រាជធានីភ្នំពេញ៖ កញ្ញា ពេជ្រ វត្តីសារ៉ាវឌ្ឍី ជាបេក្ខនារីពាក់ស្លាកលេខ៩ រហូតមកដល់ពេលនេះ កំពុងតែធ្វើឲ្យមហាជន ភ្ញាក់ផ្អើលកាន់ខ្លាំងឡើងជាមួយរូបសម្ផស្ស ដ៏ស្រស់ស្អាតរបស់នាង រួមជាមួយនឹងសមត្ថភាពរបសើនាង កាន់តែធ្វើឲ្យមានការចាប់អារម្មណ៍ខ្លាំងឡើងថែមទៀត មុនថ្ងៃគ្រងមកុដ MISS CAMBODIA 2020 មកដល់។
កញ្ញា ពេជ្រ វត្តីសារ៉ាវឌ្ឍី បាននិងកំពុងតែធ្វើឲ្យមហាជនចាប់អារម្មណ៍ខ្លាំងឡើងបន្ថែមទៀត ក្រោយពេលនាងទទួលបានពានរង្វាន់ កាន់ក្នុងដៃមួយរួចជាស្រេច នៅក្នុងថ្ងៃប្រកួតបឋមកាលពីរាត្រី ថ្ងៃទី១៨ ខែធ្នូ ឆ្នាំ២០២០។ កញ្ញា ពេជ្រ វត្តីសារ៉ាវឌ្ឍី ក៏ត្រូវបានគេស្គាល់ថា ជាតារាសម្តែងស្រី និងបង្ហាញម៉ូដដ៏មានទេពកោសល្យម្នាក់ ហើយនាងកំពុងសាងកេរ្ដិ៍ឈ្មោះបោះសំឡេង លេចធ្លោខ្លាំង នៅក្នុងកម្មវិធីប្រកួត និងមុនរាត្រីគ្រងមកុដ។
កញ្ញា ពេជ្រ វត្តីសារ៉ាវឌ្ឍី មានអាយុ២១ឆ្នាំ កម្ពស់ ១,៧៧ម៉ែត្រ មានស្រុកកំណើតនៅឯប៉ែកនិរតី (ខេត្តព្រះសីហនុ) នៃប្រទេសកម្ពុជា ហើយបច្ចុប្បន្ន នាងបានក្លាយជាតារាសម្តែង និងបង្ហាញម៉ូដផងដែរ។ កញ្ញា ពេជ្រ វត្តីសារ៉ាវឌ្ឍី ធ្លាប់ចូលរួមសម្តែង ក្នុងភាពយន្តរឿងភាគ ភាពយន្តខ្លី និងភាពយន្តអប់រំមួយចំនួន ក្នុងតំណែងជាតួឯក មានដូចជា រឿង «ប្តីគេ» និង«ខ្មោចខ្លឹមត្រាច»ជាដើម។
ដោយសារតែរូបសម្ផស្ស និងទេពកោសល្យនេះហើយ ទើបកញ្ញា ពេជ្រ វត្តីសារ៉ាវឌ្ឍី បានជាប់ពានកញ្ញាឯកថតរូបស្អាត ដោយស្វ័យប្រវត្តិ ដើម្បីឲ្យនាងចូលទៅកាន់វគ្គ១២រូបចុងក្រោយ នៅក្នុងកម្មវិធីប្រកួតផ្តាច់ព្រ័ត្រ ដែលនឹងត្រូវធ្វើឡើងនៅថ្ងៃទី២៣ ខែធ្នូឆ្នាំ២០២០ខាងមុខនេះ។
ក្រៅពីទម្រង់មុខដ៏ប្រកបដោយការទាក់ទាញ កញ្ញា ពេជ្រ វត្តីសារ៉ាវឌ្ឍី មានកម្ពស់ដ៏ខ្ពស់សមសួន គួបផ្សំជាមួយនឹងចំណេះដឹងដ៏គួឲ្យសរសើរថែមទៀតផង រហូតមានអ្នកគាំទ្រជាច្រើនបានដាក់ក្តីរំពឹងថា កញ្ញា ពេជ្រ វត្តីសារ៉ាវឌ្ឍី នឹងក្លាយជាម្ចាស់មកុដ ប្រសិនបើនាងធ្វើបានល្អក្នុងថ្ងៃប្រកួតចុងក្រោយនេះ។
កញ្ញា ពេជ្រ វត្តីសារ៉ាវឌ្ឍី បានបង្ហាញខ្លួនជាផ្លូវការលើឆាកប្រកួតជាលើកដំបូង នាងទទួលបានការចាប់អារម្មណ៍ និងកោតសរសើរយ៉ាងខ្លាំង ពីក្រុមបណ្តាញសង្គម ដោយកោតសរសើរថា កញ្ញា ពេជ្រ វត្តីសារ៉ាវឌ្ឍី ពិតជាមានរូបសម្រស់ស្រស់ស្អាត និងសមត្ថភាពមិនធម្មតាមែន។
កញ្ញាពេជ្រ វត្តីសារ៉ាវឌ្ឍី មានបំណងចូលរួមប្រកួតក្នុងកម្មវិធីកញ្ញាឯកជាច្រើនលើកច្រើនសាមកហើយ ប៉ុន្តែនាងបានខកខាន ដោយសារតែជាប់កិច្ចសន្យាជាមួយនឹងការសម្តែងភាពយន្ត ។ រីឯការចូលរួមប្រកួត នាពេលនេះក៏ជាឱកាសដ៏ល្អបំផុត សម្រាប់នាង ដែលអាចទទួលចំណាត់ថ្នាក់ណាមួយ នៅក្នុងថ្ងៃប្រកួតផ្តាច់ព្រ័ត្រ ឬក៏អាចគ្រងមកុដថែមទៀតផង ព្រោះតែនាងមានសម្រស់ និងសមត្ថភាពលេចធ្លោ ។
ទោះជាយ៉ាងណា គេនៅតែមិនអាចប៉ាន់ប្រមាណបាននៅឡើយ ហើយប្រសិនបបើកញ្ញា ពេជ្រ វត្តីសារ៉ាវឌ្ឍី ធ្វើបានល្អ នៅក្នុងវគ្គចុងក្រោយ នាងអាចនឹងក្តាប់ឱកាសជោគជ័យបានខណៈវគ្គឆ្លើយសំណួរពីគណៈកម្មការបានល្អ៕
