រដ្ឋធានីញូវដេលី៖ បុរសម្នាក់មានប្រពន្ធ៣៩នាក់ និងកូន៩៤នាក់ ហើយចៅ៧៦នាក់ កើតជំងឺទឹកនោមផ្អែម និងលើសឈាម ហើយបាត់បង់ជីវិត ក្នុងវ័យ៧៦ឆ្នាំ កាលពីថ្ងៃទី១៣ ខែមិថុនា នៅក្នុងរដ្ឋ Mizoram នាភាគឦសាន ប្រទេសឥណ្ឌា។
លោក Zionnghaka Chana ជាប្រធាននិកាយសាសនាមួយ ដែលគេហៅថា «Mizoram Mormons» ។ និកាយសាសនាគ្រីស្ដដ៏តូចមួយនេះ ត្រូវបានបង្កើតឡើង ដោយជីតារបស់គាត់ ឈ្មោះ Khuangtuaha នៅក្នុងឆ្នាំ១៩៤២ ដែលគេស្គាល់តាមប្រពៃណីពហុពន្ធភាព។
អស់រយៈពេលជាច្រើនឆ្នាំកន្លងមកហើយ លោក Chana និងភូមិរបស់គាត់ ឈ្មោះ Baktawng Tlangnuam បានក្លាយទីទាក់ទាញអ្នកទេសចរ ដោយសារតែចរនាសម្ព័ន្ធមិនតាមប្រពៃណីរបស់គ្រួសារនេះ និងការរៀបចំជីវភាពប្រចាំថ្ងៃរបស់ពួកគេ គួរឲ្យចាប់អារម្មណ៍។
បើតាមសារព័ត៌មាន Wionews បានរាយការណ៍ថា ប្រធានរដ្ឋ Mizoram របស់ឥណ្ឌា បានបញ្ជាក់ថា លោក Chana បានបាត់បង់ជីវិត ដោយសារពាក់ព័ន្ធនឹងជំងឺទឹកនោមផ្អែម និងជំងឺលើសឈាម។ បុរសរូបនេះ បានលាចាកលោក នៅវេលាម៉ោង៣រសៀល ថ្ងៃអាទិត្យ ទី១៣ ខែមិថុនា ឆ្នាំ២០២១ នៅមន្ទីរពេទ្យឯកជន ស្ថិតក្នុងទីក្រុង Aizawl រដ្ឋ Mizoram ភាគឦសាន ប្រទេសឥណ្ឌា។
លោកវេជ្ជបណ្ឌិត Lalrintluanga Zahau នាយកមន្ទីរពេទ្យ Trinity ស្ថិតក្នុងទីក្រុង Aizawl បានប្រាប់ដល់សារព័ត៌មាន Press Trust of India ថា លោក Zionnghaka Chana បានកើតជំងឺទឹកនោមផ្អែម និងសម្ពាធឈាមឡើងខ្លាំង។ គាត់បានទទួលការព្យាបាល នៅក្នុងផ្ទះរបស់គាត់ នៅក្នុងភូមិ Baktawng អស់រយៈពេល៣ថ្ងៃកន្លងមកហើយ។ ប៉ុន្ដែស្ថានភាពជំងឺរបស់គាត់កាន់តែធ្ងន់ឡើងៗ ទើបគេបញ្ជូនគាត់មកកាន់មន្ទីរពេទ្យ ជាកន្លែងដែលក្រុមគ្រូពេទ្យ បានប្រកាសពីការស្លាប់របស់គាត់»។
លោក Chana (Zionnghaka Chana) ជាប្រធាននិកាយសាសនា បានកើត នៅក្នុងឆ្នាំ១៩៤៥។ គាត់បានរៀបការជាមួយប្រពន្ធទី១របស់គាត់ ឈ្មោះ Zathiangi ខណៈគាត់មានអាយុ១៧ឆ្នាំ ហើយគាត់បានរៀបការប្រពន្ធចុងក្រោយរបស់គាត់ នៅក្នុងឆ្នាំ២០០៤។ គ្រួសារដ៏ធំនេះរស់នៅក្នុងផ្ទះអគារ៤ជាន់ ដែលគេហៅថា «Chhuan Thar Run» ឬ «ផ្ទះជំនាន់ថ្មី»។ លំនៅឋានរបស់បុរសមានប្រពន្ធ៣៩នាក់នេះ ស្ថិតនៅចម្ងាយប្រហែល៧០គីឡូម៉ែត្រ ពីទីក្រុង Aizawl រដ្ឋ Mizoram ភាគឦសាន ប្រទេសឥណ្ឌា។
លោក Chana (Zionnghaka Chana) មានបន្ទប់ដេកមួយ នៅជាន់ផ្ទាល់ដី នៃអគារ Chhuan Thar Run ជាកន្លែងដែលគាត់អាចទៅដេកជាមួយប្រពន្ធជាច្រើននាក់របស់គាត់។ ដោយឡែកប្រពន្ធរបស់គាត់ទាំងអស់នោះ បានធ្វើការងារតាមតួនាទី ដើម្បីសម្រេចថា តើការងារណាដែលត្រូវធ្វើ។
លោក Chana (Zionnghaka Chana) បានប្រាប់ដល់សារព័ត៌មាន The Mirror កាលពីអំឡុងឆ្នាំ២០១២ថា «ខ្ញុំគិតថា ខ្លួនខ្ញុំជាបុរសសំណាងម្នាក់ ដែលបានក្លាយជាប្ដីរបស់ស្រ្ដីចំនួន៣៩នាក់ និងជាមេគ្រួសារដ៏ធំបំផុត នៅលើពិភពលោក។ ក្រៅពីប្រពន្ធចំនួន៣៩នាក់នោះ ខ្ញុំមានកូនចំនួន៩៤នាក់ និងចៅចំនួន៧៦នាក់»៕
