រាជធានីបាងកក៖ ក្រោយពេលក្រុមបាតុករ កាន់តែប្រមូលផ្ដុំគ្នា ធ្វើបាតុកម្មយ៉ាងពុះកញ្ជ្រោលឡើង រហូតសភាថៃ កោះប្រជុំវិសាមញ្ញ ស្វែងរកដំណោះស្រាយ បញ្ចប់ភាពវឹកវរ នៅក្នុងប្រទេស ហើយសមាជិកសភា មកពីបក្សប្រឆាំង បង្កើនការដាក់សម្ពាធ កាន់តែខ្លាំងឡើងបន្ថែមទៀត និងជំរុញឲ្យលោក ប្រាយុទ្ធ ចាន់អូចា ចុះចេញពីតំណែងយ៉ាងណាក្ដី ក៏លោកនាយករដ្ឋមន្រ្ដីថៃ បានប្ដេជ្ញាថា លោកនឹងនៅតែបន្ដ កាន់អំណាចនេះទៅមុខទៀត។
លោក ប្រាយុទ្ធ ចាន់អូចា នាយករដ្ឋមន្រ្តីថៃ កាលពីថ្ងៃទី២៧ ខែតុលា ឆ្នាំ២០២០ ថ្លែងយ៉ាងច្បាស់ នៅក្នុងរដ្ឋសភាថា «លោកនឹងមិនលាលែងពីតំណែង ឬរត់ចេញពីបញ្ហា នាពេលនេះ ខណៈប្រទេសជាតិកំពុងតែប្រឈមនឹងវិបត្តិនោះឡើយ»។ លោកនាយករដ្ឋមន្រ្ដី បានឆ្លើយតបទៅនឹងសំណើរបស់ក្រុមតំណាងរាស្រ្ដ មកពីបក្សប្រឆាំងដ៏ធំជាងគេបំផុតរបស់ប្រទេសថៃ (បក្សភឿថៃ) ដែលជំរុញឲ្យលោកចុះចេញពីតំណែងថា បើលោកចុះចេញពីតំណែង ចំពេលប្រទេសកំពុងតែកើតមានវិបត្ដិបែបនេះ តើលោកដឹងថា អ្វីនឹងកើតឡើង សម្រាប់ប្រទេសជាតិទេ?
លោកនាយករដ្ឋមន្រ្ដី បានប្រាប់ដល់សមាជិកសភា ជាពិសេស បក្សប្រឆាំងថា « សូមលោកក្រឡេកមើល អតីតកាល ការធ្វើបាតុកម្មនយោបាយ នាអំឡុងឆ្នាំ២០០៦ និង២០១៤ ឡើងវិញមើល អ្នកកាន់អំណាច នាពេលនោះ ក៏មិនបានចុះចេញពីតំណែងនោះដែរ។ដូច្នេះបញ្ហានេះ លោកសូមមិនអនុវត្ដតាម ហើយសំណើនេះ ក៏មិនមែនជាតំណាងឲ្យប្រជាពលរដ្ឋ ភាគច្រើនបំផុតនោះដែរ។ ទោះជាយ៉ាងណា លោកមិនរត់គេចចេញ អំពីបញ្ហា ឬក៏បោះបង់ចោលប្រទេស នៅក្នុងអំឡុងពេលមានភាពវឹកវរនេះដែរ។
លោកនាយករដ្ឋមន្រ្ដី បានបន្ថែមថា «លោកសូមសួរទៅអស់លោកវិញ ថាតើជ័យជម្នះ ដែលអ្នកទទួលបានមកពីការបែកបាក់ប្រទេសនោះ តើវានឹងមានតម្លៃដែរ ឬទេ? ព្រោះនៅពេលនោះ យើងក៏មិនមានអ្វីត្រូវផ្លាស់ប្តូរនោះដែរ។ ចូលអស់លោក គិតអំពីយុវជន ហើយសូមកុំប្រើពួកគេ ដើម្បីជំរុញចលនានយោបាយឲ្យសោះ»។
ទោះជាយ៉ាងណា លោក ប្រាយុទ្ធ ចាន់អូចា នាយករដ្ឋមន្រ្ដីថៃ បានថ្លែងអំណរគុណដល់សមាជិករដ្ឋសភាទាំងអស់ ដែលបានបញ្ចេញទស្សនៈរបស់ខ្លួន ហើយលើកឡើង អំពីដំណោះស្រាយនយោបាយនេះ។ លោកសន្យាថា នឹងយកគំនិតទាំងនេះ មកដោះស្រាយ ដោយផ្អែកលើស្ថានភាពពិតប្រាកដ។ ជាមួយគ្នានេះដែរ រដ្ឋភិបាលកំពុងតែធ្វើការងារលើបញ្ហានេះ ដើម្បីធ្វើឲ្យសេដ្ឋកិច្ច ដើរទៅមុខ។ រីឯអាទិភាព គឺដោះស្រាយបញ្ហាអត់ការងារធ្វើ និងផ្ដល់សុខុមាលភាពដល់មនុស្សទាំងអស់ ដែលរងផលប៉ះពាល់។
ដោយឡែក តំណាងរាស្រ្ដ មកពីបក្ស Pheu Thai លោក Visan Techatirawat បានយកកូនកាំបិត មកអារកដៃរបស់លោក ចំនួន៣លើក នៅក្នុងរដ្ឋសភាថៃ ដើម្បីជាការប្រឆាំងនឹងអ្វីដែលោក ប្រាយុទ្ធ បានថ្លែងថា ប្រភពព័ត៌មានទាំងនោះ ត្រូវបានគេរៀបចំឡើង ដើម្បីឲ្យមានការចាប់អារម្មណ៍ ពីបណ្ដាញផ្សព្វផ្សាយរបស់ពិភពលោក ជុំវិញការធ្វើបាតុកម្មរបស់ប្រជាពលរដ្ឋថៃ។ តំណាងរាស្រ្ដបក្សប្រឆាំងរូបនេះ បានបញ្ជាក់ថា ពលរដ្ឋមានការឈឺចាប់ ជាងអ្វីដែលកំពុងអារដៃរបស់លោកទៅទៀត ទើបពួកគេចេញធ្វើបាតុកម្មបែបនេះ។
ការផ្ទុះបាតុកម្មរបស់ប្រជាពលរដ្ឋ នាពេលនេះ មានភាពផ្ទុយស្រឡះពីអតីតកាល ដោយកាលនោះ មានការដឹកនាំដោយគណបក្សនយោបាយ។ ប៉ុន្ដែបាតុកម្ម នៅក្នុងប្រទេសថៃ ចាប់តាំងពីអំឡុងខែកក្កដា រហូតមកដល់ពេលនេះ គឺអ្នកចូលរួម ភាគច្រើនជាយុវជន ដោយមិនមានការជាប់ពាក់ព័ន្ធនឹងគណបក្សនយោបាយណាមួយនោះឡើយ។
ដោយឡែកចំណុចដ៏សំខាន់របស់ក្រុមបាតុករចង់បាន រួមមាន ទាមទារឲ្យលោក ប្រាយុទ្ធ ចាន់អូចាចុះចេញពីតំណែង, រំលាយសភា (ធ្វើសោធនកម្មរដ្ឋធម្មនុញ្ញ ឆ្នាំ២០១៧) និងធ្វើកំណែទម្រង់របបរាជានិយមបច្ចុប្បន្ន៕
