រដ្ឋធានីសេអ៊ូល៖ ក្រោយពេលស្ថានការណ៍ នៃទំនាក់ទំនងការទូត រវាងប្រទេសកូរ៉េខាងត្បូង និងជប៉ុន កាន់តែមានភាពតានតឹងដាក់គ្នានោះមក តុលាការប្រចាំស្រុកមួយ នៃកូរ៉េខាងត្បូង នៅថ្ងៃចន្ទ (ទី៧ ខែមិថុនា ឆ្នាំ២០២១) បានសម្រេចលុបចោលបណ្ដឹងទាមទារសំណងពីកម្លាំងពលកម្ម នៅក្នុងសម័យសង្រ្គាម ប្រឆាំងនឹងក្រុមហ៊ុននានារបស់ជប៉ុន ចំនួន១៦ រួមមាន ក្រុមហ៊ុនដែកថែប Nippon Steel Corp និងក្រុមហ៊ុន Mitsubishi Materials Corp ។
សារព័ត៌មានជប៉ុន (Japan Times) បានចេញផ្សាយ នៅថ្ងៃទី៧ ខែមិថុនា ថា តុលាការកណ្តាលទីក្រុងសេអ៊ូល បានថ្លែងថា នៅពេលនេះ ដើមបណ្តឹងមិនបានបាត់បង់សិទ្ធិ ក្នុងការទាមទារក្នុងនាមជាបុគ្គល ក្រោមកិច្ចព្រមព្រៀងទ្វេភាគី នាឆ្នាំ១៩៦៥នោះឡើយ។ សិទ្ធិបែបនេះមិនអាចត្រូវបានអនុវត្ត តាមរយៈពាក្យបណ្តឹងនេះឡើយ។
ទីភា្នក់ងារសារព័ត៌មានកូរ៉េខាងត្បូង ( Yonhap) បានរាយការណ៍ថា ដោយយោងទៅលើកិច្ចព្រមព្រៀង នាឆ្នាំ១៩៦៥ តុលាការ បានបញ្ជាក់ថា «ខ្លួនមិនអាចនិយាយថា ការទាមទាររបស់បុគ្គល ត្រូវបានបញ្ឈប់ ឬលើកលែងនោះដែរ ចំពោះសន្ធិសញ្ញាកូរ៉េ-ជប៉ុន។ ប៉ុន្តែតុលាការត្រូវបានសម្រេចចិត្តថា ជាសិទ្ធិបុគ្គល មិនអាចត្រូវបានអនុវត្ត តាមរយៈពាក្យបណ្តឹងទេ»។
បើតាមតុលាការទីក្រុងសេអ៊ូល ប្រទេសកូរ៉េខាងត្បូង បានឲ្យដឹងថា «បណ្ដឹងសរុប ចំនួន៨៥ រួមមាន អតីតពលករសម័យសង្គ្រាមជប៉ុន និងសមាជិក នៃគ្រួសារដែលបានបាត់បង់ជីវិត បានដាក់ពាក្យបណ្តឹង កាលពីខែឧសភា ឆ្នាំ០១៥ ដោយទាមទារសំណងជំងឺចិត្ត សរុប ៨,៦ ពាន់លានវ៉ុន (ប្រាក់កូរ៉េខាងត្បូង) ឬស្មើនឹង៧,៧៤លានដុល្លារសហរដ្ឋអាមេរិក។ ក្នុងចំណោមក្រុមហ៊ុនជប៉ុន ជាចុងចោទទាំងនោះ រួមមាន ក្រុមហ៊ុន Nishimatsu Construction Co., Sumitomo Metal Mining Co. និងក្រុមហ៊ុន Sumiseki Materials Co… ជាដើម។
ចំណងទាក់ទង រវាងកូរ៉េខាងត្បូង និងជប៉ុន បានតានតឹងដាក់គ្នា ចាប់តាំងពីសេចក្តីសម្រេចរបស់តុលាការកំពូលកូរ៉េខាងត្បូង កាលពីអំឡុងឆ្នាំ២០១៨ បានបញ្ជាឱ្យក្រុមហ៊ុន Nippon Steel និងក្រុមហ៊ុនឧស្សាហកម្ម Mitsubishi Heavy Industries Ltd សងសំណងដល់ដើមបណ្ដឹងជាជនជាតិកូរ៉េខាងត្បូង ជុំវិញករណីបង្ខំឲ្យធ្វើការ នៅក្នុងអំឡុងពេល នៃការធ្វើអាណានិគមរបស់ជប៉ុន នៅលើឧបទ្វីកូរ៉េ ចន្លោះពីឆ្នាំ១៩១០-១៩៤៥៕
