ខេត្តប៉ៃលិន៖ ប្រជាពលរដ្ឋរស់នៅខេត្តប៉ៃលិន តែងតែចេញចូល ប្រទេសថៃ ជាញឹកញាប់ ហើយនៅពេលប្រទេសនេះ (ថៃ) កំពុងឈមនឹងការឆ្លងកូវីដ-១៩ខ្លាំងផងនោះ ទើបបណ្ដាលឲ្យមានការចម្លងមេរោគដ៏កាចសាហាវ មកលើពលរដ្ឋខែ្មរយើងផងដែរ។។
បើតាមអាជ្ញាធរខេត្តប៉ៃលិន បានឲ្យដឹងថា បើគិតត្រឹម ថ្ងៃទី៦ ខែមករា ឆ្នាំ២០២១ មានពលករខ្មែរ មកពីថៃចូលមកខេត្តប៉ៃលិន ចំនួន១០១០នាក់ (ស្រី៤៩៨នាក់) ហើយក្នុងចំណោមពលរដ្ឋទាំងនោះបានរកឃើញមានអ្នកឆ្លងកូវីដ-១៩ ចំនួន១៣នាក់ផងដែរ។
លោក អ៊ុន ប៊ុនលី នាយករដ្ឋបាលសាលាខេត្តប៉ៃលិន បានឲ្យដឹងថា ក្នុងចំណោមពលករខ្មែរជាង១ពាន់នាក់នោះ មានអ្នកធ្វើចត្តាឡីស័ក សរុបចំនួន៣៦៦នាក់ ដោយធ្វើចត្តាឡីស័ក នៅមណ្ឌលចំនួន២៣៥នាក់ និងធ្វើចត្តាឡីស័កនៅតាមផ្ទះចំនួន១៣១នាក់។ រីឯអ្នកបានបញ្ចប់ការធ្វើចត្តាឡីស័ក មានចំនួន៧នាក់។
នាយករដ្ឋបាលសាលាខេត្តប៉ៃលិន បានបញ្ជាក់ថា មន្រ្ដីជំនាញរបស់យើងបានយកសំណាកពលករចំនួន២៨៨នាក់ (ស្រី១៤៣នាក់) ទៅវិភាគ ស្វែងរកវីរុសកូវីដ-១៩ ដោយលទ្ធផលបង្ហាញថា មានលទ្ធផលអវិជ្ជមាន ចំនួន២៧៥នាក់ និងវិជ្ជមានវីរុស ចំនួន១៣នាក់ (ស្រី១២)។
បើគិតមកដល់ម៉ោង៧ព្រឹក ថ្ងៃទី៧ ខែមករា ឆ្នាំ២០២១ នៅកម្ពុជាបានរកឃើញអ្នកឆ្លងជំងឺកូវីដ-១៩ សរុប៣៨៥នាក់ ក្នុងនោះអ្នកជាសះស្បើយចំនួន ៣៦២នាក់ និងអ្នកកំពុងសម្រាកព្យាបាលនៅមន្ទីរពេទ្យចំនួន ២៣នាក់៕
