រាជធានីភ្នំពេញ ៖ រាជរដ្ឋាភិបាល ក៏គ្រោងយកផែនទីឋានលេខាព្រំដែនគោក ១/២៥ ០០០ រវាង កម្ពុជានិងវៀតណាម ទៅតម្កល់នៅអង្គការសហប្រជាជាតិ UN ។
នៅថ្ងៃទី២៧ ខែសីហានេះ រាជរដ្ឋាភិបាលកម្ពុជា បានរៀបចំពិធីប្រគល់ផែនទីឋានលេខាព្រំដែនគោក ១/២៥ ០០០ រវាងកម្ពុជា-វៀតណាម ជូនស្ថាប័ននានាចំនួន៣៥ ដើម្បីយកទៅអនុវត្ត ក្រោមអធិបតី សម្តេចពិជ័យសេនា ទៀ បាញ់ រដ្ឋមន្ត្រីក្រសួងការពារជាតិ នៅវិមានសន្តិភាព ។
ឯកឧត្តម វ៉ា គឹមហុង ប្រធានគណៈកម្មាធិការចម្រុះព្រំដែនកម្ពុជា បានលើកឡើងថា ផែនទីឋានលេខាព្រំដែនគោក ១/២៥ ០០០ រវាងកម្ពុជា-វៀតណាម នេះ ធ្វើឡើងដោយមានការព្រមព្រៀងគ្នារវាងភាគីកម្ពុជា និងវៀតណាម និងស្របតាមសន្ធិសញ្ញាបំពេញបន្ថែមឆ្នាំ២០០៥ ព្រមទាំងរដ្ឋធម្មនុញ្ញរបស់កម្ពុជា ។
ឯកឧត្ដម បញ្ជាក់ថា ផែនទីនេះ កម្ពុជានិងវៀតណាម បានឯកភាពគ្នាឲ្យប្រទេសទី៣ ពោល គឺប្រទេសដាណឺម៉ាក ជាអ្នកបោះពុម្ព ដើម្បីបង្ហាញពីសុក្រឹតភាព នៃផែនទីដ៏ទំនើប ដែលអាចមើលឃើញស្ថានភាពនៅតាមព្រំដែន និងបង្គោលព្រំដែន នៃប្រទេសទាំងពីរយ៉ាងច្បាស់ពីលើអាកាស ។
បើតាមឯកឧត្តម វ៉ា គឹមហុង ក្រោយពីទទួលបានជោគជ័យលើការបង្កើតផែនទីឋានលេខាព្រំដែនគោក ១/២៥ ០០០ កម្ពុជា-វៀតណាមនេះ រាជរដ្ឋាភិបាលកម្ពុជា ក៏គ្រោងយកផែនទីនេះ ទៅតម្កល់ទុកនៅអង្គការសហប្រជាជាតិ UN នៅពេលខាងមុខ ដើម្បីទុកជាឯកសារគតិយុត្តិ ដែលទទួលស្គាល់ជាលក្ខណៈអន្តរជាតិ ។
ជាមួយគ្នានេះ សម្តេចពិជ័យសេនា ទៀ បាញ់ រដ្ឋមន្ត្រីក្រសួងការពារជាតិ បានចាត់ទុកផែនទីនេះថា ជាតឹកតាងដ៏រឹងមាំ និងជាលទ្ធផលជាទីមោទនសម្រាប់កម្ពុជា ក្នុងការដោះស្រាយបញ្ហាព្រំដែនជាមួយនឹងប្រទេសវៀតណាម ។
សម្តេច ក៏បន្ថែមថា ការយកផែនទីនេះទៅតម្កល់នៅអង្គការសហប្រជាជាតិ ជារឿងដែលរាជរដ្ឋាភិបាល នឹងធ្វើតែមិនទាន់អាចបញ្ជាក់ថា ពេលណាមួយឲ្យពិតប្រាកដនោះឡើយ ។
សូមបញ្ជាក់ថា កម្ពុជា និងវៀតណាម ភាគីទាំងពីរ បានសម្រេចការបោះបង្គោលព្រំដែនបានប្រមាណ ៨៤ ភាគរយ ដោយនៅសល់តែ ១៦ ភាគរយទៀតប៉ុណ្ណោះ នឹងត្រូវបញ្ចប់ ៕
