រដ្ឋធានីវ៉ាស៊ីនតោន៖ ក្រុមហ៊ុនផលិតទូរស័ព្ទដ៏ធំមួយរបស់សហរដ្ឋអាមេរិក បានប្រកាសថា ខ្លួនបានបង្កើតប្រព័ន្ធបច្ចេកវិទ្យាដ៏ទំនើបថ្មីមួយ ដែលអាចឲ្យទូរស័ព្ទ iPhone ស្កែនរូបភាព អំពីសកម្មភាពចាប់រំលោភផ្លូវភេទទៅលើកុមារ។
សារព័ត៌មាន BBC ចេញផ្សាយ នៅថ្ងៃទី៦ ខែសីហា ឆ្នាំ២០២១ ថា ក្រុមហ៊ុន Apple បានប្រកាសលម្អិត អំពីប្រព័ន្ធថ្មីនេះ ដើម្បីស្វែងរកសម្ភាររំលោភផ្លូវភេទទៅលើកុមារ (CSAM) នៅលើទូរស័ព្ទរបស់អតិថិជន។ បច្ចេកវិទ្យាថ្មីនេះ នឹងជួយស្រាវជ្រាវ (Search) តាមកម្មវិធី CSAM នេះ។
ក្រុមហ៊ុន Apple បានបញ្ជាក់ថា ប្រសិនបើវាស្វែងរកឃើញហើយនោះ មនុស្សនឹងវាយតម្លៃបាន ហើយរាយការណ៍ទៅប៉ូលិសតែម្ដង។ ទោះជាយ៉ាងណា គេនៅតែមានការព្រួយបារម្ភ អំពីសិទ្ធិឯកជនរបស់បុគ្គល ដែលបច្ចេកវិទ្យានេះ អាចពង្រីកការស្កែនទៅលើគោលបំណងដែលត្រូវហាមឃាត់ ឬក៏ការថ្លែងខាងនយោបាយផងដែរ។
ក្រុមអ្នកជំនាញ ព្រួយបារម្ភថា បច្ចេកវិទ្យាដ៏ទំនើបថ្មីនេះ អាចជាឧបករណ៍មួយ សម្រាប់អាជ្ញាធររដ្ឋាភិបាល ប្រើប្រាស់ខាងចារកម្ម ដើម្បីតាមដាន អំពីសកម្មភាពរបស់ប្រជាពលរដ្ឋថែមទៀតផង។
ក្រុមហ៊ុន Apple បានបន្ថែមថា វឺសិនថ្មី (Version) នៃ iOS និង iPadOS នឹងត្រូវបញ្ចេញលក់ នៅចុងឆ្នាំនេះ។ ទូរស័ព្ទទាំងនេះ នឹងមាន Application ថ្មី សម្រាប់ជួយកំណត់ការពង្រីកការស្កែនអនឡាញ CSAM ខណៈកំពុងរចនា សម្រាប់ការប្រើប្រាស់ជាលក្ខណៈឯកជន។ ប្រព័ន្ធថ្មីនេះដំណើរការ ដោយប្រៀបធៀបរូបភាពទៅនឹងមូលដ្ឋានទិន្នន័យរូបភាពរំលោភបំពានផ្លូវភេទលើកុមារ ដែលត្រូវបានចងក្រង ដោយមជ្ឈមណ្ឌលជាតិ សម្រាប់ការបាត់ខ្លួន និងការកេងប្រវ័ញ្ចកុមារ (NCMEC) និងអង្គការសុវត្ថិភាពកុមារដទៃទៀត៕
