បរទេស៖ កោះតៃវ៉ាន់ មានហេតុការណ៍រថភ្លើងបុករថយន្ដដ៏រន្ធត់មួយ បានធ្វើឲ្យចំនួនអ្នកស្លាប់កើនឡើងដល់៥១នាក់ និងមនុស្សជាង៦០នាក់ផ្សេងទៀត បានរងរបួស។ គ្រោះថ្នាក់ចរាចរណ៍ នៅក្នុងផ្លូវក្រោមដីដ៏អាក្រក់ក្នុងប្រវត្ដិសាស្រ្ដរបស់ដែនកោះនេះ បានកើតឡើង កាលពីវេលាម៉ោង៩ និង៣០នាទីព្រឹក ថ្ងៃទី២ ខែមេសា ឆ្នាំ២០២១។
សារព័ត៌មានជប៉ុន NHK របស់ជប៉ុន បានផ្សាយថា តៃវ៉ាន់បានជួបនឹងគ្រោះថ្នាក់ដ៏ធ្ងន់ធ្ងរមួយ នៅក្នុងហេតុការណ៍រថភ្លើងបុករថយន្ដ នៅក្នុងប្រវត្ដិសាស្រ្ដរបស់ខ្លួន។ ប៉ុន្ដែអាជ្ញាធរផ្លូវដែកបានបញ្ជាក់ថា មានមនុស្សយ៉ាងតិច៥១នាក់ បានស្លាប់ និងអ្នកដំណើរជាង៦០នាក់ផ្សេងទៀតបានរងរបួស។
រថភ្លើងល្បឿនលឿនេះ បានដឹកអ្នកដំណើរ ចំនួន៤៩០នាក់ ហើយរថភ្លើងបានបុកគ្នាជាមួយនឹងរថយន្ដ នៅក្នុងផ្លូវក្រោមដី នាឆ្នេរភាគខាងកើតដែនកោះតៃវ៉ាន់។ អាជ្ញាធរផ្លូវដែកកោះតៃវ៉ាន់ បានបញ្ជាក់ថា រថយន្ដចំនួន៤ ក្នុងចំណោម៨គ្រឿង បានរងការខូចខាតខ្ទេចខ្ទីអស់។ ចំណែកក្រុមអ្នកជួយសង្គ្រោះកំពុងតែពុះពារទៅជួយអ្នករស់រានមានជីវិត នៅក្នុងរថយន្ដ នៅក្នុងផ្លូវក្រោមដី។
អាជ្ញាធរផ្លូវដែកកោះតៃវ៉ាន់ បានប្រាប់សារព័ត៌មាន NHK ថា រថភ្លើងបានបុកយានយន្ដសាងសង់ផ្លូវ។ ប៉ុន្ដែមូលហេតុពិតប្រាកដ នៃគ្រោះថ្នាក់នេះ កំពុងស្ថិតក្នុងការស៊ើបអង្កេត។
ស្រ្ដីជាអ្នកដំណើរតាមរថភ្លើងម្នាក់ ដែលជួបនឹងគ្រោះថ្នាក់ចរាចរណ៍នោះ បានឲ្យដឹងថា មុនដំបូង រថភ្លើងកំពុងតែបើកបរ ក្នុងល្បឿនធម្មតា ខណៈនោះស្រាប់តែរថភ្លើងបានជាន់ហ្វ្រាំងឈប់ទាំងបង្ខំ។ ភ្លាមៗនោះនោះ គាត់មានអារម្មណ៍ ដូចជា យើងត្រូវបានគេបុកពីក្រោយ។ គ្រោះថ្នាក់នេះ បានកើតឡើង នៅវេលាម៉ោង៩ និង៣០នាទីព្រឹក ថ្ងៃសុក្រ (ទី២ ខែមេសា ឆ្នាំ២០២១)។ រថភ្លើងកំពុងធ្វើដំណើរ ពីភាគខាងជើង នៃកោះទៅភាគអាគ្នេយ៍ នៃទីក្រុងតាទុង៕
