រហូតមកដល់ពេលនេះ នៅលើពិភពលោក នៅតែមានចំនួនករណីឆ្លងថ្មី នៃវីរុសកូរ៉ូណា ហៅកាត់ កូវីដ-១៩ (Coronavirus Disease 2019) កាន់ច្រើនឡើងគួរឲ្យព្រួយបារម្ភ ហើយក្នុងរយៈ ពេល ២៤ម៉ោងកន្លងមកនេះ មានអ្នកឆ្លងថ្មី ជាង៤សែននាក់ ធ្វើឲ្យចំនួនអ្នកឆ្លងសរុប នៅលើពិភពលោក បន្ដកើនឡើងដល់ ៤០ ២៦៤ ២១៨នាក់ ស្លាប់ ១ ១១៨ ១៦៧នាក់ និងជាសះស្បើយ ៣០ ១០៨ ០៣១នាក់។ បើតាមគេហទំព័រ Worldometer ចេញផ្សាយ កាលពីវេលាម៉ោង៨ព្រឹក ថ្ងៃទី១៩ ខែតុលា ឆ្នាំ២០២០។
បើគិតត្រឹមវេលាខាងលើ វីរុសនេះកំពុងតែរាតត្បាត នៅលើដែនដី និងប្រទេស ចំនួន២១៥ នៅលើ ពិភពលោក ហើយកាលពីថ្ងៃទី១៧ ខែតុលា មានករណីឆ្លងថ្មី កើនឡើងជាង៤សែននាក់។ នេះជាចំនួនឆ្លងដ៏ច្រើនលើសលុបបំផុត លើកដំបូង នៅលើពិភពលោក។ ក្នុងចំណោមអ្នកឆ្លងថ្មីទាំងនោះ ភាគច្រើន នៅបណ្ដាប្រទេសអឺរ៉ុប និងសហរដ្ឋអាមេរិក។
លោក António Guterres អគ្គលេខាអង្គការសហប្រជាជាតិ បានថ្លែង កាលពីថ្ងៃសៅរ៍ ទី១៨ ខែតុលា ថា បើពិភពលោកបែកបាក់គ្នា នឹងទទួលបរាជ័យ នៅក្នុងការដោះស្រាយបញ្ហាកូវីដ-១៩។ ដូច្នេះបណ្ដាមេដឹកនាំពិភលោកទាំងអស់ ចាំបាច់ត្រូវតែរួបរួមគ្នា ទើបអាចទទួលបានជោគជ័យលើកូវីដ-១៩។ អ្វីដែលកាន់តែពិសេសនោះ ចាំបាច់ត្រូវតែមានការខិតខំប្រឹងប្រែងរួម ដើម្បីកុំឲ្យមនុស្សរាប់លាននាក់ធ្លាក់ ចូលទៅក្នុងភាពក្រីក្រ និងការអត់ឃ្លាន ដោយសារជំងឺឆ្លងនេះ ។
ដោយឡែក ប្រធានាធិបតីអាមេរិក លោក ដូណាល់ ត្រាំ បានទាមទារឲ្យមានកញ្ចប់ថវិកា សម្រាប់ជំរុញសេដ្ឋកិច្ចដ៏ធំមួយ ដើម្បីទប់ទល់នឹងស្ថានភាពបច្ចុប្បន្ន ខណៈពលរដ្ឋរបស់ប្រទេសមហាអំណាចមួយនេះ មានចំនួនអ្នកឆ្លង បន្ដកើនឡើងដល់ ៨ ៣៨៧ ៧៩៨នាក់ (ឆ្លងថ្មី ៤៤ ៩៤០នាក់) ស្លាប់ ២២៤ ៧៣០នាក់ (ស្លាប់ថ្មី ៤៤៨នាក់) ជាសះស្បើយ ៥ ៤៥៧ ៦៨១នាក់ អ្នកកំពុងព្យាបាល ២ ៧០៥ ៣៨៧នាក់ និងអ្នកឈឺធ្ងន់ ១៥ ៣៨០នាក់។ នេះបើតាមតួលេខរបស់ Worldometer ចេញផ្សាយ នៅព្រឹកនេះ។
ជាមួយគ្នានេះដែរ បណ្ដាប្រទេស នៅតំបន់អឺរ៉ុបវិញ រហូតមកដល់ពេលនេះ កំពុងផ្ទុះឡើងយ៉ាងខ្លាំង ដោយក្នុងរយៈពេល១ថ្ងៃ មានអ្នកឆ្លងថ្មី នៃកូវីដ-១៩ កើនឡើងជាមធ្យម ១៤ម៉ឺននាក់៕
