រដ្ឋធានីសេអ៊ូល៖ កងទ័ពជើងអាកាសនារីរបស់កូរ៉េខាងត្បូងម្នាក់ បានធ្វើអត្ដឃាត ក្រោយពេលមានសេចក្ដីរាយការណ៍ថា នាងត្រូវបានសហសេវិករបស់នាងម្នាក់ បានចាប់នាងរំលោភ ហើយក្រុមគ្រួសាររបស់នាង នៅថ្ងៃចន្ទ (ទី២៨ ខែមិថុនា) បានអំពាវនាវឱ្យរដ្ឋសភាទទួលយកការស៊ើបអង្កេត លើករណីឧក្រិដ្ឋកម្មផ្លូវភេទ ពីក្រសួងការពារជាតិ យកទៅចាត់ការបន្ដ។
សារព័ត៌មានកូរ៉េខាងត្បូង (The Korea Herald) បានផ្សាយ នៅថ្ងៃទី២៨ ខែមិថុនា ថា គ្រួសាររបស់នារីរងគ្រោះជឿថា កងទ័ពអាកាស មិនបានស៊ើបអង្កេតឲ្យបានល្អិតល្អន់ ក្រោយពេលជនរងគ្រោះ បានដាក់ពាក្យបណ្ដឹង កាលពីថ្ងៃទី២ ខែមីនា ឆ្នាំ២០២១ ជុំវិញរឿងរ៉ាវដែលបានកើតឡើង។ ក្រុមគ្រួសារ នៅតែមានការសង័្សយ ចំពោះការស៊ើបអង្កេតរបស់ក្រសួងការពារជាតិ ដែលបានយកករណីនេះ ចេញពីកងទ័ពអាកាស ក្រោយពេលនាងត្រូវបានគេរកឃើញថាស្លាប់ ដោយសារការធ្វើអត្ដឃាត កាលពីថ្ងៃទី២២ ខែឧសភា។
ឪពុករបស់ជនរងគ្រោះ បានថ្លែង នៅក្នុងសន្និសីទកាសែតដំបូងរបស់គាត់ នៅក្នុងមន្ទីរពេទ្យយោធា នៅទីក្រុង Seongnam ខេត្ត Gyeonggi ប្រទេសកូរ៉េខាងត្បូង ថា យើងមិនមានអារម្មណ៍ថា ក្រសួងការពារជាតិ បានបំពេញភារកិច្ចនេះឲ្យពេញលេញនោះទេ។ ក្រសួងកំពុងតែរៀបចំរុញការងារគ្រប់យ៉ាងទៅឲ្យគណៈកម្មាធិការស៊ីវិល។ តើនេះជាអ្វីដែលក្រសួងចង់ធ្វើឱ្យវែងឆ្ងាយឬ?
ឪពុករបស់ជនរងគ្រោះ បានបន្ដថា គាត់បានសំដៅទៅលើគណៈកម្មាធិការស៊ីវិល ដែលក្រសួង បានបង្កើតឡើង ដើម្បីផ្តល់ប្រឹក្សាដល់ព្រះរាជអាជ្ញាយោធា អំពីអ្វីដែលហៅថា ការស៊ើបអង្កេតប្រកបដោយតម្លាភាព។ គណៈកម្មាធិការដែលផ្តល់អនុសាសន៍ដល់ព្រះរាជអាជ្ញាគួរតែប្រឈមនឹងការកាត់ក្តី មើលទៅមិនមានភាពខ្លាំងក្លា ដូចពេលដែលមានការចោទប្រកាន់ពីបទឧក្រិដ្ឋ។
ក្រៅពីនេះ ឪពុករបស់ជនរងគ្រោះ ក៏បានចោទប្រកាន់ដល់មន្រ្ដីប៉េអឹម លើករណីនេះ បើទោះជារឿងរ៉ាវ ត្រូវបានផ្សព្វផ្សាយជាសាធារណៈ ក៏ពួកគេបានឆ្លើយតបយ៉ាងតិចតួចទៅនឹងបណ្តឹងដំបូង នៅក្នុងខែមីនា ប្រឆាំងនឹងជនជាប់ចោទឈ្មោះ Jang ដែលត្រូវបានចោទប្រកាន់ កាលពីមួយសប្តាហ៍មុន ពីបទរំលោភផ្លូវភេទទៅលើជនរងគ្រោះ និងគំរាមធ្វើបាបនាង។ ប្រសិនបើនាងផ្តល់សក្ខីកម្ម ឬស្នើសុំឱ្យអ្នកដទៃ ផ្តល់សក្ខីកម្មប្រឆាំងនឹងរូបគេ។
ការស៊ើបអង្កេតដំបូងបានរកឃើញថា ប៉េអឹមមិនអើពើនឹងភ័ស្តុតាង ប្រឆាំងនឹងជនជាប់ចោទ ឈ្មោះ Jang នោះទេ។ ប៉ុន្តែមន្រ្តីកងអាវុធហត្ថ ដែលបានចុះទៅដល់មូលដ្ឋានកងទ័ពរបស់នារីរងគ្រោះដំបូង ត្រូវបានចោទប្រកាន់ ពីបទមិនបំពេញភារកិច្ច។
ទោះជាយ៉ាងណា នៅថ្ងៃចន្ទ (ទី២៨ ខែមិថុនា) រដ្ឋអាជ្ញាក៏បានសង្កត់ធ្ងន់ទៅលើការចោទពីបទឧក្រិដ្ឋ ប្រឆាំងនឹងមេបញ្ជាការប៉េអឹម ដែលទៅពិនិត្យមូលដ្ឋានយោធារបស់ជនរងគ្រោះ។ មេបញ្ជាការប៉េអឹមរូបនោះ ត្រូវគេរំពឹងថា អាចប្រឈមនឹងការដាក់វិន័យតាមច្បាប់កងកម្លាំងផងដែរ។ ប៉ុន្ដែទីប្រឹក្សាស៊ីវិលរបស់គណៈកម្មាធិការនេះ បានទាមទារឲ្យនាំគាត់ទៅកាត់ទោសវិញ៕
