ខេត្តបន្ទាយមានជ័យ៖ ពលករខ្មែរចំនួន៣នាក់ ទើបត្រឡប់មកពីប្រទេសថៃ ហើយមិនព្រមចូលធ្វើចត្ដាឡីស័ក ក៏ត្រូវបានអាជ្ញាធរយករថយន្ដមកដឹកទាំងគ្រួសារ កាលពីថ្ងៃទី១៧ ខែមករា ឆ្នាំ២០២១ ស្ថិតក្នុងភូមិព្រៃឫស្សីសង្កាត់ព្រះពន្លា ក្រុងសិរីសោភ័ណ ដើម្បីនាំទៅធ្វើចត្ដាឡីស័ក។
លោក ហ៊ឹល រ៉ាយ៉ា អភិបាលក្រុងសិរីសោភ័ណ បានបញ្ជាក់ថា អាជ្ញាធរមូលដ្ឋានភូមិ-សង្កាត់ បានរាយការណ៍មកថា មានបងប្អូនប្រជាពលរដ្ឋចំនួន៣នាក់ ទើបនឹងត្រឡប់មកពីប្រទេសថៃ មិនព្រមចូលធ្វើចត្តាឡីស័ក។ បន្ទាប់ពីមានសេចក្ដីរាយការណ៍បែបនេះ និងមានការណែនាំពីលោក អ៊ុំ រាត្រី អភិបាលខេត្តបន្ទាយមានជ័យ ផង លោកបានឲ្យក្រុមការងារយករថយន្តសាមុយ១គ្រឿង មកដឹកពួកគាត់ទាំង៣គ្រួសារ ដើម្បីនាំតៅធ្វើចត្តាឡីស័ក នៅមណ្ឌលវិទ្យាល័យសម្តេចឪ ក្រុងសិរីសោភ័ណ។
លោកអភិបាលក្រុងសិរីសោភ័ណ បានបញ្ជាក់ថា ពួកគាត់ទាំង៣គ្រួសារនេះ រស់នៅភូមិព្រៃឫស្សី សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។ សកម្មភាពរបស់ពួកគាត់តែ៣នាក បាននាំទុក្ខដល់ក្រុមគ្រួសារ។ រីឯអាជ្ញាធរធ្វើបែបនេះ ក៏ដើម្បីបង្ការ និងទប់ស្កាត់កូវីដ-១៩ មិនឱ្យកើតមានក្នុងសហគមន៍។ អាជ្ញាធរត្រូវតែអនុវត្តតាមការណែនាំរបស់ក្រសួងសុខាភិបាលកម្ពុជា ត្រូវពង្រឹងការត្រួតពិនិត្យ និងធ្វើចត្តាឡីស័ក ចំពោះបងប្អូនប្រជាពលរដ្ឋ ដែលត្រឡប់ពីប្រទេសថៃ។ ពលរដ្ឋទាំងនោះត្រូវអនុវត្តការធ្វើចត្តាឡីស័ក រយៈពេល១៤ថ្ងៃ នៅក្នុងមណ្ឌល ដែលត្រូវបានត្រួតពិនិត្យសុខភាព និងធ្វើតេស្តសំណាក។
ជាមួយគ្នានេះដែរ លោក លី សុវណ្ណារិទ្ធ អភិបាលស្រុកអូរជ្រៅ បានបញ្ជាក់ថា ចាប់ពីថ្ងៃទី២០ ខែធ្នូ ឆ្នាំ២០២០ ដល់ថ្ងៃទី១៧ ខែមករា ឆ្នាំ២០២១ មានប្រជាពលរដ្ឋត្រឡប់ពីប្រទេសថៃ និងភាគីថៃ ចាប់បញ្ជូនតាមច្រកអូរបីជាន់ ស្រុកអូរជ្រៅ មានចំនួន៥ ៤៩៤នាក់ ហើយក្នុងនោះមានស្រីចំនួន២ ៤៣៥នាក់ផងដែរ។
លោកវេជ្ជបណ្ឌិត រឿន សុធី អនុប្រធានមន្ទីរសុខាភិបាលខេត្តបន្ទាយមានជ័យ បានបញ្ជាក់ថា ប្រជាពលរដ្ឋត្រឡប់ពីប្រទេសថៃ តាមច្រកជាច្រើន រួមមាន ច្រកអូរជាន់ (ស្រុកអូរជ្រៅ) ច្រកម៉ាឡៃ (ស្រុកម៉ាឡៃ) និងច្រកបឹងត្រកួន (ស្រុកថ្មពួក) ។ រីឯពលរដ្ឋ ដែលតម្រូវឲ្យធ្វើចត្តាឡីស័ក រយៈពេល១៤ថ្ងៃនោះ មានចំនួន៩ ០៣០នាក់ ក្នុងនោះស្រី៣ ៨៩៧នាក់។ ចំណែកមន្រ្ដីជំនាញបានយកសំណាក់ពីពលរដ្ឋ ចំនួន៩ ៩៣៥នាក់ ហើយក្នុងនោះស្រី៤ ៣២៥នាក់ ហើយអ្នកបានបញ្ចប់ការធ្វើចត្តាឡីស័ក ត្រូវអនុញ្ញាឲ្យត្រឡប់ទៅផ្ទះវិញ មានចំនួន ៤ ៩៤៤នាក់ ក្នុងនោះស្រី២ ០៨៩នាក់។ ដោយឡែកអ្នកកំពុងបន្តធ្វើចត្តាឡីស័ក រយៈពេល១៤ថ្ងៃ មានចំនួន២ ៥៨៣នាក់ ក្នុងនោះស្រី១ ១០០នាក់ វិជ្ជមានកូវីដ-១៩ មានចំនួន៣៤នាក់ ក្នុងនោះស្រី២៥នាក់ និងប្រុស៩នាក់៕
