រាជធានីភ្នំពេញ៖ ក្រោយពេលកើតមានករណីបាញ់សម្លាប់យ៉ាងសាហាវឃោរឃៅលើលោកនាយរងការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញរួចមក កម្លាំងនគរបាលជំនាញ បានបើកការស្រាវជ្រាវ រហូតឈានដល់ការឃាត់ខ្លួនបក្ខពួក ប្រពន្ធ និងបងប្អូនសាច់ថ្លៃរបស់ជនដៃដល់ជាបន្តបន្ទាប់ ហើយនៅព្រឹក ថ្ងៃទី៥ ខែមករា ឆ្នាំ២០២១នេះ សមត្ថកិច្ចចម្រុះបានបន្ដចុះឆែកឆេរផ្ទះរបស់ជនសង័្សយ (ផ្ទះលេខលេខ B9) ផ្លូវបេតុងបុរីទឹម សាខន ស្ថិតក្នុងភូមិតាកេរ សង្កាត់កំបូល ខណ្ឌកំបូល។
មន្រ្ដីនគរបាលខណ្ឌកំបូល បានឲ្យដឹងថា ការចុះទៅពិនិត្យផ្ទះរបស់ជនដៃដល់ខាងលើនេះ គឺដើម្បីស្វែងរកវត្ថុតាងផ្សេងៗបន្ថែមទៀត រួមទាំងកាំភ្លើងខ្លីដែលជននោះ បានប្រើប្រាស់ក្នុងការបាញ់សម្លាប់លោក រ៉េត ស៊ីណែត នាយរងការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានី។ ម្យ៉ាងទៀត សមត្ថកិច្ចខ្លាចជនសង័្សយលាក់ទុកអ្វីវត្ថុតាងអ្វីផ្សេងទៀត នៅក្នុងផ្ទះមួយនេះ។
មន្រ្ដីនគរបាលខណ្ឌកំបូល បានបន្ថែមថា ក្រោយពេលពិនិត្យជាក់ស្តែង គឺផ្ទះរបស់ជនសង្ស័យបានចាក់សោទុកចោល គ្មានមនុស្សនៅឡើយ ហើយការឆែកនេះក៏មិនឃើញមានអ្វីដែរ។ បន្ទាប់មក គណៈកម្មការចម្រុះ ក្រោមការដឹកនាំ ដោយលោកព្រះរាជអាជ្ញាអមអយ្យការសាលាដំបូងរាជធានីភ្នំពេញ បានសម្រេចឃ្លុំបេចាក់សោផ្ទះទុក រួចប្រគល់ទៅឲ្យអាជ្ញាធរ និងសមត្ថកិច្ចមូលដ្ឋាន តាមឃ្លាំមើលបន្តទៀត។ ប៉ុន្ដែបើមានអ្វីប្លែកត្រូវរាយការណ៍ជូនថ្នាក់លើភ្លាម ដើម្បីមានចំណាត់ការបន្តទៀត។
សូមជម្រាបថា កាលពីវេលាម៉ោង១២ និង៥នាទីយប់រំលងអធ្រាត្រ ឈានចូលថ្ងៃទី៣០ ខែធ្នូ ឆ្នាំ២០២០ មានករណីបាញ់ប្រហារគ្នាមួយ នៅតាមមហាវិថីសហព័ន្ធរុស្ស៊ី ត្រង់ចំណុចមុខផ្ទះសំណាក់«សាំងហ័រទៀន» ទល់មុខអាកាសយានដ្ឋានអន្តរជាតិភ្នំពេញ ស្ថិតក្នុងភូមិក្បាលដំរីទី២ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ។ នៅក្នុងហេតុការណ៍នោះ ក្រុមជនដៃដល់ បានបាញ់ប្រហារទៅលើនាយរងការិយាល័យនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញម្នាក់ បណ្តាលឱ្យស្លាប់មួយរំពេច ។ ករណីឃាតកម្មយ៉ាងសាហាវឃោរឃៅនេះ បានផ្ដើមចេញពីរឿងគ្រោះថ្នាក់ចរាចរណ៍។
ប្រភពព័ត៌មានពីកន្លែងកើតហេតុ បានឲ្យដឹងថា ក្រុមជនដៃដល់ បានជិះរថយន្តម៉ាក Lexus RX-300 ពណ៌ខ្មៅ១គ្រឿង ពាក់ស្លាកលេខ សៀមរាប 2A-4546 បានបើកបុកគូទរថយន្តម៉ាក FORD Raptor F-150 ពណ៌ស ពាក់ស្លាកលេខ ភ្នំពេញ 2BD-3738 របស់ជនរងគ្រោះ បណ្ដាលឲ្យរងការខូចខាត ហើយពួកគេប្រុងគេចខ្លួន ប៉ុន្ដែជនរងគ្រោះបានដកកាំភ្លើងភ្ជង់ឲ្យឈប់ ។ ស្របពេលជនរងគ្រោះភ្លេចខ្លួន ស្រាប់តែជនដៃដល់ បានដកកាំភ្លើងបាញ់ជាច្រើនគ្រាប់ រួចហើយគេចខ្លួនបាត់តែម្ដង។
ប្រភពព័ត៌មានដដែល បានបន្ដថា ជនរងគ្រោះឈ្មោះរ៉េត ស៊ីណែត ហៅញ៉ក់ អាយុ៣៩ឆ្នាំ ជាមន្ត្រីនគរបាលមានឋានន្តរស័ក្ដិវរសេនីយ៍ទោ និងមានតួនាទីជានាយរងការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ មានទីលំនៅបច្ចុប្បន្នផ្ទះលេខ១៦៩ ផ្លូវលេខ១៦៩ ភូមិ៤ សង្កាត់វាលវង់ ខណ្ឌ៧មករា រាជធានីភ្នំពេញ។ ជនរងគ្រោះ ត្រូវបានជនដៃដល់បាញ់ត្រូវខ្នង ចំនួន៣គ្រាប់ និងថ្ងាស១គ្រាប់ បណ្ដាលឲ្យបាត់បង់ជីវិត ខណៈបញ្ជូនទៅសង្គ្រោះដល់មន្ទីរពេទ្យ ។
ប្រភពព័ត៌មានដដែល បានបន្ដថា បន្ទាប់មកកម្លាំងនគរបាលនាយកដ្ឋានព្រហ្មទណ្ឌក្រសួងមហាផ្ទៃ បានសហការជាមួយកម្លាំងស្នងការដ្ឋាននគរបាលរាជធានីភ្នំពេញ បានបើកការស្រាវជ្រាវ រហូតកំណត់បានមុខសញ្ញាជនដៃដល់។ លុះមកដល់ថ្ងៃទី៣ ខែមករា ឆ្នាំ២០២១ ទើបកម្លាំងសមត្ថកិច្ចចម្រុះ សហការជាមួយនឹងកម្លាំងស្នងការដ្ឋាននគរបាលខេត្តបាត់ដំបង បានឃាត់ខ្លួនជនសង្ស័យម្នាក់ឈ្មោះ កែ ចាន់មាន (ជាអ្នកបើករថយន្ត) នៅផ្ទះជួលជិតបច្ឆាវត្តទួលតាឯក ស្ថិតក្នុងភូមិអូរតាគាំ១ សង្កាត់ទួលតាឯក ក្រុងបាត់ដំបង។ បន្ទាប់មកកម្លាំងនគរបាលបានតាមចាប់ជនដៃដល់បន្តទៀត ហើយកាលពីវេលាម៉ោង៩ និង៥០នាទីយប់ថ្ងៃទី៤ ខែមករា ជនដៃដល់បានបើករថយន្តចេញពីខេត្តស្ទឹងត្រែង ឆ្ពោះទៅកាន់ខេត្តរតនគីរី ហើយបន្តចូលទៅកាន់ខេត្តមណ្ឌលគិរី។ ប៉ុន្ដែនៅពេលជនសង័្សយទៅដល់ស្រុកកោះ ញែក ក៏បានបើករថយន្តបំបុកបារ៉ាស់សមត្ថកិច្ច ហើយរត់គេចចូលព្រៃបាត់។ ប៉ុន្តែពេលនោះកម្លាំងបានឃាត់ខ្លួនស្ត្រី២នាក់ និងក្មេងម្នាក់ដែលត្រូវជាប្រពន្ធ កូន និងប្អូនសាច់ថ្លៃរបស់ជនសង្ស័យ៕