គេហទំព័រសម្រាប់គម្រោង«ការអភិរក្សនិងបញ្ចូលបណ្ណសារសារមន្ទីរទួលស្លែងទៅក្នុងប្រព័ន្ធកុំព្យូទ័រ»ដាក់ឲ្យដំណើរការជាផ្លូវការ

​ភ្នំពេញ៖ ទីភ្នាក់ងារសហប្រតិបត្តិការអន្តរជាតិកូរ៉េ(កយកា) រួមជាមួយ អង្គការអប់រំវិទ្យាសាស្ត្រនិងវប្បធម៌នៃអង្គការសហប្រជាជាតិ(យូណេស្កូ) បានរៀបចំ ”ពិធីដាក់ឲ្យដំណើរការជាផ្លូវការគេហទំព័រ” សម្រាប់គម្រោងស្តីពី “ការអភិរក្សនិងបញ្ចូលបណ្ណសារសារមន្ទីរទួលស្លែងទៅក្នុងប្រព័ន្ធកុំព្យូទ័រ” ដោយសហការជាមួយក្រសួងវប្បធម៌និងវិចិត្រសិល្បៈនៃប្រទេសកម្ពុជា និងសារមន្ទីរឧក្រិដ្ឋកម្មប្រល័យពូជសាសន៍ទួលស្លែងកាលពីថ្ងៃទី២៩ មករា២០២១។

ពិធីដាក់ឲ្យដំណើរការជាផ្លូវការគេហទំព័រ នេះមានការចូលរួមពីសំណាក់ភ្ញៀវកិត្តិយសជាច្រើនរួមមាន ឯកឧត្តម បណ្ឌិត ផាក ហ៊ឹងខ្យង់ (Park Heung-kyeong) ឯកអគ្គរដ្ឋទូតនៃសាធារណរដ្ឋកូរ៉េ ប្រចាំនៅកម្ពុជា លោកជំទាវ បណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ លោក នោ ហ្យន់ជូន (Rho HyunJun) ប្រធានតំណាងទីភ្នាក់ងារសហប្រតិបត្តិការអន្តរជាតិកូរ៉េ(កយកា)ប្រចាំនៅកម្ពុជា លោក សាដា អ៊ូម៉ា អាឡាម (Sardar Umar Alam)នាយក ការិយាល័យនៅភ្នំពេញ និងជាតំណាងអង្គការយូណេស្កូប្រចាំកម្ពុជា លោក ហង្ស និស្ស័យ ប្រធានសារមន្ទីរឧក្រិដ្ឋកម្មប្រល័យពូជសាសន៍ទួលស្លែង និងអ្នកចូលរួមជាតិនិងអន្តរជាតិដទៃទៀត។

លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈថ្លែងក្នុងកម្មវិធីដាក់ឲ្យដំណើរការគេហទំព័របណ្ណសារសារមន្ទីរឧក្រិដ្ឋកម្មប្រល័យពូជសាសន៍ទួលស្លែង
គម្រោង “អភិរក្ស និងថតចម្លងបណ្ណសារសារមន្ទីរទួលស្លែងតាមប្រព័ន្ធកុំព្យូរទ័រ” នេះ ពិតជាមាន សារសំខាន់ណាស់ក្នុងគោលបំណងពង្រឹងការថែរក្សាបណ្ណសារសារមន្ទីរទួលស្លែងនិងពង្រីកការផ្សព្វផ្សាយឲ្យកាន់តែទូលំទូលាយ តាមរយៈការអភិរក្សនិងជួសជុលឯកសារចាស់ៗ ការថតចម្លងឯកសារជាទម្រង់ឌីជីផល ដោយដាក់បញ្ចូលក្នុងប្រព័ន្ធដាតាបេស ការទុកដាក់ឯកសារឲ្យបានគង់វង្សតាមស្តង់ដារសុវត្ថិភាពខ្ពស់ ការបណ្តុះបណ្តាលធនធានមនុស្ស ព្រមទាំងការបង្កើតគេហទំព័រ និងបន្ទប់បញ្ចាំងវីដេអូឯកសារ។

ឯកសារជាង៤០ម៉ឺនទំព័រ (រួមមាន៖ ប្រវត្តិរូបជនរងគ្រោះ ចម្លើយសារភាព រូបថត ហ្វីល និងឯកសារផ្សេងៗទៀតដែលសេសសល់ក្រោយសម័យខ្មែរក្រហម) ត្រូវបានថតចម្លងជាទម្រង់ឌីជីផល (digitized documents) និងដាក់បញ្ចូលក្នុងប្រព័ន្ធដាតាបេស (database) ដោយអ្នកស្រាវជ្រាវអាចចូលមើលបានតាមប្រព័ន្ធកុំព្យូទ័រ។ ទន្ទឹមនេះ ការបង្កើតគេហទំព័របណ្ណសារសារមន្ទីរទួលស្លែង ដែលនឹងដាក់ឲ្យដំណើរការនាពេលខាងមុខនេះ បានផ្ដល់ភាពងាយស្រួលសម្រាប់សាធារណជន អ្នកសិក្សាស្រាវជ្រាវ ពិសេសសាច់ញាតិជនរងគ្រោះ អាចស្វែងរកព័ត៌មានបានគ្រប់ពេលវេលា និងគ្រប់ទីកន្លែង។ តាមរយៈគម្រោងនេះផងដែរ មន្ត្រីសារមន្ទីរក៏បានទទួលការបណ្តុះបណ្តាលបន្ថែម លើការងារអភិរក្ស ការថែរក្សាឯកសារ និងការគ្រប់គ្រងទិន្នន័យក្នុងប្រព័ន្ធកុំព្យូរទ័រ។

ដោយយល់ឃើញពីសារៈសំខាន់នៃបណ្ណសារសារមន្ទីរទួលស្លែងនេះ រាជរដ្ឋាភិបាលកម្ពុជាក្រោមគំនិត ផ្ដួចផ្ដើមដ៏ខ្ពង់ខ្ពស់របស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជា ណាចក្រកម្ពុជា យើងបានរៀបចំសំណើជូនអង្គការយូណេស្កូ ដើម្បីដាក់បញ្ចូលបណ្ណសារសារមន្ទីរទួលស្លែង ទៅក្នុងបញ្ជីស្មារតីចងចាំនៃពិភពលោកថ្នាក់អន្តរជាតិ នៅថ្ងៃទី៣១ ខែកក្កដា ឆ្នាំ២០០៩។ ការចុះក្នុងបញ្ជីស្មារតីចងចាំនៃពិភពលោកនេះ បានជំរុញនិងលើកកម្ពស់ថែមទៀតដល់ការថែរក្សា និងផ្សព្វផ្សាយទៅកាន់ពិភពលោក ជាមួយនឹងការកៀរគរជំនួយឧបត្ថម្ភគាំទ្រពីសហគមន៍អន្តរជាតិ និងដៃគូអភិវឌ្ឍន៍នានា ក្នុងការអភិរក្សឯកសារប្រវត្តិសាស្រ្តនេះកាន់តែប្រសើរ និងពង្រីកការប្រើប្រាស់កាន់តែទូលំទូលាយ។
ឆ្លើយតបនឹងសេចក្តីត្រូវការ និង ដើម្បីជាឧត្តមប្រយោជន៍សម្រាប់មនុស្សជាតិ ទីភ្នាក់ងារសហប្រតិបត្តិការអន្តរជាតិកូរ៉េ KOICA បានផ្តល់ថវិកាសម្រាប់អនុវត្ត “គម្រោងអភិរក្សនិងបញ្ចូលបណ្ណសារ សារមន្ទីរទួលស្លែងក្នុងប្រព័ន្ធកុំព្យូទ័រ” នេះ ដែលបានអនុវត្តចាប់ពីឆ្នាំ២០១៨មក។ ថ្មីៗនេះ នៅខែកញ្ញា ឆ្នាំ២០២០ សារមន្ទីរទួលស្លែងក៏បានទទួលរង្វាន់ជ័យលាភីរបស់រដ្ឋាភិបាលកូរ៉េ Jikji UNESCO Memory of the World prize លើកទី៨ ដែលជាការទទួលស្គាល់ និងលើកទឹកចិត្តដល់កិច្ចខិតខំប្រឹងប្រែងរបស់សារមន្ទីរទួលស្លែងកន្លងមក ជាមួយនឹងការផ្តល់មធ្យោបាយបន្ថែមទៀតដល់ការអភិរក្សឯកសារបេតិកភណ្ឌប្រវត្តិសាស្រ្ត នេះ និងការអប់រំផ្សព្វផ្សាយ។

ទីភ្នាក់ងារសហប្រតិបត្តិការអន្តរជាតិកូរ៉េ (កយកា) និងអង្គការអប់រំវិទ្យាសាស្ត្រនិងវប្បធម៌នៃអង្គការសហប្រជាជាតិ(យូណេស្កូ) បានឯកភាពគ្នាធ្វើការលើគម្រោង “ការអភិរក្សនិងបញ្ចូលបណ្ណសារសារមន្ទីរទួលស្លែងទៅក្នុងប្រព័ន្ធកុំព្យូទ័រ” ពីឆ្នាំ ២០១៥ ដល់ឆ្នាំ ២០២០ ក្នុងគ្របខ័ណ្ឌហិរញ្ញប្បទានឥតសំណងចំនួន ១. ១៥០. ០០០ លានដុល្លារអាមេរិក(មួយលានមួយរយហាសិបពាន់ដុល្លារអាមេរិក)។ បន្ទាប់ពីការអនុវត្តគម្រោងរយៈពេល៥ឆ្នាំ(២០១៥-២០២០) គម្រោងនេះទើបតែបញ្ចប់ដោយពិធីដាក់ឲ្យដំណើរការគេហទំព័រនៅថ្ងៃទី២៩ ខែមករា ឆ្នាំ២០២១។

គោលបំណងនៃគម្រោងនេះគឺផ្តោតលើ ១)-ដើម្បីអភិរក្សនិងធ្វើឌីជីថលបណ្ណសារនៃសារមន្ទីរប្រល័យពូជសាសន៍ទួលស្លែង ដែលត្រូវបានចារលើការចងចាំអន្តរជាតិនៃការចុះឈ្មោះពិភពលោកក្នុងឆ្នាំ២០០៩ ២)-ដើម្បីគាំទ្រដល់សារមន្ទីរប្រល័យពូជសាសន៍ទួលស្លែង ដើម្បីអភិវឌ្ឍទៅជាកន្លែងកសាងការអប់រំ និងសន្តិភាព ដែលយុវជន អ្នករស់រានមានជីវិតពីរបបខ្មែរក្រហម និងសាធារណជនទូទៅ អាចទទួលបានព័ត៌មាន អំពីប្រវត្តិសាស្រ្តរបស់ពួកគេ និងបន្តកិច្ចពិភាក្សាអំពីសន្តិភាពនិងអហិង្សា និង ៣)-ដើម្បីកសាងសមត្ថភាព បុគ្គលិកនៅ សារមន្ទីរប្រល័យពូជសាសន៍ទួលស្លែង និង ក្រសួង វប្បធម៌ និង វិចិត្រសិល្បៈ ដើម្បីគ្រប់គ្រង បណ្ណសារ។

ប័ណ្ណសារត្រូវបានបញ្ចូលទៅក្នុងគេហទំព័រជាពីរភាសា ជួយសម្រួលដល់ប្រជាជនកម្ពុជានៅជនបទ យុវជន និង អ្នកស្រាវជ្រាវអន្តរជាតិហើយវាបានរួមចំណែកដល់ការអប់រំយុវជនអំពីសន្តិភាពនិងការចងចាំ។ គេហទំព័រនេះត្រូវបានបង្កើតឡើង ដោយសហការយ៉ាងជិតស្និទ្ធជាមួយ សារមន្ទីរឧក្រិដ្ឋកម្មប្រល័យពូជសាសន៍ទួលស្លែង និងដោយមានការគាំទ្របច្ចេកទេសនិងការណែនាំដែលផ្តល់ដោយអ្នកជំនាញ ពីអង្គការអប់រំវិទ្យាសាស្ត្រនិងវប្បធម៌នៃអង្គការសហប្រជាជាតិ(យូណេស្កូ) និងគណៈកម្មាធិការបច្ចេកទេស។

គេហទំព័ររួមមានលក្ខណៈសំខាន់ៗដូចខាងដតទៅ៖ ១)-សាធារណជន និងអ្នកស្រាវជ្រាវអាចចូលមើល មូលដ្ឋានទិន្នន័យពីរ ដែលត្រូវបានបង្កើតឡើងដោយគម្រោង មួយផ្នែកផ្អែកលើអ្នកជាប់ឃុំ និងមួយផ្នែកទៀតផ្អែកលើទិន្នន័យ(ឯកសារ) ២)- អ្នកប្រើប្រាស់អាចចូលរួមក្នុងការកែលំអមុខងាររបស់គេហទំព័រ តាមរយៈវេទិកាផ្តល់មតិត្រឡប់ ដែលត្រូវបានបញ្ចូលក្នុងវិបផតថល ៣)- គេហទំព័រនេះអាចចូលមើលបានទាំងភាសាខ្មែរនិងអង់គ្លេស ៤)- គេហទំព័របញ្ចូលបណ្ណសារវិបសាយទៅគេហទំព័រសារមន្ទីរឧក្រិដ្ឋកម្មប្រល័យពូជសាសន៍ទួលស្លែង និង ៥)- គេហទំព័ររួមបញ្ចូលទាំងចំណុចប្រទាក់ពីរផ្សេងគ្នា៖ ទី១- វិបផតថលអ្នកប្រើ៖ វិបផតថលអ្នកប្រើ គឺជាវិបផតថលសម្រាប់អ្នកប្រើប្រាស់ (សាធារណជនទូទៅ អ្នកស្រាវជ្រាវ អ្នកសិក្សា។ល។)។ ម្យ៉ាងវិញទៀត នេះគឺជា ចំណុចប្រទាក់(interface) ដែលអ្នកប្រើប្រាស់អ៊ីនធឺណិត នឹងចូលប្រើ។ និង ទី២- ផតថលរដ្ឋបាល៖ ផតថលរដ្ឋបាល គឺជាចំណុចប្រទាក់ ដែលត្រូវបានបង្កើតឡើងសម្រាប់បុគ្គលិក របស់សារមន្ទីរឧក្រិដ្ឋកម្មប្រល័យពូជសាសន៍ទួលស្លែង។ តាមរយៈ វិបផតថល អ្នកអាយធីនិងបុគ្គលិកប័ណ្ណសារ របស់សារមន្ទីរឧក្រិដ្ឋកម្មប្រល័យពូជសាសន៍ទួលស្លែង នឹងអាចធ្វើបច្ចុប្បន្នភាព មាតិកាគេហទំព័រ និងឃ្លាំងទិន្នន័យ រួមមាន (អត្ថបទ បដា តំណភ្ជាប់ ឯកសារកំណត់ត្រា កំណត់ត្រារបស់អ្នកជាប់ឃុំ។ ល។)។ នេះគឺជាមុខងារដែលអាចជួយធ្វើបច្ចុប្បន្នភាពបណ្ណាសារបន្ត។

មុនពេលអនុវត្តគម្រោងនេះ មិនមានមនុស្សច្រើនទេ បានដឹងអំពីឯកសាររាប់ពាន់ដែលបានទុកនៅក្នុងបរិវេណ សារមន្ទីរឧក្រិដ្ឋកម្មប្រល័យពូជសាសន៍ទួលស្លែង បន្ទាប់ពីការរំដោះថ្ងៃ៧ ខែមករា ឆ្នាំ១៩៧៩។ តាមរយៈគម្រោងនេះ រាល់ឯកសារទាំងអស់ត្រូវបានថែរក្សាយ៉ាងល្អ រហូតមកដល់សព្វថ្ងៃនេះ ហើយឥឡូវនេះអ្នករាល់គ្នាអាចចូលមើលបាន។

គម្រោងនេះបានលើកកម្ពស់សន្តិភាព និងកិច្ចពិភាក្សាអន្តរវប្បធម៌ សម្របសម្រួលកិច្ចខិតខំប្រឹងប្រែងផ្សះផ្សា និងពង្រីកការផ្សព្វផ្សាយ រួមទាំង តាមរយៈ ការអភិរក្សនិងការធ្វើឌីជីថលបណ្ណសារ សារមន្ទីរឧក្រិដ្ឋកម្មប្រល័យពូជសាសន៍ទួលស្លែង។ តាមរយៈគម្រោងនេះ សរុបចំនួន ៤០៥ ៧៨២ទំព័រ ត្រូវបានធ្វើឌីជីថល និង ៧៤៥ ៤៩៤ទំព័រ ត្រូវបានរក្សាទុកតាមរយៈគម្រោង (រួមមាន ការបោះពុម្ពរូបថត ហ្វីល ចម្លើយសារភាព ជីវប្រវត្តិ បញ្ជី សៀវភៅបដិវត្ត ទស្សនាវដ្តី សៀវភៅសរសេរដោយដៃរបស់ខ្មែរក្រហម និងឯកសារផ្សេងទៀត) ។