ខេត្តបន្ទាយមានជ័យ៖ ជំនន់ទឹកភ្លៀង បានហូរធ្លាក់មកពីប្រទេសថៃ យ៉ាងគំហុក បណ្ដាលឲ្យជន់លិចក្រុង និងស្រុក ចំនួន៦ របស់ខេត្ដបន្ទាយមានជ័យ ហើយអាជ្ញាធរបានជម្លៀសប្រជាពលរដ្ឋជាង២៧០០គ្រួសារ និងអ្នករងផលប៉ះពាល់ ជាង ១៥ ០០០នាក់។
លោក អ៊ុ រាត្រី អភិបាលខេត្តបន្ទាយមានជ័យ បានឲ្យដឹងថា ជំនន់ទឹកភ្លៀង ហូរមកពីប្រទេសថៃ យ៉ាងខ្លាំង គួបផ្សំនឹងទឹកភ្លៀង នៅក្នុងខេត្តផង ទើបធ្វើឲ្យទឹកជន់លិចក្រុង-ស្រុកចំនួន៦ ក្នុងចំណោមក្រុង-ស្រុកទាំង៩របស់ខេត្តបន្ទាយមានជ័យ។ បើគិតត្រឹមព្រឹក ថ្ងៃទី១៨ ខែតុលា ឆ្នាំ២០២០ ទឹកជំនន់បានលិចស្រុក-ក្រុងចំនួន៦ និងធ្វើឲ្យប៉ះពាល់ពលរដ្ឋ ជាង១៥ ០០០គ្រួសារ ហើយពលរដ្ឋជាង២៧០០គ្រួសារ ត្រូវជម្លៀសទៅកាន់ទីទទួលសុវត្ថិភាព។
លោកអភិបាលខេត្តបន្ទាយមានជ័យ បានបញ្ជាក់ថា កាលពីព្រឹកមិញ (ថ្ងៃទី១៨ ខែតុលា) លោកនិងលោកទេសរដ្ឋមន្ត្រី គន់ គីម អនុប្រធានគណៈកម្មាធិការជាតិគ្រប់គ្រងគ្រោះមហន្តរាយ បានចុះទៅកាន់តំបន់ភូមិសាស្ត្រលិចទឹកនោះដែរ។ បើតាមការពិនិត្យជាក់ស្ដែង ប្រជាពលរដ្ឋដែលជួបគ្រោះអាសន្នខ្លាំង ត្រូវបានកងកម្លាំងជួយសង្គ្រោះ ជម្លៀសពួកគាត់ទៅរកទីទួលមានសុវត្ថិភាព។ ចំណែកប្រជាពលរដ្ឋមួយចំនួន ដែលមានផ្ទះខ្ពស់ៗ ផុតពីកម្រិតទឹកជំនន់ គឺក្រុមការងារបានជួយរើប្រមូលរបស់របរអីវ៉ាន់ លើកដាក់ទៅលើធ្នើរខ្ពស់ៗ ដើម្បីឱ្យមានសុវត្ថិភាព ផុតពីទឹក។
លោកអភិបាលខេត្ត បានបន្ថែមថា ក្រុង-ស្រុកចំនួន៦បានរងផលប៉ះពាល់ពីគ្រោះទឹកជំនន់នេះ រួមមាន ក្រុងសិរីសោភ័ណ ក្រុងប៉ោយប៉ែត ស្រុកមង្គលបុរី ស្រុកអូរជ្រៅ ស្រុកថ្មពួក និងស្រុកម៉ាឡៃ។ ចំណែកស្រុកចំនួនបីផ្សេងទៀត រួមមាន ស្រុកភ្នំស្រុក ស្រុកស្វាយចេក និងស្រុកព្រះនេត្រព្រះ នៅមិនទាន់រងផលប៉ះពាល់ខ្លាំងទេ។
បើគិតមកដល់ថ្ងៃទី១៨ ខែតុលា ឆ្នាំ២០២០ គ្រោះទឹកជំនន់នេះ បានបង្កឲ្យប្រជាពលរដ្ឋរស់នៅខេត្តបន្ទាយមានជ័យ ស្លាប់ចំនួន១២នាក់។ ជាមួយគ្នានេះដែរ សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងជាប្រធានគណៈកម្មាធិការជាតិគ្រប់គ្រងគ្រោះមហន្តរាយ កាលពីថ្ងៃទី១៧ ខែតុលា ឆ្នាំ២០២០ បានសម្រេចបង្កើនកញ្ចប់ថវិកា ចំនួន១០ម៉ឺនដុល្លារបន្ថែមទៀត ជូនដល់ខេត្តខេត្តបន្ទាយមានជ័យ ដោយទទួលបានថវិកាសរុបចំនួន២០ម៉ឺនដុល្លារ។
បើតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ បានឱ្យដឹងថា ខេត្តបន្ទាយមានជ័យ បានជន់លិចក្រុង/ស្រុក ចំនួន៩ និងឃុំ/សង្កាត់ចំនួន៤៩។ គ្រោះទឹកជំនន់នេះ បានធ្វើឱ្យប៉ះពាល់ប្រជាពលរដ្ឋ ជាង១ម៉ឺនគ្រួសារ ហើយប្រជាពលរដ្ឋ ជាង២ពាន់គ្រួសារ ត្រូវបានជម្លៀសទៅកាន់ទីទួលមានសុវត្ថិភាព៕