រាជធានីភ្នំពេញ៖ អាជ្ញាធររាជធានីភ្នំពេញ បានសម្រេចផ្ទេរជាបណ្តោះអាសន្ននូវផ្សារបោះដុំបន្លែ ចេញពីផ្សារដើមគរទៅលក់ នៅផ្សារកួរស្រូវ នៅតាមផ្លូវជាតិលេខ២ ស្ថិតក្នុងភូមិកណ្តាល សង្កាត់រលួស ខណ្ឌដង្កោ។
លោក ឃួង ស្រេង អភិបាលរាជធានីភ្នំពេញ មានប្រសាសន៍ថា រាល់បន្លែបង្ការ ដែលធ្លាប់នាំចូលផ្សារដើមគ នឹងត្រូវផ្ទេរទៅកាន់តំបន់ផ្សារ ដែលបង្កើតជាបណ្តោះអាសន្ន នៅផ្សារកួរស្រូវដើម្បីបែងចែកទៅកាន់ផ្សារនានា ជំនួសផ្សារដើមគ ដែលត្រូវបានបិទ ដោយសារការរីករាលដាល នៃជំងឺកូវីដ-១៩ ។
ផ្សារបណ្តោះអាសន្ន សម្រាប់ការបោះដុំបន្លែនេះ មានចម្ងាយប្រហែល១៤គីឡូម៉ែត្រ ពីផ្សារដើមគ រាជធានីភ្នំពេញ។ រហូតមកដល់ពេលនេះ បន្លែបង្ការមួយចំនួន ត្រូវបានដឹកចូលទៅកាន់ទីនោះជាបណ្តើរៗ ដើម្បីនាំយកទៅផ្គត់ផ្គង់តាមតម្រូវការរបស់ប្រជាពលរដ្ឋ នៅរាជធានីភ្នំពេញ ក៏ដូចជា ប្រជាពលរដ្ឋ នៅតាមបណ្ដាខេត្តនានាផងដែរ។
ទោះជាយ៉ាងណា រហូតមកដល់ពេលនេះ ផ្សារដើមគ ជាផ្សារបោះបន្លែដ៏ធំមួយ នៅក្នុងរាជធានីភ្នំពេញ ត្រូវបានអាជ្ញាធរសម្រេចបិទជាបណ្ដោះអាសន្ន ក្រោយរកឃើញអាជីវករ នៅក្នុងផ្សារនេះបានឆ្លងជំងឺកូវីដ-១៩៕