ា និងមន្រ្ដីប៉ូលិស នៅត្រង់ចំណុចប្រសព្វ Din Daeng កាលពីល្ងាច ថ្ងៃអង្គារ អំឡុងពេលប៉ូលិសប្រើប្រាស់ឧស្ម័នបង្ហូរទឹកភ្នែក គ្រាប់កៅស៊ូ និងរថយន្ដបាញ់ទឹក ដើម្បីបំបែកហ្វូងបាតុករ។
ប៉ូលិស បានបន្ដថា ប៉ុស្តិ៍ប៉ូលិសបានបើក នៅថ្ងៃទី១ ខែមិថុនា ហើយត្រូវបានក្រុមអ្នកតវ៉ាដុតបំផ្លាញចោល។ នៅជាប់នឹងប៉ុស្ដិ៍នោះ ក៏មានកន្លែងប៉ូលិសចរាចរណ៍មួយ មានកម្ពស់ពីរជាន់ ទំហំ៤គុណនឹង៨ម៉ែត្រ ក៏ត្រូវបានដុតកម្ទេចចោលផងដែរ៕
