រាជធានីបាងកក៖ ក្រោយពេលបង្កើនការចាក់វ៉ាក់សាំងបង្ការកូវីដ-១៩ដល់ប្រជាពលរដ្ឋរបស់ខ្លួន មានចំនួនកើនឡើងយ៉ាងច្រើននោះមក នាយករដ្ឋមន្រ្ដីថៃ បានប្រកាសតាមបណ្ដាញទូរទស្សន៍ កាលពីល្ងាច ថ្ងៃទី១៦ ខែមិថុនា ថា ថៃនឹងបើកទ្វារដំណើរការប្រទេសរបស់ខ្លួនឡើងវិញ ក្នុងរយៈពេល៤ខែ។ នេះបើតាមសារព័ត៌មាន The Nation ចេញផ្សាយ កាលពីល្ងាច ថ្ងៃទី១៦ ខែមិថុនា។
លោក ប្រាយុទ្ធ ចាន់អូចា នាយករដ្ឋមន្រ្ដីថៃ បានបញ្ជាក់ថា «បច្ចុប្បន្នការចាក់វ៉ាក់សាំង នៅក្នុងប្រទេសរបស់យើងបានដំណើរទៅយ៉ាងលឿន ខ្ញុំចង់ផ្ដល់ព័ត៌មានដល់អ្នកទាំងអស់គ្នា អំពីផែនទីបង្ហាញផ្លូវ ចំពោះស្ថានភាពធូរស្រាលរបស់យើង ងើបឡើងវិញ ពីវិបត្ដិកូវីដ-១៩។ បច្ចុប្បន្ននេះ យើងកំពុងតែធ្វើការជាមួយនឹងក្រុមហ៊ុនផ្គត់ផ្គង់វ៉ាក់សាំង ចំនួន៦ រួមមាន ក្រុមហ៊ុនវ៉ាក់សាំង Pfizer, Johnson & Johnson, Moderna ក៏ដូចជា ក្រុមហ៊ុន AstraZeneca, Sinovac និង Sinopharm »។
លោកនាយករដ្ឋមន្រ្ដីថៃ បានបន្ដថា «បន្ថែមពីលើនេះ យើងក៏នឹងមានលទ្ធភាពធ្វើឲ្យមានសន្ដិសុខដល់ការផ្គត់ផ្គង់វ៉ាក់សាំងកាន់តែច្រើនឡើង។ បច្ចុប្បន្ន យើងមានវ៉ាក់សាំងបម្រុង និងចុះកិច្ចព្រមព្រៀង សម្រាប់វ៉ាក់សាំង ចំនួន១០៥,៥លានដូស នឹងត្រូវបញ្ជូនមកដល់ នៅក្នុងឆ្នាំនេះ ដែលនឹងអាចបំពេញ តាមគោលដៅរបស់យើង»។
លោកនាយករដ្ឋមន្រ្ដីថៃ បានបន្ដថា «យើងនឹងបន្ដស្វែងរកការផ្គត់ផ្គង់វ៉ាក់សាំងបន្ថែម នៅឆ្នាំក្រោយ។ ដោយផ្អែកលើគម្រោងជាច្រើន នាពេលបច្ចុប្បន្ន យើងនឹងផ្ដល់ការចាក់វ៉ាក់សាំងជាមធ្យម ជិត១០លានដូស ក្នុង១ខែ ចាប់ពីខែកក្កដា។ ដូច្នេះ នៅដើមខែតុលា ប្រជាពលរដ្ឋជិត៥០លាននាក់ នឹងទទួលបានវ៉ាក់សាំង យ៉ាងហោចណាស់ ក៏ដូសលើកទី១របស់ពួកគេផងដែរ»។
លោកនាយករដ្ឋមន្រ្ដីថៃ បានបន្ដថា «ខ្ញុំកំពុងកំណត់គោលរបស់យើង ដើម្បីប្រកាសថា ប្រទេសថៃបើកទ្វារប្រទេសដំណើរការពេញលេញ ក្នុងរយៈពេល១២០ថ្ងៃ ចាប់ពីថ្ងៃនេះតទៅ។ សម្រាប់គោលដៅរបស់អ្នកទេសចេរ ក៏ត្រូវបានរៀបចំរួចរាល់ហើយ សម្រាប់បើកឲ្យដំណើរបានឆាប់រហ័សបំផុត។ ជនបរទេស ដែលទទួលបានការចាក់វ៉ាក់សាំងរួចរាល់ហើយ នឹងអាចចូលមកកាន់ប្រទេសរបស់យើង ដោយមិនចាំបាច់ធ្វើចត្តាឡីស័ក ឬមានការរឹតត្បិតវិធានការអ្វីឡើយ។ ជាមួយគ្នានេះ ជនជាតិថៃ នៅក្រៅប្រទេស ដែលបានទទួលការចាក់វ៉ាក់សាំងរួចរាល់ហើយ ក៏អាចវិលត្រឡប់មកកាន់ប្រទេសកំណើត ដោយមិនចាំបាច់ធ្វើចត្ដាឡីស័ក»។
លោកនាយករដ្ឋមន្រ្ដី បានបន្ថែមទៀតថា «ខ្ញុំចង់ឲ្យគ្រប់ស្ថាប័នរបស់រដ្ឋាភិបាល និងអភិបាលខេត្តទាំងអស់ ត្រូវរៀបចំត្រៀមលក្ខណៈទាំងអស់ ដូច្នេះប្រជាពលរដ្ឋអាចវិលត្រឡប់ទៅរកស៊ីឡើងវិញ ក្នុងរយៈពេល១២០ថ្ងៃ។ ការបើកដំណើរការប្រទេសឡើងវិញនេះ ខ្ញុំរំពឹងថា ការគ្រប់គ្រងប្រកបដោយប្រសិទ្ធភាព សម្រាប់កម្មវិធីចាក់វ៉ាក់សាំងរបស់យើង។
លោកនាយករដ្ឋមន្រ្ដីថៃ បានបន្ថែមថា «បច្ចុប្បន្ន ទាំងសិង្ហបុរី និងតៃវ៉ាន់ បានទទួលស្គាល់ថា ការទិញវ៉ាក់សាំងបង្ការកូវីដ-១៩ មកពីបណ្ដាក្រុមហ៊ុនអន្ដរជាតិ គឺជាបញ្ហាប្រឈមដ៏ធំបំផុតរបស់ប្រទេសទាំងនេះ ក្នុងការគ្រប់គ្រងស្ថានភាពកូវីដ-១៩។ ប្រទេសទាំងនេះធ្វើអ៊ីចឹងដែរ ដូចយើង បានសម្រេចចិត្តផលិតវ៉ាក់សាំង ដោយខ្លួនឯង។ ការផលិតវ៉ាក់សាំងរបស់យើង ជាដំណោះស្រាយ រយៈពេលវែង ហើយវាជាដំណោះស្រាយតែមួយ ដែលយើងបានសម្រេចចិត្តអស់រយៈជាង១ឆ្នាំកន្លងមកហើយ។ នេះជាការសម្រេចចិត្តដ៏ត្រឹមត្រូវ ហើយខ្ញុំ ក៏អាចគិតឡើងវិញ ក្នុងនាមជាតំណាងឲ្យប្រទេសជាតិ។ រីឯអ្នកជំនាញផ្សេងៗទៀតរបស់យើង ក៏បានផ្ដល់អនុសាសន៍ពីទិសដៅនោះ សម្រាប់ប្រទេសរបស់យើងផងដែរ»៕