យន្ដហោះ Air Force Two ដឹកអនុប្រធានាធិបតីអាមេរិក បានហោះ បុក បក្សីមួយក្បាល ធ្វើឲ្យអាកាសយានិកសម្រេចចិត្ត បើកក្បាលត្រឡប់ក្រោយវិញ ដើម្បីរក្សាសុវត្ថិភាព។
មន្រ្ដីសេតវិមានប្រធានាធិបតីអាមេរិក បានឱ្យដឹងថា យន្ដហោះ Air Force Two របស់អនុប្រធានាធិបតី Mike Pence បានហោះបុកបក្សីមួយក្បាល កាលពីថ្ងៃអង្គារ ទី២២ ខែកញ្ញា ឆ្នាំ២០២០ នៅរដ្ឋញូវហាំសាយអឺ។ ដោយសារតែករណីនេះ ទើបអាកាសយាននិក សម្រេចបើកយន្ដហោះត្រឡប់ មកកាន់អាកាសយានដ្ឋានវិញ ដើម្បីរក្សាសុវត្ថិភាព។ នៅក្នុងហេតុការណ៍នោះ លោកអនុប្រធានាធិបតី និងក្រុមការងាររបស់លោកកំពុងតែធ្វើដំណើរវិលត្រឡប់ទៅផ្ទះវិញ នៅទីក្រុងវ៉ាស៊ីនតោន ក្រោយពេលលោកចេញពីយុទ្ធនាការឃោសនាបោះឆ្នោត នៅអាកាសយានដ្ឋានមួយ នៅក្បែរទីក្រុងហ្គីលហ្វត រដ្ឋញូវហាំសាយអឺ។
ប្រភពព័ត៌មានដដែល បានបន្ដថា មុនពេលជួបនូវឧបទ្ទវហេតុនោះ យន្តហោះ Air Force Two បានហោះចេញពីអាកាសយានដ្ឋានតំបន់ម៉ែនឆេស្ទើរបូស្តុន តែហោះបុកចំបក្សីមួយក្បាល។ ថ្វីបើករណីនេះ មិនត្រូវបានអនុញ្ញាតឱ្យនិយាយ អំពីបញ្ហានេះជាសាធារណៈក៏ដោយ តែមន្រ្ដីខ្លះបាននិយាយក្នុងលក្ខខណ្ឌអនាមិក ថា អនុប្រធានាធិបតី និងក្រុមការងាររបស់គាត់មិនមានគ្រោះថ្នាក់អ្វីទេ។ ទីបំផុត លោកអនុប្រធានាធិបតីបានធ្វើដំណើរទៅដល់ផ្ទះរបស់លោក តាមយន្ដហោះដឹកទំនិញ ដែលជាទីភ្នាក់ងារចារកម្មប្រើ ដើម្បីដឹកយានយន្តរបស់គាត់៕