បរទេស៖ សារព័ត៌មានបាងកកប៉ុស្ដិ៍ បានផ្សាយ នៅថ្ងៃទី១៥ ខែមិថុនា ថា មន្រ្ដីប៉ូលិសចូលនិវត្ដន៍ម្នាក់ មានអាយុ៧៣ឆ្នាំ បានទទួលមរណភាព កាលពីថ្ងៃចន្ទ (ទី១៤ ខែមិថុនា) ក្រោយពេលគាត់បានទទួលការចាក់វ៉ាក់សាំងបង្ការកូវីដ-១៩ AstraZeneca ដូសទី១ រយៈពេល៥ថ្ងៃ។
លោកវរសេនីយ៍ Kijjapat Ratanapan អនុប្រធានប៉ូលិស Bang Pu បានបញ្ជាក់ថា មន្រ្ដីប៉ូលិសចូលនិវត្ដន៍ ដែលបានទទួលមរណភាពនោះ ឈ្មោះ Songpop Poosang ។ នៅវេលាម៉ោង៣រសៀល ថ្ងៃកើតហេតុ មន្រ្ដីចូលនិវត្ដន៍បានដួល និងសន្លប់ នៅក្នុងផ្ទះលេខ 390/120 ភូមិ Moo 3 ឃុំ Tambon Bang Pu Mai ស្រុក Muang ។ រីឯក្រុមអ្នកជួយសង្រ្គោះ មកពីគ្រឹះស្ថាន Ruam Katanyu បានមកដល់ភ្លាមៗ ហើយព្យាយាមជួយសង្គ្រោះជីវិតរបស់គាត់ដែរ ប៉ុន្ដែមិនទទួលបានជោគជ័យ។
មន្រ្ដីប៉ូលិសដដែល បានបន្ដថា ក្រោយមកសពរបស់លោកវរសេនីយ៍ Songpop ត្រូវបានបញ្ជូនទៅកាន់មន្ទីរពេទ្យ Rama Chakrinarubodin ស្ថិតក្នុងខេត្ត Samut Prakan ដើម្បីធ្វើកោសល្យវិច័យ ស្វែងរកអំពីមូលហេតុ នៃការស្លាប់នេះ។
ដោយឡែក ភរិយារបស់មន្រ្ដីប៉ូលិសចូលនិវត្ដន៍ខាងលើ គឺលោកស្រី Wannaporn អាយុ៧០ឆ្នាំ បានបញ្ជាក់ថា មុនពេលចូលនិវត្ដន៍ ប្ដីរបស់លោកស្រីក៏ជាមន្រ្ដីប៉ូលិស Phlap Phla Chai ក្រុងបាងកក។ ប៉ុន្ដែកាលពីថ្ងៃទី៩ ខែមិថុនា កន្លងមក ប្ដីរបស់លោកស្រីបានទៅកាន់មន្ទីរពេទ្យSamut Prakan ហើយបានទទួលការចាក់វ៉ាក់សាំង AstraZeneca នូវដូសទី១។ លុះមកដល់រសៀល ថ្ងៃចន្ទ (ទី១៤ ខែមិថុនា) ប្ដីរបស់លោកស្រីបានត្អូញត្អែរ អំពីការពិបាកដកដង្ហើម និងឈឺពោះ បន្ទាប់មកគាត់បានដួលសន្លប់។ ភ្លាមៗនោះ លោកស្រីបានទាក់ទងទៅក្រុមអ្នកជួយសង្គ្រោះឲ្យមកជួយជីវិតប្ដីរបស់លោកស្រី តែមិនអាចជួយបាន។
លោកស្រី Wannaporn បានបន្ថែមថា លោកស្រីជឿថា ការស្លាប់របស់ប្ដីលោកស្រី អាចមានការពាក់ព័ន្ធនឹងការចាក់វ៉ាក់សាំងបង្ការកូវីដ-១៩នេះ។ កន្លងមក ប្ដីរបស់លោកស្រីមានជំងឺលើសឈាម ទឹកនោមផ្អែម និងជំងឺស្ដ្រូក (ischemic stroke) ប៉ុន្តែមិនបានបង្ហាញរោគសញ្ញាអ្វីឡើយ។
ទោះជាយ៉ាងណា ករណីខាងលើនេះ មន្រ្ដីជំនាញសុខាភិបាលថៃ នៅមិនទាន់បានបញ្ជាក់អំពីមូលហេតុ នៃការស្លាប់នេះនៅឡើយ។ ប៉ុន្ដែបើតាមច្បាប់របស់ប្រទេសថៃ គ្រប់ប្រជាពលរដ្ឋថៃដែលរងផលប៉ះពាល់ ពីការចាក់វ៉ាក់សាំង នឹងទទទួលបានសំណងពីរដ្ឋ បើទោះជាក្រោយមក រកឃើញថា ករណីនោះមិនពាក់ព័ន្ធនឹងវ៉ាក់សាំងក្ដី ក៏រដ្ឋមិនបានទារប្រាក់ ដែលបានប្រគល់ឲ្យនោះត្រឡប់មកវិញដែរ។
លោក Jadej Thammatacharee អគ្គលេខាធិការ នៃការិយាល័យសន្ដិសុខសុខាភិបាលជាតិ (NHSO) កាលពីពេលកន្លងមក បានបញ្ជាក់ថា « ពលរដ្ឋណាម្នាក់ មានបញ្ហាសុខភាព ដោយជឿថា វាបានបង្កឡើង ដោយសារការវ៉ាក់សាំង អាចដាក់ពាក្យស្នើសុំសំណងជាហិរញ្ញាវត្ថុភ្លាម ដោយមិនចាំបាច់ រង់ចាំលទ្ធផលបង្ហាញជាក់ស្ដែងនោះឡើយ។
លោកអគ្គលេខាធិការ NHSO បានបន្ថែមថា «អ្នកដែលទទួលបានសំណង ចំពោះផលប៉ះពាល់ នៃការចាក់វ៉ាក់សាំងបង្ការកូវីដ-១៩ ពី NHSO រួមមាន៖
១-ករណីស្លាប់ ឬពិការអចិន្រ្ដៃយ៍ នឹងត្រូវទទួលសំណង ចំនួន ៤០០ ០០០បាត (ប្រាក់ថៃ) ឬស្មើនឹង ១២ ៧៨៧ដុល្លារអាមេរិក។
២-បាត់បង់សរីរាង្គ ឬពិការ ត្រូវទទួលបានសំណងជាអតិបរមា ២៤០ ០០០បាត ឬស្មើនឹង៧ ៦៧២ដុល្លារអាមេរិក។
៣-ប៉ះពាល់ដល់សុខភាព ដែលត្រូវការការព្យាបាលតាមវេជ្ជសាស្រ្ត អ្នកទទួលវ៉ាក់សាំងនឹងមានសិទ្ធិទទួលបានសំណង រហូតដល់១សែនបាត ឬស្មើនឹង ៣ ១៩៦ដុល្លារអាមេរិក។
លោកអគ្គលេខាធិកា បានបន្ដថា ជំនួយហិរញ្ញវត្ថុពិតប្រាកដ អាស្រ័យទៅលើវិសាលភាព នៃផលប៉ះពាល់ពីវ៉ាក់សាំងបង្ការកូវីដ-១៩នេះ។ រីឯអ្នកដែលសង័្សយលើវ៉ាក់សាំងបង្ការកូវីដ-១៩ ដែលបង្កឲ្យកើតជាជំងឺ ឬស្លាប់ អាចដាក់ពាក្យស្នើសុំភ្លាមៗ ដោយមិនចាំបាច់រង់ចាំការផ្ទៀងផ្ទាត់ ព្រោះវាជាជំនួយដំបូង ដែលមិនត្រូវការភស្តុតាង»។
លោកអគ្គលេខាធិការ NHSO បានបន្ដថា «ទោះបីជាការស៊ើបអង្កេតតាមផ្នែកវេជ្ជសាស្រ្តសន្និដ្ឋាន នាពេលក្រោយ រកឃើញថា ករណីទាំងនេះមិនបានបង្កឡើង ដោយសារវ៉ាក់សាំងបង្ការកូវីដ-១៩ ក៏ដោយ ក៏យើងនឹងមិនទាមទារសំណង ពីអ្នកទាំងនោះវិញដែរ»៕