រាជធានីបាងកក៖ ដោយសារតែបច្ចុប្បន្នពិភពលោកទាំងមូលកំពុងប្រឈមមុខនឹងបញ្ហាបម្រែបម្រួលអាកាសធាតុកាន់តែខ្លាំងគួរឲ្យព្រួយបារម្ភ ទើបទាំងអ្នកវិទ្យាសាស្រ្ដ និងបណ្ដាមេដឹកនាំពិភពលោក ក៏កំពុងតែគិតគូរអំពីបរិស្ថាន ហើយជំរុញឲ្យកែច្នៃយានយន្ដ ឲ្យប្រើប្រាស់ចរន្ដអគ្គិសនី ហើយនៅពេលមុខ រថយន្ដប្រភេទនេះប្រហែលជាង១លានគ្រឿង នឹងចរាចរ នៅតាមដងផ្លូវនានា នៅក្នុងប្រទេសថៃ។
សារព័ត៌មាន The Nation បានផ្សាយ កាលពីថ្ងៃទី១៨ ខែមិថុនា ថា បើតាមការស្រាវជ្រាវរបស់ធនាគារ Krungthai បានឲ្យដឹងថា ចំនួនរថយន្ដអគ្គិសនី (EV) ប្រហែលជាង១លានគ្រឿង នឹងចរាចរ នៅតាមដងផ្លូវនានា នៅក្នុងប្រទេសថៃ នាឆ្នាំ២០២៨។
មជ្ឈមណ្ឌលស្រាវជ្រាវ Krungthai COMPASS បានបញ្ជាក់ថា ការព្យាករណ៍នេះផ្អែកទៅលើការលក់រថយន្ដអគ្គិសនី (EV) របស់ពិភពលោក ៣,២លានគ្រឿង ក្នុងឆ្នាំ២០២០ ដោយកើនឡើង៤៣ភាគរយ ចាប់ពីឆ្នាំ ២០១៩ ហើយលក់បាន ៣០ ០០០គ្រឿង នៅក្នុងប្រទេសថៃ ដោយកើនឡើង ចំនួន១៣ភាគរយ។
ការលក់រថយន្ដអគ្គិសនីកើនឡើងនេះ ក៏ដោយសារតែគោលនយោបាយរបស់រដ្ឋាភិបាលនានា នៅទូទាំងពិភពលោក ចង់បញ្ឈប់យានយន្តប្រើចំហេះខាងក្នុង (ICE) និងគាំទ្រដល់ក្រុមហ៊ុនផលិតរថយន្ដអគ្គិសនី (EV) និងអ្នកប្រើប្រាស់។ ជាមួយគ្នានេះ បណ្ដាក្រុមហ៊ុនផលិតរថយន្តល្បីៗនៅលើពិភពលោក ក៏កំពុងផ្លាស់ប្តូរវិលទៅរកទីផ្សាររថយន្ដអគ្គិសនី (EV) ដើម្បីបំពេញតាមតម្រូវការរបស់អ្នកប្រើប្រាស់ ដែលកំពុងតែកើនឡើង។ ជាលទ្ធផលនោះ Krungthai COMPASS បានប៉ាន់ប្រមាណថា ការប្រើប្រាស់យានយន្ដអគ្គិសនី នៅទូទាំងពិភពលោក នឹងកើនឡើង ចន្លោះពី២៥-៤៥ លានគ្រឿង នៅឆ្នាំ២០៣០ ខណៈបច្ចុប្បន្នកំពុងប្រើប្រាស់យានយន្ដអគ្គិសនី ចំនួន១០លានគ្រឿង។
ការព្យាករណ៍នេះ ជាដំណឹងដ៏ល្អមួយ សម្រាប់អ្នកបង្កើតគោលនយោបាយរបស់ប្រទេសថៃ ដែលមានគោលបំណងជំរុញឧស្សាហកម្មរថយន្តដែលមានស្រាប់ នៅក្នុងប្រទេសថៃ ឱ្យក្លាយជាមជ្ឈមណ្ឌលផលិតកម្មយានយន្ដអគ្គិសនី (EV) សម្រាប់បំពេញតម្រូវការ នៅក្នុងតំបន់។ រីឯនោរក្នុងប្រើប្រាស់រថយន្ដអគ្គិសនី នៅក្នុងប្រទេសថៃ នៅតែមានចំនួនតិច បើប្រៀបធៀបជាមួយនឹងបណ្ដាប្រទេសជាច្រើនទៀត ដោយការប្រើប្រាស់រថយន្ដអគ្គិសនី មានត្រឹមតែ១ភាគរយ (១៩០ ០០០ គ្រឿង) កំពុងចរាចរនៅលើដងផ្លូវ នៅក្នុងប្រទេសថៃ កាលពីឆ្នាំមុន។
ទោះជាយ៉ាងណា ក្រុមហ៊ុនផលិតរថយន្ដនានារបស់ជប៉ុន ដែលមានមូលដ្ឋាន នៅក្នុងប្រទេសថៃ បច្ចុប្បន្ន កំពុងសម្លឹងមើលទៅលើទីផ្សាយរថយន្ដកូនកាត់អគ្គិសនី ( Hybrid EV market)។ រីឯការផលិតរថយន្ដកូនកាត់ក្នុងស្រុក នឹងកើនឡើង ២៤ភាគរយ ក្នុងមួយឆ្នាំ ដោយជំរុញឲ្យការប្រើប្រាស់រថយន្ដអគ្គិសនីរបស់ជនជាតិថៃ កើនដល់១លានគ្រឿង នៅក្នុងឆ្នាំ២០២៨។
បើតាមការស្រាវជ្រាវដដែលនេះ បានបន្ថែមថា ការក្លាយជាមូលដ្ឋានផលិតកម្មរថយន្តកូនកាត់អគ្គិសនី (Hybrid Electric Vehicle Production) ក៏នឹងជួយរក្សាទីផ្សាររថយន្តប្រើចំហេះ (ICE) ក្នុងស្រុក និងបណ្តាញផ្គត់ផ្គង់ដែលពាក់ព័ន្ធ នៅក្នុងកម្រិតមធ្យមផងដែរ។ កត្ដាទាំងនេះនឹងជះឥទ្ធិពលជាវិជ្ជមានទៅលើក្រុមហ៊ុនផលិតអាគុយអគ្គិសនី, ក្រុមហ៊ុនផលិតគ្រឿងអេឡិចត្រូនិចនិងក្រុមហ៊ុនផលិតវត្ថុធាតុដើមកម្រិតស្រាល និងធ្ងន់ផងដែរ។
ទោះយ៉ាងណា Krungthai COMPASS បានព្រមានថា សមាមាត្រ នៃការបំភាយរបស់យានយន្ត (zero-emission) នឹងជះឥទ្ធិពលដោយផ្ទាល់ទៅលើក្រុមហ៊ុនផលិតគ្រឿងបន្លាស់របស់រថយន្ត ជាពិសេស ក្រុមហ៊ុនផលិតតួរថយន្ដ និងម៉ាស៊ីន ដែលជាទីផ្សារ មានតម្លៃជិត ៣០០ ពាន់លានបាតថៃ (៩ ៥៥៤ ៧៤៩ ៧៥០ដុល្លារអាមេរិក) ឬប្រហែល២០ភាគរយ នៃគ្រឿងបន្លាស់រថយន្ត៕
