រាជធានីភ្នំពេញ ៖ ប្រិយមិត្តប្រាកដជាបានស្គាល់រួចមកហើយពីលោក អាចារ្យ ធំ ដែលតែងតែលេចមុខនៅលើបណ្តាញសង្គមហ្វេសប៊ុក ជាពិសេសគឺលោកជាម្ចាស់ ផ្ទះកាហ្វេវប្បធម៌ ខណៈពេលថ្មីៗមកនេះដោយសារតែបញ្ហានៃការធ្លាក់ចុះនូវចំនួនភ្ញៀវទេសចរណ៍ ទាំងក្នុងស្រុក និងក្រៅស្រុក ជាពិសេសតំបន់ដែលធ្លាប់តែទទួលកម្រៃពីភ្ញៀវទេសចរណ៍ ដូចជាខេត្តសៀមរាប បានធ្វើឲ្យរូបលោកហាក់ជួបប្រទះកង្វះខាតលុយកាក់ជាខ្លាំងរហូតបណ្តាលចិត្តឲ្យលោកសម្រេចធ្វើការ សេងហាងជាបន្ទាន់ដើម្បីដោះស្រាយជីវភាព។
លោកអាចារ្យ ធំ បានលើកឡើងថា «ដំណឹង សេងហាង ដេីម្បីដោះបំណុល! ខ្ញុំបាទ អាចារ្យធំ សូមប្រកាស សេងទីតាំងផ្ទាល់ ផ្ទះកាហ្វេវប្បធម៌ ខេត្តសៀមរាប អាសយដ្ឋាន៖ ភូមិទ្រាំង សង្កាត់ស្លក្រាម ក្រុងសៀមរាប។ ទម្រាំដាច់ចិត្ត ផុស ខ្ញុំប្រឹងរកអស់លទ្ធភាពហេីយ! លុយប៉ុណ្ណេះមេីលទៅដូចមិនច្រេីនប៉ុន្មានទេ តែសម្រាប់ខ្ញុំពេលនេះ គឺហាក់ទូលភ្នំ។ ទាល់ច្រក អស់លទ្ធភាពបន្តហេីយបងប្អូន ខ្ញុំសូមជម្រាបលាទាំងអាល័យ»៕
