រាជធានីភ្នំពេញ ៖ អ្នកនាង ចាន់ កែវនិមល គឺជាពិធីការិនីមួយរូបដែលមានទេពកោសល្យ មានភាពលេចធ្លោជាងគេនៅប៉ុស្តិ៍ទូរទស្សន៍ និងសម្បូរវត្តមានស្ទើរតែគ្រប់កម្មវិធីកម្សាន្តនានា របស់ប៉ុស្តិ៍ទូរទស្សន៍ ហង្សមាស ឬកម្មវិធីប្រគំតន្ត្រីផ្សាយផ្ទាល់នៅតាមខេត្តនានា រៀងរាល់ចុងសប្តាហ៍ បានធ្វើឲ្យកូនស្រីរបស់ខ្លួនមានការភ្ញាក់ផ្អើល និងរំភើបជាខ្លាំង រហូតដល់នាងតូចស្រក់ទឹកភ្នែក ព្រោះតែទើបទិញផ្ទះដ៏ធំមួយ ធ្វើជាកាដូក្នុងថ្ងៃខួបកំណើតកូន ។
អ្នកនាង ចាន់ កែវនិមល និងស្វាមីបានរៀបចំកម្មវិធីឡើងគេហដ្ឋានថ្មីរបស់ខ្លួន កាលពីថ្ងៃទី២៣ ខែសីហា ឆ្នាំ២០២០ ជាពិសេសផ្ទះពិធីការិនីដ៏ល្បីនេះ ពិតជាធំ និងស្អាតខ្លាំងណាស់ អមដោយការតុបតែងរៀបចំយ៉ាងទាក់ទាញពីភ្នែកមហាជនទូទៅ ។
គ្រាន់តែឃើញសារបង្ហោះពិធីឡើងផ្ទះវីឡាថ្មីនេះ ចាន់ កែវនិមល បានធ្វើឱ្យអ្នកគាំទ្រ និងមហាជននាំគ្នាសរសើរដល់ស្វាមី និងតារាល្បីមានភាពរីកចម្រើនខ្លាំងរហូតមានលុយច្រើន ទិញផ្ទះវិឡាក្នុងបុរីល្បីឈ្មោះមួយ ។
អ្នកនាង ចាន់ កែវនិមល បានលះបង់ចោលការងារជាសាស្ត្រាចារ្យផ្នែកឌីហ្សាញ នៅសាកលវិទ្យាល័យមួយ ក្រោយពីពេលស្ទុះចូលទៅចាប់ការងារសិល្បៈ ជាពិធីការិនី មកដល់សព្វថ្ងៃនេះ ៕