ប្រភពពីក្លិបបានបញ្ជាក់ប្រាប់សារព័ត៌មាន AFP កាលពីថ្ងៃអង្គារថា កីឡាករឆ្នើម Lionel Messi បានជូនដំណឹងដល់ក្រុម Barcelona ថា រូបគេចង់បញ្ចប់កិច្ចសន្យាជាឯកតោភាគីជាមួយក្លិបយក្សអេស្ប៉ាញមួយនេះបន្ទាប់ពីបញ្ចប់រដូវកាលដ៏អាក្រក់នេះ ។ នេះបើយោងតាមប្រភពពីទីភ្នាក់ងារសារព័ត៌មាន Bangkok Post ដកស្រង់ចេញផ្សាយនៅព្រឹកថ្ងៃទី២៦ ខែសីហា ឆ្នាំ២០២០ នេះ ។
មេធាវីរបស់តារាឆ្នើមអាហ្សង់ទីនបានផ្ញើសារទៅកាន់ក្លិបអ្នកមានបុណ្យ Barcelona ដែលក្នុងនោះពួកគេបានប្រកាសប្រាប់ពីបំណងប្រាថ្នារបស់ Messiចង់ចាកចេញពីក្លិបបង្កឱ្យមានការភ្ញាក់ផ្អើលជាខ្លាំងក្នុងពិភពបាល់ទាត់ ។
យោងតាមប្រភព Marca បានឱ្យដឹងថា ៖«កុងត្រារបស់ Messi នឹងផុតកំណត់នៅថ្ងៃទី១០ ខែមិថុនា ឆ្នាំ២០២១ ប៉ុន្តែ Messiស្នើសុំឱ្យបញ្ចប់កិច្ចសន្យារបស់ខ្លួនឥឡូវនេះ» ។
វាជាឱកាសល្អមួយសម្រាប់ក្លិបដទៃដែលចង់បានតារាឆ្នើមសញ្ជាតិអាហ្សង់ទីនរូបនេះ ដោយកន្លងមកក្លិបអ្នកមានបុណ្យ FC Barcelona ក៏ធ្លាប់ប្រកាសហើយថា បើចង់បានកីឡាករឆ្នើម Lionel Messi ទាន់តែមានលុយ៧០០លានអឺរ៉ូ (ប្រហែល៨២៨លានដុល្លារ) សិនទើបអាចនាំយករូបគេចេញពីទឹកដី Camp Nou បាន ។
Messi បានចូលហ្វឹកហាត់សាលាយុវជនរបស់ក្លិប FB Barcelonaតាំងពីនៅអាយុ១៣ឆ្នាំ និងបានបង្ហាញខ្លួនលើកដំបូងនៅក្នុងឆ្នាំ២០០៤ ក្នុងវ័យ១៧ឆ្នាំ ។ ម្ចាស់ពានរង្វាន់ Ballon d’Or ៦ សម័យកាលគឺជាអ្នកស៊ុតបញ្ចូលទីច្រើនបំផុតរបស់ក្លឹបដោយរកបាន ៦៣៤ គ្រាប់ និងធ្លាប់ឈ្នះពានរង្វាន់ Champions League ចំនួន៤ដង ។
ប៉ុន្តែអនាគតរបស់ Messi នៅឯក្លិប Barca ស្ថិតក្នុងភាពស្រពេចស្រពិលយ៉ាងខ្លាំងបន្ទាប់ពីបានរងបរាជ័យយ៉ាងអាម៉ាស់ក្នុងលទ្ធផល ៨-២ ក្រោមស្នាដៃក្រុម Bayern Munich ក្នុងការប្រកួត Champions League វគ្គ៨ក្រុមចុងក្រោយក្នុងទីក្រុង Lisbon ។
វាជាកំណត់ត្រាដ៏អាក្រក់មួយរបស់ Barca ដែលចាញ់ដល់ទៅ៨គ្រាប់ក្នុងមួយការប្រកួត ចាប់តាំងពីធ្លាប់ចាញ់ Sevilla ៨-០ ក្នុងព្រឹត្តិការណ៍ Spanish Cup ឆ្នាំ១៩៤៦កន្លងមក ។
ការបរាជ័យដ៏អាម៉ាស់នេះបានបង្កឱ្យមានការផ្លាស់ប្តូរយ៉ាងខ្លាំងនៅក្នុងក្លិប FC Barcelona ជាក់ស្តែងគ្រូបង្វឹកលោក Quique Setien ត្រូវបានបណ្តេញចេញពីតំណែងភ្លាមៗបន្ទាប់ពីបានដឹកនាំអស់រយៈពេល ៦ខែ ខណៈដែលនាយកកីឡាលោក Eric Abidal ក៏ត្រូវបានបណ្តេញចេញពីតំណែងផងដែរ ៕
ប្រភព ៖ Bangkok Posts , ប្រែសម្រួលដោយ ៖ សំណាង