រដ្ឋធានីប៊ែរឡាំង៖ លោកស្រីអធិការបតីអាល្លឺម៉ង់ ក្រោយទទួលការចាក់វ៉ាក់សាំងបង្ការកូវីដ-១៩ AstraZeneca របស់អង់គ្លេស-ស៊ុយអែត នូវដូសទី១រួចហើយ លោកស្រីបានទទួលការចាក់វ៉ាក់សាំង Moderna របស់សហរដ្ឋអាមេរិក នូវដូសទី២។
អ្នកនាំពាក្យរដ្ឋាភិបាលអាល្លឹម៉ង់ បានថ្លែង កាលពីថ្ងៃអង្គារ (ទី២២ ខែមិថុនា) ថា លោកស្រីAngela Merkel អធិការបតីអាល្លឺម៉ង់ មានវ័យ៦៦ឆ្នាំ បានទទួលការចាក់វ៉ាក់សាំងបង្ការកូវីដ-១៩ Moderna លើកទី២របស់លោកស្រី ក្រោយពេលទទួលការចាក់វ៉ាក់សាំង AstraZeneca លើកទី១។
សារព័ត៌មាន Aljazeera បានផ្សាយ កាលពីថ្ងៃទី២២ ខែមិថុនា ថា លោកស្រីអធិការបតីវ័យ៦៦ឆ្នាំ បានទទួលការចាក់វ៉ាក់សាំងបង្ការកូវីដ-១៩ AstraZeneca លើកទី១របស់លោកស្រី កាលពីអំឡុងខែមេសា ឆ្នាំ២០២១ ហើយនៅពេលនេះ ទើបលោកស្រីបានទទួលការចាក់វ៉ាក់សាំង Moderna ដូសទី២របស់លោកស្រី។ រហូតមកដល់ពេលនេះ វ៉ាក់សាំង AstraZeneca រាប់លានដូស ត្រូវបានប្រើប្រាស់ប្រកបដោយសុវត្ថិភាព នៅក្នុងតំបន់អឺរ៉ុប។ ប៉ុន្ដែគេនៅមានការព្រួយបារម្ភ ចំពោះការកកឈាមដ៏កម្រមួយ ដែលត្រូវមើលឃើញ នៅក្នុងចំនួនអ្នកទទួលវ៉ាក់សាំងដ៏តិចតួចបំផុត។ នេះមានន័យថា មនុស្សមួយចំនួន នៅក្នុងក្រុមអាទិភាពដំបូង ដោយសារបញ្ហាអាយុ ឬសុខភាពរបស់ពួកគេមុនពេលចាក់វ៉ាក់សាំង ហើយលក្ខន្តិកៈនានា ត្រូវបានពន្យារពេល ក្នុងការទទួលការចាក់វ៉ាក់សាំង ដោយចង់រង់ចាំទទួលវ៉ាក់សាំងបង្ការផ្សេងៗទៀត។
មន្រ្ដីក្រសួងសុខាភិបាលអាល្លឺម៉ង់ បានផ្ដល់អនុសាសន៍ កាលពីអំឡុងខែមេសា ថា ពលរដ្ឋដែលទទួលការចាក់វ៉ាក់សាំងបង្ការកូវីដ-១៩ AstraZeneca នូវដូសទី១ហើយ ពួកគេអាចនឹងទទួលវ៉ាក់សាំងនូវដូសទី២ផ្សេងទៀត។ រីឯបណ្ដាប្រទេសនានា នៅតំបន់អឺរុប ក៏បានធ្វើស្រដៀងគ្នានេះដែរ។ ប៉ុន្ដែក្នុងរយៈពេលប៉ុន្មានសប្ដាហ៍កន្លងមកនេះ អាល្លឺម៉ង់បានបង្កើនល្បឿនចាក់វ៉ាក់សាំងយ៉ាងខ្លាំង។ គិតត្រឹម ថ្ងៃអង្គារ (ទី២២ ខែមិថុនា ឆ្នាំ២០២១) ពលរដ្ឋអាល្លឺម៉ង់ ប្រហែល៥១,២ភាគរយ បានទទួលវ៉ាក់សាំងបង្ការកូវីដ-១៩នូវដូសទី១របស់ពួកគេ។
ទោះជាយ៉ាងណា រហូតមកដល់ពេលនេះ មានចម្ងល់ជាច្រើនបានលើកឡើងថា ប្រសិនបើការចាក់វ៉ាក់សាំងបង្ការកូវីដ-១៩ AstraZeneca នូវដូសទី១រួចហើយ តើដូសទី២អាចចាក់វ៉ាក់សាំងផ្សេងបានដែរឬទេ?
ជាមួយនឹងចម្ងល់នេះ មានអ្នកជំនាញសុខាភិបាលជាច្រើនជឿថា ការចាក់វ៉ាក់សាំងបង្ការកូវីដ-១៩នូវដូសទី២ផ្សេង ពីវ៉ាក់សាំងដូសទី១ អាចជួយបង្កើនភាពស៊ាំទប់ទល់ ប្រឆាំងនឹងវីរុសកូវីដ-១៩ ហើយការសិក្សាផ្នែកវេជ្ជសាស្រ្ដផ្សេងៗទៀត កំពុងតែបន្ដដំណើការលើករណីនេះផងដែរ។ រីឯការសិក្សាតិចតួមួយរបស់ចក្រភពអង់គ្លេស ស្តីពីការប្រើវ៉ាក់សាំងកូវីដ-១៩ផ្សេងៗគ្នា ក្នុងការចាក់វ៉ាក់សាំង២ដូស បានរកឃើញថា អ្នកដែលទទួលវ៉ាក់សាំង Pfizer ហើយក្រោយមកទទួលការចាក់វ៉ាក់សាំង AstraZeneca ឬវ៉ាក់សាំងផ្សេងទៀត ត្រូវគេរាយការណ៍ថា រោគសញ្ញា ក្រោយការចាក់វ៉ាក់សាំង មានភាពស្រាល ឬមធ្យមតិចជាង អ្នកទទួលបានវ៉ាក់សាំងប្រភេទដូចគ្នាទាំង២ដូស៕