រដ្ឋធានីព្យុងយ៉ាង៖ ក្រោយពេលបិទប្រទេស ទប់ស្កាត់វីរុសកូវីដ-១៩ និងរងទណ្ឌកម្មសេដ្ឋកិច្ចយ៉ាងធ្ងន់ធ្ងរ ពីអន្ដរជាតិ ហើយមិនអាចស្ដារសេដ្ឋកិច្ចបាន ធ្វើឲ្យមេដឹកកូរ៉េខាងជើង ចេញមុខមកទទួលស្គាល់ថា ប្រទេសកូរ៉េខាងជើង កំពុងតែប្រឈមមុខ នឹងបញ្ហាកង្វះខាតស្បៀងអាហារយ៉ាងធ្ងន់ធ្ងរបំផុត នាពេលនេះ។
សារព័ត៌មាន BBC បានចេញផ្សាយ នៅថ្ងៃទី១៧ ខែមិថុនា ថា លោក គីម ជុងអ៊ុន មេដឹកនាំកូរ៉េខាងជើង បានចេញមុខមកទទួលស្គាល់ជាផ្លូវការថា ប្រទេសរបស់លោក កំពុងប្រឈមមុខនឹងបញ្ហាខ្វះខាតស្បៀងអាហារយ៉ាងខ្លាំង។ នេះជាការចេញមុខមកទទួលស្គាល់ដ៏កម្ររបស់មេដឹកនាំកូរ៉េខាងជើង។
លោក គីម ជុងអ៊ុន បានថ្លែងទៅកាន់កិច្ចប្រជុំជាមួយមន្រ្ដីជាន់ខ្ពស់របស់កូរ៉េខាងជើងថា «ស្ថានភាពអាហាររបស់ប្រជាជន នាពេលនេះកំពុងតែខ្វះខាតខ្លាំង។ វិស័យកសិកម្មរបស់ប្រទេស មិនអាចបំពេញតាមតម្រូវការ ដែលបានកំណត់ ដោយសារព្យុះទីហ្វុង កាលពីឆ្នាំទៅ បណ្ដាលឲ្យមានទឹកជំនន់ជន់លិចផលដំណាំ។
សារព័ត៌មាន NK News បានរាយការណ៍ថា បច្ចុប្បន្ន តម្លៃម្ហូបអាហារ បានឡើងថ្លៃខ្ពស់។ សូម្បីតែផ្លែចេក គឺក្នុង១គីឡូក្រាមឡើងថ្លៃ រហូតដល់៤៥ដុល្លារសហរដ្ឋអាមេរិក។ អាជ្ញាធរកូរ៉េខាងជើង បានចាប់ផ្ដើមបិទព្រំដែនរបស់ខ្លួន ជាមួយនឹងប្រទេសចិន ចាប់តាំងពីការផ្ទុះឡើងជំងឺកូវីដ-១៩ដំបូងម៉្លេះ ដើម្បីទប់ស្កាត់ជំងឺដ៏កាចសាហាវនេះ។
សារព័ត៌មាន NK News បានបន្ដថា ពាណិជ្ជកម្មជាមួយប្រទេសចិន បានធ្លាក់ចុះខ្លាំង។ ប្រទេសកូរ៉េខាងជើង តែងពឹងផ្អែកទាំងស្រុងទៅលើប្រទេសចិន ទាំងម្ហូបអាហារ ជី និងប្រេងឥន្ធនៈ…ជាដើម។ បច្ចុប្បន្ន ប្រទេសកូរ៉េខាងជើង ក៏កំពុងប្រឈមនឹងការដាក់ទណ្ឌកម្មសេដ្ឋកិច្ច ពីអន្ដរជាតិ ដោយសារតែកម្មវិធីអាវុធមហាប្រល័យលោករបស់ប្រទេសផ្ដាច់ការមួយនេះ។
ជាមួយគ្នានេះដែរ មេដឹកនាំផ្តាច់ការ នៃប្រទេសដែលមានគណបក្សតែមួយ បាននិយាយ អំពីស្ថានភាពស្បៀងអាហារ នៅក្នុងគណៈកម្មាធិការកណ្តាលគណបក្សពលករ ដែលកំពុងកាន់អំណាច ដោយបានចាប់ផ្តើម នៅសប្តាហ៍នេះ នៅក្នុងរដ្ឋធានីព្យុងយ៉ាង។ នៅក្នុងអំឡុងកិច្ចប្រជុំនោះ លោក គីម ជុងអ៊ុន បានបញ្ជាក់ថា ទិន្នផលឧស្សាហកម្មជាតិ បានកើនឡើង មួយភាគបួន បើប្រៀបធៀបនឹងរយៈពេលដូចគ្នា កាលពីឆ្នាំមុន។
ទោះជាយ៉ាងណា មន្រ្ដីជាច្រើននាក់រំពឹងថា កូរ៉េខាងជើងនឹងពិភាក្សា អំពីទំនាក់ទំនងជាមួយអាមេរិក និងកូរ៉េខាងត្បូង នាពេលខាងមុខ។ ប៉ុន្ដែមន្រ្ដីកូរ៉េខាងជើង មិនបានបញ្ចេញព័ត៌មានលម្អិត នៅឡើយ។
ប្រទេសកូរ៉េខាងជើង ធ្លាប់ប្រឈមនឹងគ្រោះអត់ឃ្លានម្ដងរួចមកហើយ កាលពីអំឡុងទសវត្សរ៍១៩៩០ ខណៈសហភាពសូវៀតដូលរលំ ហើយបោះបង់កូរ៉េខាងជើងចោល ដោយមិនបានផ្គត់ផ្គង់ជំនួយសំខាន់ៗដល់ប្រទេសនេះ។ ចំនួនពលរដ្ឋកូរ៉េខាងជើង ដែលដាច់បាយស្លាប់ នាពេលនោះ មិនត្រូវបានគេរាយការណ៍ឲ្យដឹងនោះទេ។ ប៉ុន្ដែគេអាចបានប្រមាណថា គ្រោះទុរភិក្ស នៅក្នុងប្រទេសកូរ៉េខាងជើង នាពេលនោះអាចបណ្ដាលឲ្យប្រជាជនកូរ៉េខាងជើង រហូតដល់៣លាននាក់ស្លាប់៕