រាជធានីភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្ដី នៃព្រះរាជាណាចក្រកម្ពុជា បានថ្លែងថា លោក ឆែម សាវុធ អគ្គនាយកពន្ធនាគារ នៃក្រសួងមហាផ្ទៃ និងក្រុមគ្រួសាររបស់លោក គឺជាជនរងគ្រោះ ដោយសារជំងឺកូវីដ-១៩។
មានប្រសាសន៍ថ្លែងសារផ្ញើទៅកាន់ជនរួមជាតិ ពាក់ព័ន្ធនឹងស្ថានភាពជំងឺកូវីដ-១៩ និងការទិញវ៉ាក់សាំង ជំងឺកូវីដ-១៩នេះ សម្តេចតេជោ បានបញ្ជាក់ថា មានមតិមួយចំនួន ចង់ឲ្យលោក ឆែម សាវុធ សម្រាកពីការងារ ក្រោយពេលរកឃើញថា លោក និងក្រុមគ្រួសារ បានកើតជំងឺកូវីដ-១៩ ។ ប៉ុន្ដែក្រោយការស្រាវជ្រាវ បានបង្ហាញថា លោក ឆែម សាវុធ អគ្គនាយកពន្ធនាគារ នៃក្រសួងមហាផ្ទៃ និងក្រុមគ្រួសារ គឺជាជនរងគ្រោះ ដោយសារជំងឺកូវីដ-១៩។
លោក ឆែម សាវុធ អគ្គនាយពន្ធនាគារ នៃក្រសួងមហាផ្ទៃ និងមនុស្សពីរនាក់ទៀត ពាក់ព័ន្ធនឹងក្រុមគ្រួសាររបស់លោក ត្រូវបានប្រកាសជាសះស្បើយ ពីជំងឺកូវីដ-១៩ នៅថ្ងៃទី១៥ ខែធ្នូ នេះ។ លោក ឆែម សាវុធ បានធ្វើតេស្តអវិជ្ជមាន ចំនួន៣ដង មុននឹងត្រូវបានអនុញ្ញាតឱ្យចេញពីមន្ទីរពេទ្យមិត្តភាពខ្មែរ-សូវៀត។ ដោយឡែកអ្នកពាក់ព័ន្ធនឹងក្រុមគ្រួសាររបស់លោក ចំនួន២នាក់ទៀត ក៏បានធ្វើតេស្តអវិជ្ជមានកូវីដ-១៩ ចំនួន២ដង ហើយបានអនុញ្ញាតឱ្យចេញពីមន្ទីរពេទ្យមិត្តភាពខ្មែរ-សូវៀត រាជធានីភ្នំពេញផងដែរ៕