រាជធានីបាងកក៖ អ្នកវិទ្យាសាស្រ្ដផ្នែករោគវិទ្យាដ៏ល្បីល្បាញរបស់ប្រទេសថៃ បានព្យាករថា ការរាតត្បាតពីជំងឺកូវីដ-១៩ នៅតំបន់សណ្ដ ជំរុញឲ្យមានការចាក់វ៉ាក់សាំងបង្ការកូវីដ-១៩កាន់តែលឿន ជាងតំបន់ផ្សេងៗទៀត។
សារព័ត៌មាន The Nation បានផ្សាយថា លោកវេជ្ជបណ្ឌិត Yong Poovorawan រោគវិទូដ៏ល្បីល្បាញរបស់ប្រទេសថៃ នៅថ្ងៃទី២៣ ខែមិថុនា បានជំរុញឲ្យរដ្ឋាភិបាល បង្កើនការចាក់វ៉ាក់សាំងបង្ការកូវីដ-១៩ ជូនដល់ប្រជាពលរដ្ឋឲ្យបានច្រើន តាមតែអាចធ្វើទៅបាន ដើម្បីការពារនូវការផ្ទុះឡើង នៃវីរុសផ្សេងៗទៀត នៅតំបន់ដីសណ្ដ។
អ្នកជំនាញខាងមេរោគរូបនេះ បានដកស្រង់ការសិក្សាស្រាវជ្រាវរបស់នាយកដ្ឋានវិទ្យាសាស្ត្រវេជ្ជសាស្ត្រ ហើយសរសេរ នៅលើហ្វេសប៊ុករបស់លោក ថា ៩០ភាគរយ នៃការឆ្លងវីរុសកូវីដ-១៩ នៅក្នុងប្រទេសថៃ គឺចេញមកពីវីរុស (Alpha Strain)។
ទោះជាយ៉ាងណា អ្នកជំនាញរូបនេះ បានព្យាករថា ចំនួន នៃការឆ្លងវីរុស នៅតំបន់ដីសណ្ដ បានរកឃើញច្រើន ក្នុងចំណោមកម្មករវ័យក្មេង ដែលនឹងកើនឡើងជាបន្ដបន្ទាប់ ក្នុងរយៈពេល៣ទៅ៤ខែខាងមុខនេះ។ ផ្ទុយទៅវិញ ការផ្ដល់វ៉ាក់សាំងបង្ការកូវីដ-១៩ នាពេលបច្ចុប្បន្ន នៅក្នុងប្រទេសថៃ ក៏ជាវិធីសាស្រ្ដដ៏ល្អតែមួយគត់ ទប់ទល់ប្រឆាំងនឹងវីរុស (The Alpha Strain)។
អ្នកជំនាញខាងវីរុសរូបនេះ បានបញ្ជាក់ទៀតថា «វាជាការចាំបាច់ណាស់ ត្រូវតាមដាន ពីការរីករាលដាល នៃវីរុសនីមួយ ដើម្បីធ្វើឲ្យការគ្រប់គ្រងជំងឺកាន់តែប្រសើរឡើង។ រីឯវីរុសកូនកាត់ (វីរុសបម្លែងខ្លួន) ជាច្រើនទៀត អាចនឹងកើតឡើង នៅក្នុងពេលអនាគត។ យើងជឿថា វ៉ាក់សាំងបង្ការកូវីដ-១៩ប្រភេទថ្មីជាច្រើនទៀត ក៏នឹងត្រូវបានបង្កើតឡើង នៅឆ្នាំក្រោយ ដើម្បីដោះស្រាយជាមួយនឹងវីរុសបម្លែងខ្លួនផ្សេងៗទៀតផងដែរ៕
