រាជធានីបាងកក៖ ប៉ូលិសបានយកទូកុងតឺន័រ មកបិទផ្លូវ ដើម្បីទប់ទល់ក្រុមបាតុករ ដែលនាំគ្នា មកឡោមព័ទ្ធការិយាល័យព្រះរាជទ្រព្យរបស់ព្រះមហាក្សត្រ ប៉ុន្ដែសកម្មភាពរបស់ប៉ូលិសបែបនេះ បានធ្វើឲ្យមានការកកស្ទះចរាចរណ៍ជាច្រើនកន្លែង នៅក្នុងទីក្រុងបាងកក។
បើតាមសារព័ត៌មានថៃ The Nation បានផ្សាយថា ប៉ូលិសថៃ នៅថ្ងៃទី២៥ ខែវិច្ឆិកា ឆ្នាំ២០២០ បានយកទូកុងតឺន័រជាច្រើនគ្រឿង មកដាក់គរបិទផ្លូវនានា នៅជិតការិយាល័យព្រះរាជទ្រព្យរបស់ព្រះមហាក្សត្រ នៅក្នុងខណ្ឌ Dusit នាទីក្រុងបាងកក។ នៅទីនោះជាទីដែលក្រុមបាតុករគាំទ្រលទ្ធិប្រជាធិបតេយ្យ បានប្រមូលផ្ដុំគ្នា ធ្វើបាតុកម្ម។ ប៉ុន្ដែសកម្មភាពរបស់ប៉ូលិសបែបនេះ បានបណ្ដាលឲ្យមានការស្ទះចរាចរណ៍យ៉ាងខ្លាំង។
ការធ្វើបាតុកម្មរបស់ក្រុមយុវជនថៃនេះ បានកើតឡើង អស់រយៈពេលជាច្រើនខែមកហើយ ដោយពួកគេទាមទារចំណុចសំខាន់ៗជាច្រើន រួមមាន ទាមទារឲ្យលោក ប្រាយុទ្ធ ចាន់អូចា ចុះចេញពីតំណែង, ធ្វើវិសោធនកម្មរដ្ឋធម្មនុញ្ញឆ្នាំ២០១៧ ដែលតាក់តែងឡើងដោយរបបយោធា និងធ្វើកំណែទម្រង់របបរាជានិយម៕
