ភ្នំពេញ៖ បុរសម្នាក់បានឈ្លោះប្រកែកគ្នាជាមួយប្រពន្ធ រហូតទប់កំហឹងរបស់ខ្លួនលែងបាន ក៏បើកត្រីចក្រយានយន្ដ (កង់បី) ឡើងលើស្ពានជ្រោយចង្វា ហើយលោតទឹកសម្លាប់ខ្លួន បង្កឲ្យឲ្យភ្ញាក់ផ្អើលឡើង កាលពីវេលាម៉ោង៧ និង៥០នាទីយប់ ថ្ងៃទី៦ ខែមករា ឆ្នាំ២០២១ នៅលើស្ពានជ្រោយចង្វាថ្មី សង្កាត់ស្រះចក ខណ្ឌដូនពេញ។
បើតាមសម្ដីរបស់លោក សំ ឧត្ដម ជាបងបង្កើតរបស់បុរសដែលលោតទឹកសម្លាប់ខ្លួននោះ បានឱ្យដឹងថា ប្អូនប្រុសរបស់គាត់ ឈ្មោះ សំ បញ្ញា អាយុ២៤ឆ្នាំ មុខរបររត់កង់បី និងប្រពន្ធ មានស្រុកកំណើតនៅភូមិព្រៃតាបេស ឃុំពោធិ៍ ស្រុកស្រីសន្ធរ ខេត្តកំពង់ចាម។ ប៉ុន្ដែពួកគេ ស្នាក់នៅផ្ទះជួល នៅភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។
លោក សំ ឧត្ដម បានបន្ថែមថា មុនពេលកើតហេតុ ប្អូនប្រុសរបស់គាត់ និងប្រពន្ធរបស់គេបានទៅផឹកស៊ី នៅផ្ទះរបស់គាត់ ស្ថិតក្នុងសង្កាត់ព្រែកលៀប ដើម្បីពិភាក្សាគ្នា អំពីរឿងធ្វើបុណ្យខួបគម្រប់៣ឆ្នាំឲ្យម្តាយ នៅថ្ងៃទី៧ ខែមករា។ លុះពេលផឹកស៊ីស្រវឹង ស្រាប់តែប្អូនប្រុសគាត់បានទាស់ពាក្យសម្តីគ្នាជាមួយប្រពន្ធរបស់គេ ធ្វើឲ្យគេខឹងយ៉ាងខ្លាំង ហើយឡើងបើកកង់បីចេញទៅបាត់ ដោយមិនបានប្រាប់អ្នកណាឡើយ។ ប៉ុន្ដែរហូតមកដល់វេលាម៉ោង៩យប់ ស្រាប់តែសមត្ថកិច្ចទាក់ទងទៅប្រពន្ធរបស់ប្អូនប្រុសរបស់គាត់ថា ប្អូនប្រុសរបស់គាត់បានលោតទឹកសម្លាប់ខ្លួន ទើបពួកគាត់បាននាំគ្នាមកមើល។
ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ ពួកគាត់បានឃើញបុរសម្នាក់បើកកង់បីឥណ្ឌា ពណ៌សលាយក្រហម ពាក់ស្លាកលេខ ភ្នំពេញ 1HJ-8498 ឡើងមកលើស្ពានជ្រោយចង្វា ក្នុងទិសដៅពីកើតទៅលិច។ លុះពេលបើកមកដល់ពាក់កណ្តាលស្ពាន ស្រាប់តែបុរសម្នាក់នោះ បានឈប់កង់បីអែបកៀន ហើយលោតចុះទៅទឹកទន្លេតែម្តង។
ក្រោយពេលកើតហេតុ សមត្ថកិច្ចបានចុះទៅពិនិត្យ និងយកកង់បីទៅរក្សាទុកបណ្តោះអាសន្ននៅប៉ុស្តិ៍នគរបាលស្រះចក ហើយរង់ចាំសាច់ញាតិយកឯកសារមក ទើបប្រគល់ជូនវិញ។ ចំណែកប្រពន្ធបានជួលទូករបស់អ្នកនេសាទស្វែងរកសពប្តី ដើម្បីនាំយកមកធ្វើបុណ្យតាមប្រពៃណី៕