រាជធានីភ្នំពេញ ៖ នារីវ័យក្មេងរូបស្អាតម្នាក់ ដើរតាមផ្លូវតែម្នាក់ឯង ព្រោះដោះអាវបោះចោលអស់ពីខ្លួន ក្នុងសភាពបាត់បង់ម្ចាស់វង្វេងវង្វាន់ស្មារតី ហើយបម្រុងដើរចូលរថយន្ត តែសំណាងល្អ ត្រូវបានគេប្រទះឃើញ និងជួយសង្គ្រោះទាន់ពេលវេលា ។
ករណីនេះ បង្កការភ្ញាក់ផ្អើល កាលពីម៉ោង៩និង៤០នាទីយប់ ថ្ងៃទី២៧ ខែតុលា ឆ្នាំ២០២០ តាមបណ្ដោយមហាវិថីព្រះនរោត្តម នៅជាប់របងបុរីចំការមន ស្ថិតក្នុងសង្កាត់ទន្លេបាសាក់ ខណ្ឌចំការមន ។
សាក្សីនៅកន្លែងកើតហេតុ បានឲ្យដឹងថា មុនកើតហេតុ គេឃើញនារីម្នាក់ដើរតែម្នាក់ឯង តាមរបងបុរីចំការមន ដោយគ្មានពាក់អាវជាប់ខ្លួនទេ ហើយហាក់ដូចជាគ្មានកម្លាំងកំហែង វង្វេងវង្វាន់ស្មារតី ដូចមនុស្សត្រូវថ្នាំគេ និងបម្រុងដើរចូលឡានគេទៀត ដោយឃើញសភាពមិនស្រួលបែបនេះ ទើបពលរដ្ឋនៅទីនោះ បានចូលចាប់ឃាត់នារីរូបនោះ និងរកអាវមកពាក់បិទបាំងកេរ្តិ៍ខ្មាស់ឲ្យ រួចក៏រាយការណ៍ប្រាប់សមត្ថកិច្ចមូលដ្ឋានជួយអន្តរាគមនម៍តែម្តង។
ក្រោយពលរដ្ឋចាប់ឃាត់ នារីខាងលើ បានប្រាប់ទាំងវង្វេងស្មារតីថា នាងឈ្មោះ រចនា ស្នាក់នៅសង្កាត់ជ័យជំនះ ខណ្ឌដូនពេញ ។ នាងបានផុងខ្លួនប្រើប្រាស់ថ្នាំញៀន រហូតក្លាយជាមនុស្សញៀនថ្នាំ ហើយពេលនេះ នាងបានប្រើប្រាស់ថ្នាំញៀនលើសកម្រិត (បែកថ្នាំ) ទើបក្លាយជាបែបនេះ។
សមត្ថកិច្ច បញ្ជាក់ថា ពេលកម្លាំងសមត្ថកិច្ចចុះទៅដល់កន្លែងកើតហេតុ ដោយឃើញអាការៈនារីខាងលើមិនស្រួល ក៏ទាក់ទងហៅរថយន្ដសង្គ្រោះគ្លីនិក មកដឹកបញ្ជូននាងយកទៅសង្គ្រោះនៅមន្ទីរពេទ្យភ្លាមៗតែម្តង៕
