ខេត្តព្រះសីហនុ៖ ជនអន្ធពាលជនជាតិចិន ចំនួន៣នាក់ ជាប់ពាក់ព័ន្ធនឹងករណីបាញ់សម្លាប់ជនជាតិចិនដូចគ្នា ក៏ត្រូវសមត្ថកិច្ចខេត្តព្រះសីហនុឃាត់ខ្លួន កាលពីព្រឹក ថ្ងៃទី២៧ ខែមករា ឆ្នាំ២០២១ នៅក្នុងខេត្តព្រះសីហនុ។
លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានឲ្យដឹង កាលពីព្រឹក ថ្ងៃទី២៧ ខែមករា ឆ្នាំ២០២១ថា កាលពីថ្ងៃទី២១ ខែមករា ឆ្នាំ២០២១កន្លងមកនេះ មានករណីជនជាតិចិន បាញ់សម្លាប់ជនជាតិចិនដូចគ្នា នៅមុខកាស៊ីណូ «ជីយវនីសិន» ជិតវត្តឥន្ទញញាណ ក្រុងព្រះសីហនុ។ ប៉ុន្ដែបើគិតមកដល់ថ្ងៃនេះ (ថ្ងៃទី២៧ ខែមករា) កម្លាំងនគរបាល បានស្រាវជ្រាវ រហូតចាប់ខ្លួនជនសង័្សយបានចំនួន៣នាក់ ដែលជាជនជាតិចិនដូចគ្នា។លោកស្នងការនគរបាលខេត្តព្រះសីហនុ បានបញ្ជាក់ថា ក្នុងចំណោមជនសង័្សយ ដែលត្រូវចាប់ខ្លួនទាំង២នាក់នោះ មានម្នាក់ជាជនដៃដល់ និង២នាក់ទៀត ជាអ្នកសមគំនិត។ ជនសង័្សយទាំងនោះ រួមមាន ទី១-ឈ្មោះ Zhang Xuanyi ភេទប្រុស អាយុ២៥ឆ្នាំ ជនជាតិចិន មុខរបរជាអ្នកនាំភ្ញៀវក្នុងកាស៊ីណូ ស្នាក់នៅភូមិ៣ សង្កាត់លេខ៤ ក្រុងព្រះសីហនុ, ទី២-ឈ្មោះ Wu Kai Jin ភេទប្រុស អាយុ២៤ឆ្នាំ ជនជាតិចិន មុខរបរអ្នកណែនាំបុគ្គលិកចូលធ្វើការ មានទីលំនៅមិនពិតប្រាកដ និងទី៣-ឈ្មោះ Huang Kun ភេទប្រុស អាយុ២២ឆ្នាំ ជនជាតិចិន មុខរបរបុគ្កលិកហាងម៉ាស្សា ស្នាក់នៅភូមិ៣ សង្កាត់លេខ៤ ក្រុង-ខេត្តព្រះសីហនុ។ ក្រៅពីឃាត់ខ្លួនជនសង័្សយខាងលើនេះ សមត្ថកិច្ចដកហូតបានហូតបានវត្ថុតាង ព្រមទាំងថ្នាំញៀនមួយចំនួនផងដែរ។
លោកស្នងការនគរបាលខេត្តព្រះសីហនុ បានបន្ថែមថា ករណីនេះ សមត្ថកិច្ចកំពុងតែធ្វើកិច្ចការនេះបន្ដទៀត ដើម្បីតាមស្វែងរកបក្ខពួករបស់ជនល្មើស ដែលនៅសេសសល់ នាំមកផ្តន្ទាទោសតាមច្បាប់។
សូមជម្រាបថា កាលពីវេលាម៉ោង៩ព្រឹក ថ្ងៃទី២១ ខែមករា ឆ្នាំ២០២១កន្លងទៅនេះ មានករណីខ្មាន់កាំភ្លើងម្នាក់ជាជនជាតិចិន បានបាញ់ប្រហារទៅលើបុរសជាជនជាតិចិនម្នាក់ បណ្ដាលឲ្យស្លាប់ នៅក្នុងថ្លុកឈាម និងម្នាក់ទៀតរបួសធ្ងន់ នៅក្នុងមុខកាស៊ីណូ «ជីយវនីសិន» ស្ថិតក្នុងក្រុងព្រះសីហនុ ខេត្តព្រះសីហនុ។ ក្រោយកើតហេតុភ្លាមៗ កម្លាំងសមត្ថកិច្ចព្រហ្មទណ្ឌ និងកម្លាំងអន្ដរាគមន៍ពិសេស ចុះសហការជាមួយកម្លាំងអធិការដ្ឋាននគរបាលក្រុងព្រះសីហនុ ដើម្បីឡោមព័ទ្ធទីតាំងកើតហេតុ និងស្រាវជ្រាវតាមចាប់ខ្លួនជនដៃដល់។
ប្រភពព័ត៌មានពីសមត្ថកិច្ច បានឲ្យដឹងថា ជនរងគ្រោះ ជាជនជាតិចិន ជិះរថយន្ដមួយគ្រឿង ម៉ាក Range Rover ពណ៌ខ្មៅ ពាក់ស្លាកលេខ ភ្នំពេញ 2AL-9459។ ដោយឡែកខ្មាន់កាំភ្លើងក្រោយពេលធ្វើសកម្មភាពរួចហើយ ក៏បានជិះរថយន្ដមួយគ្រឿង ម៉ាក Ford Ranger Rapter ពណ៌ខ្មៅ ពាក់ស្លាកលេខ ភ្នំពេញ 2BI-1413 យកទៅប្លុងចោល នៅជិតផ្សារដំរី៥ ហើយរត់គេចខ្លួនបាត់។ ប៉ុន្ដែបន្ទាប់ពីស្រាវជ្រាវរកឃើញរថយន្ដរបស់ជនដៃដល់ហើយ ទើបសមត្ថកិច្ចជំនាញបានកំណត់មុខសញ្ញា រហូតឈានដល់ការឃាត់ខ្លួនតែម្ដង។
ក្រោយពេលឃាត់ខ្លួនរួចមក សមត្ថកិច្ចបានបញ្ជូនជនសង្ស័យទាំង៣នាក់ រួមទាំងវត្ថុតាង ទៅកាន់ស្នងការដ្ឋាននគរបាលខេត្តព្រះសីហនុ ដើម្បីកសាងសំណុំរឿង ចាត់ការតាមផ្លូវច្បាប់៕