រាជធានីបាងកក៖ សារព័ត៌មាន The Nation បានផ្សាយ នៅថ្ងៃទី២៨ ខែមិថុនា ថា កម្មករខ្មែរជាង២០០នាក់ កាលពីថ្ងៃអាទិត្យ (ទី២៧ ខែមិថុនា) បានបង្ហាញវត្ដមាន នៅចំណុចឆែកឆេរជនអន្ដោប្រវេសន៍ Kab Cherng ស្ថិតក្នុងខេត្តសុរិន្ទ ក្នុងដំណើរវិលត្រឡប់ទៅកាន់ប្រទេសកំណើតរបស់ពួកគេវិញ ក្រោយពេលរដ្ឋាភិបាលថៃ បញ្ជាឲ្យបិទកន្លែងស្នាក់នៅក្នុងការដ្ឋានសំណង់ នៅទីក្រុងបាងកក និងខេត្តភាគខាងត្បូង ចំនួន៤ផ្សេងទៀត ក្រោមហេតុផលទប់ស្កាត់ជំងឺកូវីដ-១៩។
លោក ប្រាយុទ្ធ ចាន់អូចា (Prayut Chan-o-cha) នាយករដ្ឋមន្រ្ដីថៃ បានថ្លែង កាលពីថ្ងៃសុក្រ (ទី២៥ ខែមិថុនា) ខណៈធ្វើជាអធិបតី នៃកិច្ចប្រជុំរបស់មជ្ឈមណ្ឌលគ្រប់គ្រងស្ថានភាពកូវីដ-១៩ ថា លោកបានទាត់ចោលសំណើ សុំបិទទីក្រុងបាងកក និងតំបន់ជុំវិញ ក៏ដូចជា ខេត្តភាគខាងត្បូង ចំនួន៤ រួមមាន ខេត្ត Songkhla, Pattani, Yala និងខេត្ត Narathiwat ។ ប៉ុន្តែផ្ទុយទៅវិញ លោកនាយករដ្ឋមន្រ្ដី បានបញ្ជាឲ្យបិទការដ្ឋានសាងសង់ ចាប់ពីពីថ្ងៃចន្ទ ទី២៨ ខែមិថុនា តទៅ ខណៈមានសេចក្ដីរាយការណ៍ពីការឆ្លង ក្នុងរយៈពេលមួយខែ។
លោកនាយករដ្ឋមន្រ្ដី ប្រាយុទ្ធ បានបញ្ជាក់ថា ក្រសួងការងារគួរតែសងសំណង់ដល់ផលប៉ះពាល់ដល់កម្មករទាំងនោះ ទាំងជនជាតិថៃ និងជនអន្ដោប្រវេសន៍ ពាក់ព័ន្ធនឹងករណីនេះ។
មន្រ្ដីប្រចាំការនៅចំណុចត្រួតពិនិត្យ បានបញ្ជាក់ថា ក្រោយពេលមានបទបញ្ជាពីនាយករដ្ឋមន្រ្ដីថៃ នោះមក និយោជិតរបស់កម្មករទាំងនោះគួរតែនាំពួកគេ តាមរថយន្ដ ដឹកទៅកាន់ប៉ុស្ដិ៍ត្រួតពិនិត្យ។ រីឯមន្រ្ដីព្រំដែនត្រូវតែបង្កើនល្បឿន ដោះស្រាយបញ្ហានេះ ដើម្បីកាត់បន្ថយនូវការកកស្ទះ នៅតាមចំណុចត្រួតពិនិត្យ ដែលអាចបង្កឲ្យមានគ្រោះថ្នាក់ ពីការឆ្លងកូវីដ-១៩ នៅក្នុងខេត្ត។
មន្រ្ដីប្រចាំការប៉ុស្ដិ៍ត្រួតពិនិត្យ បានបន្ដថា «កម្មករដែលកំពុងរង់ចាំឆ្លងដែន ត្រូវបានគេបញ្ជាឱ្យរក្សាយ៉ាងតឹងរឹង នៅឯប៉ុស្តិ៍ត្រួតពិនិត្យ និងចៀសវាងការធ្វើដំណើរវង្វេងទៅកាន់សហគមន៍ ឬផ្សារក្បែរនោះ ដើម្បីការពារការរីករាលដាល នៃមេរោគ។ ទោះជាយ៉ាងណា រហូតមកដល់ពេលនេះ មន្រ្ដីអន្ដោប្រវេសន៍ជាច្រើននាក់ ប្រចាំការនៅប៉ុស្ដិ៍ត្រួតពិនិត្យ Kab Cherng បានរកឃើញឆ្លងកូវីដ-១៩ បើទោះជាមានវិធានការយ៉ាងតឹងរឹង គ្រប់គ្រងជំងឺកូវីដ-១៩យ៉ាងណាក៏ដោយ៕
