រដ្ឋធានីម៉ានីល៖ ស្របពេលបណ្ដាប្រទេសនានា កំពុងតែបង្កើនការចាក់វ៉ាក់សាំងបង្ការកូវីដ-១៩ ប្រធានាធិបតីហ្វីលីពីន បានជេរបញ្ចោរដល់អ្នកមិនព្រមទទួលការចាក់វ៉ាក់សាំង ហើយថែមទាំងគំរាមចាប់ដាក់គុកបន្ថែមទៀត។ នេះបើតាមសារព័ត៌មាន The Nation ចេញផ្សាយ នៅថ្ងៃទី២៣ ខែមិថុនា។
លោក Rodrigo Duterte ប្រធានាធិបតីហ្វីលីពីន បានថ្លែង តាមបណ្ដាញទូរទស្សន៍ជាតិប្រចាំសប្ដាហ៍ កាលពីថ្ងៃទី២១ ខែមិថុនា ថា «កុំឱ្យខ្ញុំខុស។ បច្ចុប្បន្នប្រទេសហ្វីលីពីន កំពុងប្រឈមមុខនឹងវិបត្ដិកូវីដ-១៩ ហើយប្រទេសជាតិកំពុងតែមានអាសន្ន។ ប្រសិនបើអ្នកណាមិនព្រមចាក់វ៉ាក់សាំងបង្ការកូវីដ-១៩ ខ្ញុំនឹងបញ្ជាឲ្យអាជ្ញាធរចាប់ខ្លួនអ្នកនោះដាក់គុក ហើយវ៉ាក់សាំងនេះនឹងត្រូវចាក់បញ្ចូលតាមគូទរបស់អ្នកទាំងនោះ។
លោក Rodrigo Duterte ត្រូវបានគេចាត់ទុកជាបុរសខ្លាំង ក្នុងការបង្រ្កាប និងសម្លាប់អ្នករត់ពន្ធគ្រឿងញៀន នៅក្នុងប្រទេសហ្វីលីពីន។ ការបញ្ជាឲ្យសម្លាប់អ្នកពាក់ព័ន្ធនឹងគ្រឿងញៀន នៅតាមផ្លូវបែបនេះ នាំឲ្យមានការថ្កោលទោសយ៉ាងខ្លាំង ពីប្រទេសលោកខាងលើ។ ប៉ុន្ដែបច្ចុប្បន្ន លោក Rodrigo Duterte កំពុងតែជេរបញ្ចោរ និងបន្ដគំរាមកំហែងដល់ប្រជាពលរដ្ឋរបស់ខ្លួន ដែលមិនព្រមទទួលការចាក់វ៉ាក់សាំងបង្ការកូវីដ-១៩។
ការគំរាមកំហែងរបស់លោកប្រធានាធិបតីហ្វីលីពីនរូបនេះ បានកើតឡើង ក្រោយពេលការផ្គត់ផ្គង់វ៉ាក់សាំងរបស់ប្រទេស នៅតែមិនទាន់ឆ្លើយតបតាមតម្រូវការ ក្នុងរយៈពេល៣ខែមកនេះ ចាប់តាំងពីរដ្ឋាភិបាលបានចាប់ផ្តើម ចាក់ថ្នាំបង្ការបង្ការកូវីដទ្រង់ទ្រាយ កាលពីថ្ងៃទី២០ ខែមិថុនា។ រីឯអាជ្ញាធរសុខាភិបាលហ្វីលីពីន បានចាក់វ៉ាក់សាំងជូនដល់ប្រជាពលរដ្ឋ ជិត ២,២ លាននាក់ នៅក្នុងគោលដៅចំនួន៧០លាននាក់ ក្នុងចំណោមពលរដ្ឋហ្វីលីពីន សរុប១១០លាននាក់។
លោក Rodrigo Duterte ប្រធានាធិបតីហ្វីលីពីន បានបញ្ជាក់ថា «ខ្ញុំដឹងច្បាស់ថា ពលរដ្ឋហ្វីលីពីន មិនសប្បាយចិត្តនឹងរដ្ឋាភិបាល។ ប៉ុន្ដែយើងនៅទីនេះ យើងមិនចង់បានអ្វីច្រើន ក្រៅតែពីប្រទេសជាតិទទួលបានសេចក្ដីសុខនោះឡើយ»។
ជាមួយគ្នានេះ លោកប្រធានាធិបតី បានហៅអ្នកដែលមិនចាក់វ៉ាក់សាំងបង្ការកូវីដ-១៩ «ជាកូនមេសំផឹង» និង «ជាអ្នកបង្កភាពវឹកវរ» ដែលអាចចម្លងវីរុសកូវីដ-១៩។ រីឯអ្នកមិនចាក់វ៉ាក់សាំងបង្ការកូវីដ-១៩ លោកនឹងបញ្ជាឲ្យចាក់ថ្នាំជ្រូក «ivermectin» ។
គិតត្រឹមព្រឹក ថ្ងៃទី២៣ ខែមិថុនា ឆ្នាំ២០២១ ហ្វីលីពីន រកឃើញករណីឆ្លងថ្មី ជិត៤០០០នាក់ (៣ ៦៦៦នាក់) និងករណីស្លាប់ថ្មី៦០នាក់។ ហ្វីលីពីន មានអ្នកឆ្លងកូវីដ-១៩ សរុប ១ ៣៦៧ ៨៩៤នាក់ ហើយក្នុងនោះមានអ្នកជាសះស្បើយ ១ ២៩១ ៣៩៩នាក់ និងស្លាប់ ២៣ ៨០៩នាក់៕
