ខេត្តតាកែវ៖ ប្រជាពលរដ្ឋរស់នៅក្នុងក្រុងដូនកែវ តែងតែលើកឡើងថា មានជនខិលខូចនាំគ្នាលួចឆក់ត្រី នៅក្នុងបឹងតាកែវ ទើបធ្វើឲ្យត្រី នៅក្នុងបឹងនោះខ្សត់ ហើយសកម្មភាពបែបនេះ នឹងនាំឲ្យត្រី នៅក្នុងបឹងឈានទៅរកការវិនាសហិនហោចអស់។
ប្រជាពលរដ្ឋជាអ្នកនេសាទត្រី ដោយការស្ទូច បានបន្ដថា កាលពីមុន ត្រីនៅក្នុងបឹងតាកែវនេះសម្បូរណាស់។ ប៉ុន្ដែនៅពេលនេះ ត្រីបានចាប់ផ្តើមខ្សត់ទៅៗ ដោយសារមានអ្នកលួចឆក់ត្រី។ ជនខិលខូចទាំងនោះ ភាគច្រើនតែជិះតាមទូកឆក់ត្រី នៅពាក់កណ្តាលអធ្រាត្រស្ទើររៀងរាល់ថ្ងៃ។ ករណីនេះប្រសិនបើមន្ត្រីជំនាញមិនជួយអន្តរាគមន៍ទប់ស្កាត់ឲ្យបន្ទាន់ទេ ត្រីនៅក្នុងបឹងតាកែវ ដែលជាតំបន់អភិរក្សនេះ នឹងហិនហោចអស់ជាមិនខាន។
លោក សៅ កុសល្យ នាយខណ្ឌរដ្ឋបាលជលផលខេត្តតាកែវ បានឲ្យដឹងថា ក្រោយពេលបងប្អូនប្រជាពលរដ្ឋ រាយការណ៍មកថា មានសកម្មភាពលួចឆក់ត្រី នៅក្នុងបឹងតាកែវ ទើបធ្វើឲ្យត្រី នៅក្នុងបឹងនេះកាន់តែបាត់បង់ទៅ។ ប៉ុន្ដែបន្ទាប់ពីមានសេចក្ដីរាយការណ៍បែបនេះ លោកនិងក្រុមមន្ត្រីជំនាញបានលួចឃ្លាំមើល ក៏ឃើញមានសកម្មភាពលួចឆក់ត្រី នៅក្នុងបឹងនេះប្រាកដមែន។
នាយខណ្ឌរដ្ឋបាលជលផលខេត្តតាកែវ បានបន្ដថា បន្ទាប់ពីឃើញមានអ្នកប្រព្រឹត្ដល្មើសបែបនេះ មន្ត្រីជំនាញបានឃាត់ខ្លួនអ្នកឆក់ម្នាក់ រួមជាមួយវត្ថុតាង ហើយកសាងសំណុំរឿង បញ្ជូនជននោះទៅកាន់សាលាដំបូងខេត្តតាកែវ កាលពីដើមខែមករា ឆ្នាំ២០២១កន្លងមកនេះ៕