រដ្ឋធានីវ៉ាស៊ីនតោន៖ ថ្វីបើបច្ចុប្បន្ននេះ សហរដ្ឋអាមេរិក កំពុងតែផ្ទុះការឆ្លងកូវីដ-១៩ខ្លាំងជាថ្មីឡើងវិញក្ដី ប៉ុន្ដែទីផ្សារការងារ នៅក្នុងប្រទេសមហាអំណាចលេខ១របស់ពិភពលោក ទាំងសេដ្ឋកិច្ច និងយោធានេះ កំពុងតែងើបទៅរកភាពល្អប្រសើរឡើងវិញ ដោយបន្ថែមការងារ ចំនួន ៩៤៣ ០០០កន្លែង។
សារព័ត៌មាន The Washington Post បានផ្សាយថា សេដ្ឋកិច្ចសហរដ្ឋអាមេរិក បានបន្ថែមការងារ ៩៤៣ ០០០ នៅក្នុងខែកក្កដា ដោយសារការជួលកើនឡើង ហើយនិយោជកបានដំឡើងប្រាក់ឈ្នួល ដើម្បីទាក់ទាញដល់កម្មករបន្ថែមទៀតផង។ កំណើនការងារនេះ បានកើនឡើង ក្នុងរយៈពេល២ខែជាប់ៗគ្នា ខណៈប្រទេសមហាអំណាចមួយនេះ បានពង្រីកការចាក់វ៉ាក់សាំង ដើម្បីធ្វើឲ្យសេដ្ឋកិច្ចដំណើរឡើងវិញ។
អត្រាអត់ការងារធ្វើ នៅក្នុងខែកក្កដា បានធ្លាក់ចុះពី ៥,៩ភាគរយ មកនៅ៥,៤ភាគរយ ដែលជាទំហំ នៃការធ្លាក់ចុះប្រចាំខែ។ អត្រាអត់ការងារធ្វើនេះ បានធ្លាក់ចុះ ចាប់តាំងពី៦,៣ភាគរយ ខណៈលោក ចូ បៃដិន ចូលកាន់តំណែងជាប្រធានាធិបតិសហរដ្ឋអាមេរិក កាលពីអំឡុងខែកុម្ភៈ ឆ្នាំ២០២០។
ជាមួយគ្នានេះដែរ ទាំងអ្នកសេដ្ឋវិទូ មេដឹកនាំនយោបាយ ស្ថាប័ននីតិប្រតិបត្ដិ និងអ្នកពាក់ព័ន្ធជាច្រើនទៀត កំពុងតែសម្លឹងមើលយ៉ាងយកចិត្តទុកដាក់ទៅលើសេដ្ឋកិច្ច កំពុងចាប់ផ្ដើមដំណើរការ ពីពេលនេះ។ នៅក្នុងខែមិថុនា និងខែកក្កដា សម្រាប់ពីរខែជាប់ៗគ្នានេះ បានបន្ថែមការងារជិត១លាន ខណៈទីផ្សារការងារកំពុងតែងើបឡើងវិញ។ ស្របគ្នានេះ និយោជក ក៏បានដំឡើងប្រាក់ឈ្នួលបន្ថែមទៀត ដើម្បីទាក់ទាញកម្លាំងពលកម្លាំងផងដែរ៕
