រដ្ឋធានីវ៉ាស៊ីនតោន៖ រដ្ឋការរបស់លោក ចូ បៃដិន ប្រធានាធិបតីសហរដ្ឋអាមេរិកបច្ចុប្បន្ន បានដើរតាមលំអានរបស់រដ្ឋបាលរបស់លោក ដូណាល់ ត្រាំ អតីតប្រធានាធិបតីសហរដ្ឋអាមេរិក បន្ដលក់អាវុធមានតម្លៃ ៧៥០លានដុល្លារទៅឲ្យកោះតៃវ៉ាន់ ហើយសកម្មភាពបែបនេះ គឺជាការបន្ថែមកំហឹងដល់រដ្ឋាភិបាលទីក្រុងប៉េកាំង កាន់តែខ្លាំងឡើងបន្ថែមទៀត។
សារព័ត៌មានរុស្ស៊ី Sputnik បានចេញផ្សាយ កាលពីសប្ដាហ៍មុន (ថ្ងៃទី៤ ខែសីហា) ថា ក្រសួងការបរទេសចិន កាលពីឆ្នាំ២០២០ បានដាក់ទណ្ឌកម្មទៅលើក្រុមហ៊ុនលក់គ្រឿងសព្វាវុធធំៗរបស់សហរដ្ឋអាមេរិកជាច្រើន ដូចជា ក្រុមហ៊ុន Lockheed Martin ក្រោយពេលចិនដឹងថា រដ្ឋាភិបាលមុនរបស់លោក ដូណាល់ ត្រាំ ប្រធានាធិបតីសហរដ្ឋអាមេរិក បានអនុញ្ញាតឲ្យលក់អាវុធទំនើបៗដល់កោះតៃវ៉ាន់ ដែលមានតម្លៃ១,៨ពាន់លានដុល្លារអាមេរិក។
ភ្នាក់ងារសហប្រតិបត្ដិការសន្ដិសុខការពារជាតិរបស់មន្ទីរបញ្ចកោណ បានចេញសេចក្ដីប្រកាសព័ត៌មាន កាលពីថ្ងៃទី៤ ខែសីហា ឆ្នាំ២០២១ថា ក្រសួងការបរទេសសហរដ្ឋអាមេរិក បានអនុញ្ញាតឲ្យលក់អាវុធ មានតម្លៃ ៧៥០ដុល្លារសហរដ្ឋអាមេរិក ដល់ការិយាល័យតំណាងសេដ្ឋកិច្ច និងវប្បធម៌របស់រដ្ឋាភិបាលទីក្រុងតៃប៉ិ នៅលើទឹកដីសហរដ្ឋអាមេរិក (TECRO) នូវប្រព័ន្ធមីស៊ីលផ្លោងធុនមធ្យម ១០៥ មីល្លីម៉ែត្រ M109A6 រាប់សិបដើម និងសម្ភារពាក់ព័ន្ធដទៃទៀត។ ជាមួយគ្នានេះដែរ TECRO ក៏បានស្នើទិញគ្រឿងចម្បាំងជាច្រើនបន្ថែមទៀត រួមមាន យានសម្រាប់បំពាក់កាំភ្លើងយ័ន្ដ ប្រភេទ M9992A2 ចំនួន២០គ្រឿង, យានប្រភេទ M88A2 (M88A2 Hercules vehicles) ចំនួន៥គ្រឿង, ម៉ាស៊ីន M2 Chrysler ចំនួន៥គ្រឿង, កាំភ្លើងយ័ន្ត ចំនួន ៥០ដើម, កាំភ្លើងជម្រើសពហុមុខងារ ចំនួន ១ ៦៩៨ គ្រឿង និងប្រព័ន្ធទិន្នន័យយុទ្ធសាស្ត្រកាំភ្លើងធំដ៏ទំនើប ហៅកាត់ AFATDS ព្រមទាំងគ្រាប់មីស៊ីលនាំផ្លូវផ្សេងៗទៀត។
ក្រសួងការពារជាតិកោះតៃវ៉ាន់ បានសាទរដល់ការសម្រេចចិត្តរបស់រដ្ឋបាល លោក ចូ បៃដិន ប្រធានាធិបតីសហរដ្ឋអាមេរិក។ ទន្ទឹមគ្នានេះដែរ ក្រសួងការពារជាតិតៃវ៉ាន់ បានលើកឡើង នៅក្នុងបណ្ដាញសង្គមធ្វីធើរ ថា ការលក់សព្វាវុធទាំងនេះ អាចជួយឲ្យតៃវ៉ាន់ មានលទ្ធភាព អាចការពារខ្លួនឯងបាន ហើយក៏ការពារសន្ដិភាព និងស្ថិរភាព នៅក្នុងតំបន់ ថែមទៀតផង។
រដ្ឋាភិបាលទីក្រុងប៉េកាំង តែងតែចាត់ទុកកោះតៃវ៉ាន់ ជាអាណាខេត្តរបស់ខ្លួន។ រដ្ឋាភិបាលទីក្រុងប៉េកាំង គំរាមថា ចិននឹងលើកកងទ័ព ចូលលុកលុយដែនកោះនេះ នៅក្នុងពេលណាមួយ ប្រសិនបើទីក្រុងតៃប៉ិ ហ៊ានប្រកាសពីឯករាជភាពរបស់ខ្លួន ផ្ដាច់ចេញពីចិន។ លោក ស៊ី ជីនពីង ប្រធានាធិបតីចិន បានប្រកាសឲ្យកងទ័ពរំដោះប្រជាជនចិន ត្រៀមលក្ខណៈធ្វើសង្រ្គាមជានិច្ច។
ក្រោយការប្រកាសរបស់ប្រធានាធិបតីចិននោះ កងទ័ពរំដោះប្រជាជនចិន តែងតែបញ្ជូនយន្ដហោះ និងនាវាចម្បាំងជាច្រើនគ្រឿង ហោះ និងបើកចូល រំលោភលើដែនអាកាសរបស់កោះតៃវ៉ាន់ ជាញឹកញាប់។ លើសពីនេះទៅទៀត ចិនតែងគំរាមដល់បណ្ដាប្រទេសណា ដែលហ៊ានលូកដៃចូល ជួយដល់កោះតៃវ៉ាន់។
បើទោះជាមានការគំរាមកំហែងបែបនេះក្ដី លោកស្រី សៃ អ៊ីងវ៉ិន (Tsai Ing-Wen) ប្រធានាធិបតីកោះតៃវ៉ាន់ អះអាងថា លោកស្រីត្រូវតែការពារដែនកោះមួយនេះឲ្យខាងតែបាន មិនឲ្យដែនកោះនេះ ធ្លាក់ទៅក្រោមការត្រួតត្រារបស់ចិននោះឡើយ។
លោកស្រីប្រធានាធិបតីកោះតៃវ៉ាន់ បានបញ្ជាក់យ៉ាងច្បាស់ថា ទោះជាត្រូវចំណាយទំហំប៉ុនណា ហើយបូជាពលីកម្មយ៉ាងណាក៏ដោយ ដាច់ខាតត្រូវតែការពារដែនកោះនេះឲ្យបាន។ តៃវ៉ាន់ មានគ្រឿងសព្វាវុធគ្រប់គ្រាន់ សម្រាប់ធ្វើសឹកសង្គ្រាមជាមួយនឹងចិន។ រហូតមកដល់ពេលនេះ រដ្ឋាភិបាលទីក្រុងតៃប៉ិ បានចំណាយលុយជាច្រើនពាន់លានដុល្លារសហរដ្ឋអាមេរិក ទិញយន្ដហោះចម្បាំងទំនើបៗ និងប្រព័ន្ធការពារ ព្រមទាំងគ្រឿងសឹកជាច្រើនទៀត ពីសហរដ្ឋអាមេរិក៕
