រាជធានីតូក្យូ៖ សារព័ត៌មាន The Wall Street Journal បានចេញផ្សាយ នៅថ្ងៃសុក្រ (ទី២៥ ខែមិថុនា ឆ្នាំ២០២១) ថា ម្ចាស់ភាគហ៊ុនរបស់ក្រុមហ៊ុន Toshiba បានបោះឆ្នោត ប្រឆាំងនឹងលោក Osamu Nagayama មិនឲ្យឈរឈ្មោះបោះឆ្នោត ជាប្រធានក្រុមហ៊ុនសាជាថ្មី។
ការបោះឆ្នោតបណ្ដេញប្រធានក្រុមហ៊ុន Toshiba Corp ចេញពីតំណែងនេះ បានកើតឡើង នៅក្នុងកិច្ចប្រជុំប្រចាំឆ្នាំរបស់ក្រុមហ៊ុន។ នេះជាព្រឹត្តិការណ៍ដ៏សំខាន់មួយ នៅក្នុងសកម្មភាពរបស់ម្ចាស់ភាគហ៊ុនក្រុមហ៊ុនជប៉ុនមួយនវ ដែលបានធ្វើឱ្យមានភាពចលាចលដល់កិច្ចសហប្រតិបត្តិការ រវាងការគ្រប់គ្រងរបស់ក្រុមហ៊ុន Toshiba និងរដ្ឋាភិបាល ដើម្បីរារាំងវិនិយោគិនបរទេស។
ការបញ្ចប់មុខតំណែងរបស់លោក Osamu Nagayama ដែលជាសរសរគ្រឹះដ៏យូរអង្វែង នៃពិភពសាជីវកម្មរបស់ជប៉ុនមួយនេះ ទំនងជាធ្វើឱ្យវិនិយោគិនបរទេសដទៃទៀត ជំរុញឱ្យមានការផ្លាស់ប្តូរម្ចាស់ភាគហ៊ុន ដែលមានភាគហ៊ុន នៅក្រុមហ៊ុនធំៗរបស់ជប៉ុន។ Toshiba ជាក្រុមហ៊ុនឧស្សាហកម្មដ៏ធំ ដែលត្រូវបានបង្កើតឡើង តាំងពីឆ្នាំ១៨៧៥ បានទប់ទល់នឹងការអំពាវនាវរបស់វិនិយោគិនបរទេស ជំរុញឱ្យលក់ ដែលអាចនាំឱ្យផ្នែកខ្លះ នៃក្រុមហ៊ុន ត្រូវបែកបាក់។
ដោយឡែកដើមចមជាបន្ទាន់ នៃការជ្រួលច្របល់របស់វិនិយោគិននេះ ត្រូវបានចេញ នៅក្នុងរបាយការណ៍មួយ ហើយបានចេញផ្សាយ កាលពីថ្ងៃទី១០ ខែមិថុនា ដោយរកឃើញថា នាយកប្រតិបត្តិក្រុមហ៊ុន Toshiba និងសមាជិកក្រុមប្រឹក្សាភិបាលមួយចំនួន បានធ្វើការជាមួយនឹងមន្រ្តីនានា នៃក្រសួងសេដ្ឋកិច្ច ពាណិជ្ជកម្ម និងឧស្សាហកម្ម ដើម្បីរារាំងសំណើរបស់ម្ចាស់ភាគហ៊ុនបរទេស។
នៅក្នុងកិច្ចប្រជុំប្រចាំឆ្នាំរបស់ក្រុមហ៊ុន Toshiba នៅថ្ងៃសុក្រ (ទី២៥ ខែមិថុនា) នេះ ម្ចាស់ភាគហ៊ុនជាច្រើន បានរិះគន់ដល់ក្រុមហ៊ុន ចំពោះរបាយការណ៍នេះ ហើយថា លោក Nagayama មិនសមនឹងទទួលបានឱកាស កាន់តំណែងនេះបន្ដទៀតទេ។ ម្ចាស់ភាគហ៊ុនម្នាក់ បាននិយាយថា ក្រុមប្រឹក្សាភិបាលមិនបានដំណោះស្រាយបញ្ហានានា ខណៈគណៈកម្មាធិការសវនកម្មរបស់ក្រុមហ៊ុន កាលពីខែកុម្ភៈ បានធ្វើសេចក្ដីសន្និដ្ឋាន បន្ទាប់ពីការស៊ើបអង្កេតដ៏ខ្លីមួយថា មិនមានសម្ពាធខ្លាំង ចំពោះម្ចាស់ភាគហ៊ុនបរទេសឡើយ៕