រាជធានីភ្នំពេញ៖ អាជ្ញាធរ និងមន្រ្ដីសុខាភិបាល កាលពីយប់ ថ្ងៃទី៦ ខែមេសា ឆ្នាំ២០២១ បានចុះទៅនាំបុរសឆ្លងកូវីដ១៩ម្នាក់ ដើម្បីយកទៅព្យាបាល។
លោក សុទ្ធ សុជាតិ ចៅសង្កាត់រងចោមចៅទី៣ ខណ្ឌពោធិ៍សែនជ័យ បានឲ្យដឹងថា បុរសដែលរកឃើញវិជ្ជមាន នៃកូវីដ-១៩នេះ ឈ្មោះ យឹម យ៉ឹម អាយុ៣៥ឆ្នាំ ស្នាក់នៅបន្ទប់ជួលលេខ៧ ផ្លូវលេខ៦(ត) ភូមិត្រពាំងពោធិ៍ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
លោកចៅសង្កាត់រងចោមចៅទី៣ បានបញ្ជាក់ថា កាលពីប៉ុន្មានថ្ងៃមុននេះ បុរសខាងលើ មានអាការមិនសូវស្រួល ក្នុងខ្លួន ទើបគាត់ធ្វើដំណើរដោយខ្លួនឯង ដើម្បីទៅពិនិត្យសំណាក នៅក្នុងមន្ទីរពេទ្យមិត្តភាពខ្មែរ-សូវៀត។ ក្រោយពេលពិនិត្យសំណាករួច ក្រុមគ្រូពេទ្យជំនាញបានរកឃើញថា គាត់មានវិជ្ជមាន នៃកូវីដ-១៩ ទើបនៅយប់ ថ្ងៃទី៦ ខែមេសា ឆ្នាំ២០២១ ក្រុមគ្រូពេទ្យបានចុះមកនាំគាត់ទៅសម្រាកព្យាបាល នៅក្នុងមន្ទីរពេទ្យ៕