ក្រុមតោខៀវ Chelsea បានបញ្ចប់ការចុះហត្ថលេខាលើខ្សែការពារ Thiago Silva ក្នុងការផ្ទេរទៅកាន់ទឹកដីអង់គ្លេសដោយគ្មានតម្លៃខ្លួន (Free) បន្ទាប់ពីក្លឹបអ្នកមានបារាំង Paris Saint-Germain បើកផ្លូវ ។ នេះបើយោងតាមប្រភពពីគេហទំព័រព័ត៌មានកីឡា Live Score ដែលបានចេញផ្សាយនៅថ្ងៃទី២៩ ខែសីហា ឆ្នាំ២០២០ ។
ខ្សែការពារកណ្តាលប្រេស៊ីល វ័យ៣៥ឆ្នាំ រូបនេះបានចុះកុងត្រារយៈពេល១ឆ្នាំជាមួយនឹងជម្រើស១២ខែទៀត ដែលវានឹងក្លាយជាបទពិសោធន៍ដំបូងរបស់ Thiago Silva ក្នុងការលេងនៅក្របខ័ណ្ឌកំពូល English Premier League ។
Thiago Silva គឺជាកីឡាករទី៥ហើយដែល Frank Lampard បានចុះហត្ថលេខានាំយកទៅកាន់ក្រុមតោខៀវ Chelsea មុនរដូវកាល ២០២០-២១ ចូលមកដល់បន្ទាប់ពីការបាននាំយកកីឡាករ Hakim Ziyech, Timo Werner, Ben Chilwell និង Malang Sarr ។
Thiago Silva បាននិយាយថា ៖«ខ្ញុំពិតជារីករាយណាស់ដែលបានចូលរួមជាមួយក្រុមតោខៀវ Chelsea ។ ខ្ញុំពិតជារីករាយដែលបានក្លាយជាផ្នែកមួយនៃក្រុមដែលដឹកនាំដោយ Frank Lampard សម្រាប់រដូវកាលក្រោយ ហើយខ្ញុំនៅទីនេះដើម្បីប្រកួតប្រជែងពេញដោយកិត្តិយស ។ ខ្ញុំទន្ទឹងជួបអ្នកគាំទ្រក្រុមតោខៀវឆាប់ៗ ខ្ញុំរងចាំលេងនៅ Stamford Bridge ឆាប់ៗនេះ» ។
នាយកក្លឹបតោខៀវ Chelsea លោក Marina Granovskaia បាននិយាយថា ៖«យើងពិតជារីករាយណាស់ដែលអាចបន្ថែមកីឡាករឆ្នើមសម្រាប់ក្លឹបដូចជា Thiago Silva ដែលជាកីឡាករលំដាប់ពិភពលោកដល់ក្រុមរបស់យើង ។ តាមរយៈការលេងនៅកម្រិតខ្ពស់បំផុតអស់រយៈពេលជាច្រើនឆ្នាំមក បទពិសោធន៍ ទេពកោសល្យ និងគុណភាពរបស់គាត់នឹងបំពេញបន្ថែមសម្រាប់យើងមាននៅទីនេះ» ។
នាយកក្លឹបតោខៀវបន្ថែមថា ៖«Thiago នឹងក្លាយជាកីឡាករដ៏អស្ចារ្យម្នាក់ ហើយយើងសង្ឃឹមថា គាត់អាចជួយយើងលើកពានរង្វាន់ថ្មីមួយចំនួនដើម្បីដាក់បញ្ជូលទៅក្នុងបញ្ជីកិត្តិយស» ។
ដោយមានភាពលេចធ្លោជាខ្សែការពារកណ្តាលដ៏ឆ្នើមម្នាក់របស់ពិភព Thiago Silva ដែលជាអតីតកីឡាកររបស់ក្លឹប AC Milan បានចូលរួមជាមួយក្រុម PSG ក្នុងឆ្នាំ២០១២ ក្នុងតម្លៃ៤២លានផោន និងបានបន្តភាពជោគជ័យដ៏អស្ចារ្យនៅក្នុងប្រទេសបារាំង ។
Thiago Silva ត្រូវបានក្លឹបតែងតាំងជាប្រធានក្រុម និងធ្លាប់ឈ្នះពានរង្វាន់លីគកំពូលរបស់បារាំង Ligue 1 ចំនួន៧ដង, ពានរង្វាន់ Coupe de France ចំនួន៥ និងពានរង្វាន់ Coupe de la Ligue ចំនួន៦លើក ។
ថ្មីៗនេះខ្សែការពារកណ្តាលរូបនេះទើបតែបានជួយក្រុម PSG ឱ្យឈ្នះពានរង្វាន់ក្នុងស្រុកនារដូវកាលឆ្នាំ ២០១៩-២០ ខណៈដែល PSG ក៏បានឈានដល់វគ្គផ្តាច់ព្រ័ត្រនៃក្របខ័ណ្ឌ Champions League ជាលើកដំបូងរបស់ពួកគេផងដែរ ប៉ុន្តែត្រូវបរាជ័យក្នុងលទ្ធផល ១-០ ក្រោមថ្វីជើងក្រុម Bayern Munich ។
ការបាត់បង់ពាន Champions League នោះគឺជាការប្រកួតចុងក្រោយរបស់ Silva សម្រាប់ក្លឹប PSG ព្រោះនាយកកីឡារបស់ក្លឹប PSG លោក Leonardo បានបញ្ជាក់កាលពីខែមិថុនាថា ខ្សែការពារ Thiago Silva មិនត្រូវបានផ្តល់កិច្ចសន្យាថ្មីទេ ។
ការចុះកុងត្រានាំរកកីឡាករខ្សែការពារកណ្តាល Thiago Silva របស់ Frank Lampard នេះគឺជាសញ្ញាមួយរបស់ក្រុមតោខៀវ Chelsea ខណៈដែលពួកគេកំពុងសម្លឹងមើលឱកាសការប្រកួតប្រជែងដណ្តើមជើងឯក Premier League នៅរដូវកាលក្រោយ ៕
ប្រភព ៖ Live Score , ដោយ ៖ សំណាង
