បរទេស៖ ក្រោយការធ្វើរដ្ឋប្រហាររឹបអូសអំណាច កាលពីថ្ងៃទី១ ខែកុម្ភៈ ឆ្នាំ២០២១នោះមក មានជនស៊ីវិល ជាង៨០០នាក់ត្រូវបានពួកយោធាបាញ់សម្លាប់ ហើយនៅពេលនេះ ក្រុមមេដឹកនាំយោធាភូមា និងគ្រួសាររបស់ពួកគេ កំពុងតែរងសម្ពាធកាន់តែធ្ងន់ធ្ងរបន្ថែមទៀត ពីប្រទេសមហាអំណាចលោកខាងលិច។
ទីភ្នាក់ងារសារព័ត៌មាន AFP កាលពីព្រឹក ថ្ងៃអង្គារ ទី១៨ ខែឧសភា ឆ្នាំ២០២១ បានផ្សាយថា ក្រសួងសេដ្ឋកិច្ចសហរដ្ឋអាមេរិក បានប្រកាស កាលពីថ្ងៃចន្ទ ទី១៧ ខែឧសភា ឆ្នាំ២០២១ (វេលានៅទីក្រុងវ៉ាស៊ីនតោន)ថា សហរដ្ឋអាមេរិកបានសម្រេចដាក់ទណ្ឌកម្មទៅលើមន្ត្រីជាន់ខ្ពស់មីយ៉ាន់ម៉ា និងសមាជិកគ្រួសាររបស់ពួកគេ ចំនួន១៦នាក់ ក្រោមការចោទប្រកាន់ថា ពួកគេជាក្រុមអ្នកគាំទ្រ ចំពោះអំពើហិង្សាបង្រ្កាមទៅលើចលនាគាំទ្រលទ្ធិប្រជាធិបតេយ្យ នៅក្នុងប្រទេសមីយ៉ាន់ម៉ា (ភូមា)។
ក្រសួងសេដ្ឋកិច្ចសហរដ្ឋអាមេរិក បានបញ្ជាក់ថា អ្នកដែលត្រូវបានសហរដ្ឋអាមេររិកកត់ឈ្មោះ បញ្ចូលទៅក្នុងបញ្ជីខ្មៅទាំងនោះ រួមមាន៖ សមាជិកក្រុមប្រឹក្សារដ្ឋបាលរដ្ឋ នៃរបបយោធាមីយ៉ាន់ម៉ា ចំនួន៤នាក់, រដ្ឋមន្ត្រីចំនួន៧នាក់, ប្រធានគណៈកម្មាធិការរៀបចំការបោះឆ្នោត ដែលគ្រប់គ្រងដោយរបបយោធា និងទេសាភិបាលធនាគារកណ្តាលរបស់មីយ៉ាន់ម៉ា។ ដោយឡែកឥស្សរជន នៃរបបយោធាភូមាចំនួន៣នាក់ផ្សេងទៀត ដែលមានឈ្មោះនៅក្នុងបញ្ជីខ្មៅដែរនោះ ក៏ជាកូនរបស់សមាជិកក្រុមប្រឹក្សារដ្ឋបាលរដ្ឋ ដែលត្រូវរងការដាក់ទណ្ឌកម្មរួចទៅហើយ នៅមុនរដ្ឋប្រហារ ថ្ងៃទី១ ខែកុម្ភៈ ឆ្នាំ២០២១។
ការធ្វើរដ្ឋប្រហារយោធា ផ្ដួលរំលំរដ្ឋាភិបាលស៊ីវិលភូមានេះ បានកើតឡើង ក្រោយពេលគណបក្សរបស់លោកស្រី អ៊ុង សានស៊ូ ជី ទទួលបានជ័យជម្នះយ៉ាងភ្លូកទឹកភ្លូកដី នៅក្នុងការបោះឆ្នោត កាលពីខែវិច្ឆិកា ឆ្នាំ២០២០។ ដោយសារតែពួកយោធាភូមាអស់លទ្ធភាព ហើយមិនសង្ឃឹមថា គណបក្សរបស់ខ្លួនទទួលបានជ័យជម្នះលើលោកស្រីបាន ក៏បង្កើតជាល្បិចចោទប្រកាន់ថា ការបោះឆ្នោតនោះមិនបានប្រព្រឹត្តទៅដោយត្រឹមត្រូវនោះទេ។ នេះជាការបោះឆ្នោត ដោយមានភាពមិនប្រក្រតី និងមានការក្លែងបន្លំសន្លឹកឆ្នោត។
សហរដ្ឋអាមេរិក និងសហភាពអឺរ៉ុប បានបង្កើនការដាក់ទណ្ឌកម្មលើមន្រ្ដីជាន់ខ្ពស់យោធាភូមា និង គ្រួសាររបស់ពួកគេ ក្នុងគោលបំណង រារាំងពួកគេមិនឱ្យចូលទៅក្នុងប្រព័ន្ធពាណិជ្ជកម្ម និងហិរញ្ញវត្ថុសកល តាមរយៈការហាមឃាត់បុគ្គល និងក្រុមហ៊ុននានារបស់សហរដ្ឋអាមេរិក រួមទាំងធនាគារបរទេសនានា ដែលមានសាខា នៅសហរដ្ឋអាមេរិក ពីការធ្វើជំនួញជាមួយបុគ្គល និងអង្គភាពមីយ៉ាន់ម៉ា ដែលមានឈ្មោះក្នុងបញ្ជីខ្មៅ។
បើតាមសមាគមជំនួយអ្នកទោសនយោបាយ បានឲ្យដឹងថា ចាប់តាំងពីការធ្វើរដ្ឋប្រហារយោធា នៅភូមា នាថ្ងៃទី១ ខែកុម្ភៈ រហូតមកដល់ថ្ងៃទី១៧ ខែឧសភា មានមនុស្សជាង ៨០០នាក់ ត្រូវបានពួកយោធាបាញ់សម្លាប់ នៅក្នុងការបង្ក្រាបបាតុកម្ម នៅទូទាំងប្រទេសមីយ៉ាន់ម៉ា។ ដោយឡែកមនុស្សរាប់ពាន់នាក់ផ្សេងទៀត បន្ដចាប់ខ្លួននាំទៅឃុំឃាំង៕